SHIRONGWA 13
Omo maukareli ghavimpempa a shwaukitanga Karunga
Ntjeneshi Karunga shihoro, nke ngoli maukareli ogho a ghambango nakurughana vininke mulidina lyendi a rughanenanga vininke vyavidona ngudu? Maukareli ogho, vimpempa ntani kushwaukita Karunga. Weni a mu shwaukita? Weni a kuyuvhanga? Ntani nke nga rughana ko?
1. Weni maukareli ghavimpempa a shwaukitanga Karunga mumashongo ghavo?
Maukareli ghavipempa kwa “pirura ushiri kuhamena Karunga u kare vimpempa.” (Roma 1:25) Pashihonenito, maukareli ghamangi kapi gha shonganga vantu vavo kuhamena lidina lyaKarunga. Enengoli, Bibeli kwa ghambashi tuna hepa kurughanita lidina lyaKarunga. (Roma 10:13, 14) Opo vyashorokanga vininke vyavidona, vampititi vamwe vamaukareli kwa ghambangashi vipanga vyaKarunga. Ngoli ovyo, vimpempa. Karunga kapishi ndje a yititango po udona. (Varura Jakobus 1:13.) Lihudi, mashongo ghavimpempa ghamaukareli kwa renkita vantu va kare ure naKarunga.
2. Weni maukareli ghavimpempa a shwaukitanga Karunga muvirughana vyavo?
Maukareli ghavimpempa kapi a tekuranga vantu yira momo a va tekuranga Jehova. Bibeli kwa ghambashi maukareli ghavimpempa ‘maundjoni ghavo mangi unene ntani kwa katika kuwiru.’ (Lishorwero 18:5) Mwayendo mwaka, maukareli kwa kuhamikita mumaupolitika, kwa kwatitako vita ntani kwa dipayita vantu vavangi. Vampititi vamwe vamaukareli kwa hora ngudu liparu lyandiro ntani vavo kushungida vantu va tape shilinga mposhi va paruke nawa. Nkalito yavo kunegheda ashi kapi va yiva Karunga, mpongolishi kapi vya va wapera vyakumukarera po.—Varura 1 Johannes 4:8.
3. Weni a kuyuvhanga Karunga kuhamena maukareli ghavimpempa?
Ntjeneshi kukugarapita ovyo a rughananga maukareli ghavimpempa, ghuye Jehova ne weni a kuyuvhanga? Jehova a hora vantu, ngoli kumugarapita vampititi ovo va mu shwaukitango nakuhepeka vantu. Ghuye a twenyidira ashi maukareli ghavimpempa ngava gha djonaghura po ntani “kapi nga gha kara po nka.” (Lishorwero 18:21) Karunga ntantani tupu nga ya ghupepo maukareli naghantje ghavimpempa.—Lishorwero 18:8.
TEDA KO
Konakona omo Karunga a kuyuvhanga kuhamena maukareli ghavimpempa. Kushonge ovyo a rughana maukareli ghavimpempa, ngoli kenga nka ovyo vi dilira kukukondera vino mukukushonga kuhamena Jehova.
4. Karunga kapi a tamburanga maukareli naghantje
Vantu vavangi kwa purashi maukareli kwa fana yira ndjira dakukushuva-shuva odo da twarango vantu kwaKarunga. Ngoli ushiri ndi? Varura Matheus 7:13, 14 makura timwitirenu lipuro lino:
-
Weni Bibeli ya tontonona ndjira yakutwara kumonyo?
Kengera VIDIYO makura timwitirenu lipuro lino.
-
Ngoli ya ghamba Bibeli ashi pa kara maukareli ghamangi a hafitango Karunga ndi?
5. Maukareli ghavimpempa kapi a temwininanga shihoro shaKarunga
Maukareli kwa shwaukita Karunga munkedi dadingi. Nkedi yayinene po kuna kara kukuhamita muvita. Mukukenga shihonenito, kengera VIDIYO. Makura timwitirenu mapuro ghano.
-
Nke da rughanine nkirishe dadingi pavita vyakuhova vyaudjuni nauntje?
-
Weni una kukuyuvha kuhamena ovyo da rughanine nkirishe?
Varura Johannes 13:34, 35 ntani 17:16. Makura timwitirenu mapuro ghano:
-
Weni una kughayara a kuyuvhanga Jehova opo maukareli a kuhamitiranga muvita?
-
Maukareli ghavimpempa kwa kara naundjoni wavininke vyavidona vyavingi. Nkedi munke wa mona maukareli a dira kutemwinina shihoro shaKarunga?
6. Karunga ana shana kuvatera vantu vashutuke mo mumaukareli ghavimpempa
Varura Lishorwero 18:4, a makura timwitirenu lipuro lino:
-
Weni una kukuyuvha pakuyivashi Karunga ana shana kuvatera kehe uno wa pukita ukareli wavimpempa?
7. Twikira kukushonga kuhamena Karunga waushiri
Hepero virughana namashongo ghamaukareli ghavimpempa gha kundame omo wa mukenganga Karunga ndi? Turenkeshi mwanuke ana shwena mapukururo ghamawa ghavashe. Makura a tokora kutunda mo mumundi wavo a ka paruke liparu lyalidona. Sha ogho kapi ana kukwatitako litokoro namparukito yamonendi. Morwanke vi pilira kuwapa kupa undjoni sha ogho kumparukito oyo ana kuparuka monendi wamurwaniti?
-
Ngoli vya wapa kupa Jehova undjoni nakushayeka kukushonga kumuhamena morwa ovyo ana kurughana maukareli ghavimpempa ndi?
VAMWE KUGHAMBA ASHI: “Wankeme Karunga mbyovyoshi maukareli ngo a yititango po maudito ghamangi.”
-
Nove ngoli wa kuyuvhanga ndi?
-
Morwanke virughana vyamaukareli ghavimpempa gha dilira kukundama omo twa kenganga Jehova?
LIKAMO
Maukareli ghavimpempa kushwaukita Karunga kupitira mumashongo ghavo ghavimpempa ntani navirughana vyavidona. Karunga nga djonaghura po maukareli ghavimpempa.
Livyukuruko
-
Weni una kukuyuvha kuhamena mashongo ghamaukareli ghavimpempa novyo gha rughana?
-
Weni Jehova a kuyuvhanga kuhamena maukareli ghavimpempa?
-
Vinke Karunga nga ka rughana maukareli ghavimpempa?
YIVAKO VYAVINGI
Kushonge ndjira mbiri omo maukareli ghamangi gha guvitanga Karunga.
“Maukareli naghantje ghakufana ndi? Naghantje kushonga kuhamena Karunga ndi?” (Shirongwa kuintanet)
Morwanke Jehova ana shanene tu mu rughanene kumwe navaunyetu?
“Hepero kuhama kumbunga yaukareli ndi?” (Shirongwa kuintanet)
Muruti umwe kapi wa mu hafitire ukareli wavo. Enengoli, kapi vya mu kondilire kukushonga kuhamena ushiri waKarunga.
“Nke vya renkitiro Muruti a tunde munkirishe yavo” (Awake!, February 2015)
Mwayendo mwaka, maukareli kwa ronga vimpempa ovyo vya renkitango vantu va kuyuvheshi Karunga ure a kara ntani ukenya. Kushonge ushiri kuhamena mapuliro matatu ghavimpempa.
“Vimpempa ovyo vya renkitango Karunga a moneke yira kwato shihoro” (Ruhungu, November 1, 2013)