SHIRONGWA 17

Muntu munke nani Jesus?

PLAY

Pakukushonga kuhamena ovyo ka ghambanga novyo ka rughananga Jesus palivhu, atwe kuyiva nkedi dendi odo di tu renkito tu mu hore ntani naVashe Jehova. Nkedi munke dadiwa a kalire nado? Ntani weni tu mu honena muliparu lyetu?

1. Weni Jesus a kara yira Vashe?

Opo Jesus a kalire muliwiru ka kengeranga Vashe nakukushongera ko kwavo ure wamwaka mabiliyona. Mbyo ngoli a ghayareranga nakukuyuvha nakurughana vininke yira Vashe. (Varura Johannes 5:19.) Jesus kuhonena nawa-nawa nkedi daVashe, mbyoo ngoli a ghambire ashi: “Oghu a nkengo ame, a mona nka Vavava.” (Johannes 14:9) Opo u kushonga nkedi daJesus, ngau ya yiva nka nawa Jehova. Pashihonenito, nkedi ya yiwa omo Jesus ka tekuranga vantu kunegheda omo Jehova a kuyuvhanga kukuhamena.

2. Weni Jesus a negheda ashi a hora Jehova?

Jesus kwa ghambireshi: “Ngoli Ame kurughana momo va ntantera Vavava, ashi udjuni u yive ashi Ame nani na hora Vavava.” (Johannes 14:31) Opo a kalire Jesus palivhu, a neghidire omo a hora ngudu Vashe pakuvalimburukwa nampiri momo vyakalire pamwe udito. Jesus a holire kutimwitira kuhamena Vashe nakuvatera vapeke navo va kukwate uholi naVashe.—Johannes 14:23.

3. Weni Jesus a negheda ashi a hora vantu?

Bibeli kwa ghamba ashi Jesus a “hora ngudu vantu.” (Vishegho 8:31) Ghuye a neghedire shihoro osho pakukuturamo unene a korangede nakuvatera vantu. Jesus ka rughananga vitetu ovyo vya neghediro ashi kapi tupu a kara nankondo enengoli a kara nashihoro. (Markus 1:40-42) Ghuye ka tekuranga vantu nankenda ntani kwato mpongo. Nkango dendi kwa shengawidire nakutapa lighuguvaro kovo ka va mu teghererango vadimutjima dadiwa. Jesus a nyandire ntani a fire morwa a holire vantu navantje. Ngoli, uye kwa holire ngudu ovo ka va tikitango mo mashongo ghendi.—Varura Johannes 15:13, 14.

TEDA KO

Kushonge vyavingi kuhamena nkedi daJesus. Ntani konakona u yive omo u negheda shihoro nakukara nautapi yira Jesus.

4. Jesus a hora Vashe

Shihonenito shaJesus kutushonga omo tu negheda shihoro shetu kwaKarunga. Varura Lukas 6:12 ntani Johannes 15:10; 17:26. Muruku rwakuvarura kehe litjangwa, timwitirenu lipuro lino:

Yira Jesus, weni tu negheda ashi twa hora Jehova?

Jesus a holire Vashe vamuliwiru ntani ka ghambaghuranga navo mundapero

5. Jesus kufera mbiri vantu vana hepo mbatero

Jesus ka turanga muhovo vihepwa vyavantu kupitakana vyendi. Mpiri opo ka rorokanga, ghuye ka rughanitanga ruvede nankondo dendi a vatere vantu. Varura Markus 6:30-44, makura timwitirenu mapuro ghano:

Mushishorokwa shino, weni Jesus a neghedire nkenda kuvantu?—Kenga velise 31, 34, 41 ntani 42.
Vinke vya renkitiro Jesus a vatere vantu?—Kenga velise 34.
Mukumonashi Jesus kuhonena nkedi daJehova, vinke una kushongere ko kuhamena Jehova?
Munkedi munke dimwe omo tu vhura kutemwinina nkenda a neghedire Jesus kuvantu?

6. Jesus muntu wa utapi

Jesus a kalire muntu wa utapi mpiri momo a pilire kuweka vyavingi, ntani ghuye kutukorangeda natwe tu kare va utapi. Varura Virughana 20:35, makura timwitirenu lipuro lino:

Kukuwa nankango daJesus, vinke vi tu yitiro ruhafo?

Kengera VIDIYO, makura timwitirenu lipuro lino.

VIDIYO: “Kutapa kuyita ruhafo ngudu”—Karuha (4:00)

Mpiri tu pire kuweka vyavingi, nkedi munke dimwe omo tu vhura kutapa?

Maukenu nka ghamweya

Bibeli kutushonga tu raperere kwaJehova mulidina lyaJesus. (Varura Johannes 16:23, 24.) Pakuraperera ngoweyo, atwe kunegheda ashi twa mona mulyo wavininke a rughana Jesus mukutuvatera tu kare vaholi vaJehova.

VAMWE KUGHAMBA ASHI: “Karunga kwato shinka kumaruhepo ghetu.”

Mukukenga ashi Jesus kuneyeda nkedi daVashe, weni ovyo ka rughananga vya tapa umbangi ashi Jehova kutupakera shinka?

LIKAMO

Jesus a hora Jehova, ntani nka a hora vantu. Mukumona ashi Jesus kuhonena Vashe, evi kunegheda ashi ntjene au yiva Jesus, ngau ya yiva nka nawa Jehova.