SHIRONGWA 10
Uwa munke u wanena mo mumapongo ghaMbangi daJehova?
Va kuyita rumwe kulipongo lyaMbangi daJehova ndi? Ntjene kapi wa yenda ko rumwe, kuvhura u kare nawoma kuyenda ko shikando shakuhova. Kuvhura u kupureshi: ‘Nke vya shorokango ko kumapongo ogho? Nke gha karera mulyo? Nke ni yendera ko?’ Mushirongwa shino, ngau kushonga omo kuponga navamwe vi kuvatera muliparu lyoye ntani u shuwenene pepi naKarunga.
1. Konda munke yamulyo tu pongera?
Kenga ovyo a ghambire mutjangi umwe waBibeli kuhamena konda yamulyo tu pongera. Ghuye kwa ghambire ashi: “Mumbunga yayinene, ngani tanga Jehova.” (Pisalme 26:12) Mbangi daJehova kuhafera ngudu mapongo ghavo. Muudjuni mudima, vavo kuponga kehe shivike va tange Karunga nakuyimba nakuraperera. Vikando vimwe mumwaka, vavo nka kuponga pavigongi va karere Karunga.
2. Vinke ngau kushonga mo mumapongo ghetu?
Mumapongo ghetu, atwe kudemenena kuNkango daKarunga, “kuditontonona nawa ntani paureru.” (Varura Nehemia 8:8.) Mumapongo ghetu, ngau kushonga kuhamena Jehova nankedi dendi. Opo ngau ya yiva ngudu shihoro shendi, ngau shuwenena pepi naye. Ngau ya nongonona nka omu a vhura kukuvatera u hafere liparu weno.—Jesaja 48:17, 18.
3. Weni va kuvatera ovo u kawana kumapongo ghetu?
Jehova kwa tu tanterashi: “Ghayadarangenu ko vaunyenu mukukorangede mushihoro namuvirughana vyaviwa, kapishi tu kombe mapongo ghetu.” (Heberi 10:24, 25) Mumapongo ghetu, ngau ka wana vantu ovo va kuhora-horo ntani yira ve, navo kwa shana kukushonga kuhamena Karunga. Ngau ka yuvha omo vana kutapa maghano ghakukorangeda ghamuBibeli. (Varura Roma 1:11, 12.) Ngau kuyiva navamwe va kareshi vadike ndi ovo vakwaro ovo va karo naruhafo mpiri momo va kara namaudito. Odo ndo nkoda dimwe ovyo ana shanene Jehova tu ponge kehepano!
TEDA KO
Yiva kuhamena ovyo vya shorokango mumapongo ghaMbangi daJehova ntani mulyo wa karomo mukuponga navo.
4. Mapongo ghaMbangi daJehova
Paruvede rwaVakriste vakuhova, vavo kava ponganga kehepano va karere Jehova. (Roma 16:3-5) Varura Kolose 3:16 makura timwitirenu lipuro lino:
-
Weni Vakriste vakuhova kava kareranga Jehova?
Namuntji lino, Mbangi daJehova nado kuponga kehepano kumavango ghavo ghaukareli. Mukuyiva omo va yenditanga mapongo ghavo, kengera VIDIYO. Makura kenga palifano lina kuneghedo lipongo ntani timwitirenu mapuro ghano.
-
Makufaneno munke ghuna nongonona ovyo vya shorokango kuShinyanga shaUhompa ntani novyo una varura muKolose 3:16?
-
Muvidiyo ndi palifano, mpovili una nongonona kuhamena mapongo ovyo una hafere ndi?
Varura 2 Korinte 9:7 makura timwitirenu lipuro lino:
-
Morwanke mumapongo ghaMbangi daJehova va piranga kupura mfuto?
Kenga kumwe namurongi woye ovyo ngava timwitira mulipongo lyetu limwe shivike shino.
-
Ruha munke rwamulipongo una hafere ndi runa karo mulyo koye?
Maukenu nka ghamweya
Ku jw.org, kuvhura u wane livango naruvede twa rughananga mapongo ghetu udjuni mudima.
-
Atwe kuvareka nakuhulita mapango nantjumo nandapero
-
Mumaruha ghamwe, vakalimo kutapa malimbururo
-
Kehe ghuno kuvhura kuponga, vikare ashi mapata, vadike, vakurupe ndi vanuke
-
Mumapongo ghetu kapi va puranga mo mfuto. Mbangi daJehova kapi da shungidanga sumina ndi va yendawite rupasa rwakudjumbira
5. Pa hepa likuturomo mukuponga
Kenga shihonenito shaJesus nalipata lyavo. Mukukaponga pashilika shakehe mwaka, vavo va hepire kuyenda kilometa 100 mundjira dandundu kutunda kuNasaret va yende kuJerusalem. Varura Lukas 2:39-42 makura timwitirenu mapuro ghano:
-
Weni ghuna kughayara, ruyendo runo rwakuJerusalem rwa hepire likuturomo ndi?
-
Nke nove u hepere likuturo mo mukuponga natwe?
-
Weni ghuna kughayara, hepero ndi? Morwanke?
Bibeli kwa ghambashi mulyo ngudu kuponga kumwe mukukarera Karunga. Varura Heberi 10:24, 25 makura timwitirenu lipuro lino:
-
Morwanke tu pongeranga kehepano?
VAMWE KUGHAMBA ASHI: “Kapishi hepero u ponge navamweya. Vya wanena po tupu kukushonga Bibeli kumundi.”
-
Litjangwa munke ndi shihonenito munke muBibeli sha neghedo ovyo ana shana Jehova tu rughane?
LIKAMO
Mumapongo ngau kushonga vyavingi kuhamena Jehova nakunkondopeka uholi woye naye ntani ngau mu karera kumwe navaunyoye.
Livyukuruko
-
Morwanke Jehova ana kutukorangedera tu ponge?
-
Nke ngau kushonga mumapongo ghaMbangi daJehova?
-
Weni ghuna kughayara ko, uwa munke nka ngau wanena mo mumapongo?
YIVAKO VYAVINGI
Weni ntjeneshi ove woma kuponga natwe? Kenga omo murume owo a kuyuviro ngoli a ya hora mapongo.
Kengera omo mudinkantu a hafilire mapongo ntani ovyo a rughanine a twikire kuponga.
Kushonge u yive omo vamweya va kuyuvanga kuhamena kuyenda kumapongo.
“Morwanke u ka pongera kuShinyanga shaUhompa?” (Shirongwa kuintanet)
Varura u mone omo liparu lyamurume wanyanya lya kutjindjire kutunda tupu opo a yendire kulipongo lyaMbangi daJehova.
“Kani yendauranga kehe kuno nauta wande” (Ruhungu, Sitarara-Sikukutu 2014)
