SHIRONGWA 21

Weni mbudi yayiwa vana kuyiyuvhita?

PLAY

Ntantani Jehova nga rughanite Uhompa wendi mukughupapo maudito ghetu naghantje. Oyo kuna kara mbudi yayiwa tuna hepa kutantera ko vapeke. Jesus a shanine varongwa vendi va tantere vantu navantje mbudi yino! (Matheus 28:19, 20) Weni Mbangi daJehova da tikita mo mpangera yaJesus?

1. Weni litjangwa lyaMatheus 24:14 vana kulitikita mo?

Jesus kwa pumbire ashi: “Ngoli mbudi yino yayiwa yaUhompa waKarunga ngava yi yuvhita tanko muudjuni nauntje.” (Matheus 24:14) Mbangi daJehova kuhafera kurughana shirughana shino shamulyo. Atwe kuna kuyuvhita mbudi yayiwa udjuni nauntje mumaraka ghakupita pa 1 000! Shirughana shino shashinene sha hepa likuturomo lyalinene nandjenditito yayiwa. Tuna hepa mbatero yaJehova mukushitikita mo.

2. Nkedi munke twa rughanitanga tu yuvhitire vantu?

Atwe kuyuvhitira kehe kuno tu vhura kuwana vantu. Yira Vakriste vakuhova, atwe kuyuvhita “tunda mundi yenda mundi.” (Virughana 5:42) Nkedi yino kutuvatera tu vhure yuvhitire mamiliyona ghavantu kehe mwaka. Maruvede ghamwe vantu kapi twa va wananga mumandi makura atwe kuyuvhitira nka kumavango ghapeke. Atwe kushana nka nkedi dapeke tu tantere ko vantu kuhamena Jehova nashitambo shendi.

3. Shitumbukira share shakuyuvhita mbudi yayiwa?

Vakriste navantje vaushiri va kara nashitumbukira shakutantera ko vapeke mbudi yayiwa. Shirughana osho mulyo ngudu kwetu. Atwe kuyuvhita mpapa twa hulira mbyovyoshi twa nongonona ashi liparu lyavantu mo lyakorera. (Varura 1 Timotheus 4:16.) Kapi va tu futanga tu yuvhite, morwa Bibeli kwa ghambashi: “Anwe kwa vi wana nyara-nyara, nanwe nka ka vi tapenu nyara-nyara.” (Matheus 10:7, 8) Kapishi navantje va tamburango mbudi yetu. Mpiri ngoli, atwe kutwikira kuyuvhita morwa tuna shana kulimburukwa mpangera yaJehova nakumuhafita.

TEDA KO

Kushonge u yive omo Mbangi daJehova da kutura mo mukuyuvhita udjuni nauntje nomo Jehova a tu vateranga.

Kuyuvhitira udjuni nauntje: (A) Costa Rica, (B) United States, (C) Benin, (D) Thailand, (E) Yap, (F) Sweden

4. Atwe kurughana unene tu wane vantu

Mbangi daJehova kukutura mo unene va yuvhitire vantu nakuntje mbudi yayiwa. Kengera VIDIYO, makura timwitirenu lipuro lino.

VIDIYO: Kuyuvhitira “udjuni nauntje” (7:33)

Nke una hafere kuhamena likuturomo lyaMbangi daJehova mukuyuvhita?

Varura Matheus 22:39 ntani Roma 10:13-15, makura timwitirenu mapuro ghano:

Weni shirughana shetu Shakuyuvhita sha negheda ashi twa hora vaunyetu?
Weni a kuyuvhanga Jehova kuhamena ovo va yuvhitango mbudi yayiwa?—Kenga velise 15.

5. Atwe varughani kumwe naKarunga

Vishorokwa vyavingi kwa negheda ashi Jehova kuna kupititira shirughana shino. Pashihonenito, muNew Zealand monanyokwetu Paul kwa yuvhitire mumandi pametaha makura a wana mukadi umwe. Ngurangura oyo, mukadi ogho kwa rapelire kwaKarunga nakurughanita lidina Jehova. Ghuye kwa shungidire mundapero ashi umwe aya mu dingure. Paul kwa ghambashi: “Muruku rwavili ntatu, mpo na ka tikire pamundi wendi.”

Varura 1 Korinte 3:9, makura timwitirenu lipuro lino:

Weni vishorokwa yira shamuNew Zealand vyanegheda ashi Jehova ndje ana kuyendito shirughana shakuyuvhita?

Varura Virughana 1:8 makura timwitirenu lipuro lino:

Nke twa hepera mbatero yaJehova mukuyuvhita?

Maukenu nka ghamweya

Kehe shivike mulipongo lyamushivike, atwe kuwana lideuro omo tu yuvhita. Ntjeneshi wa kara mo mulipongo olyo, weni una kughayara ko kuhamena lideuro olyo?

6. Limburukwa mpangera yaKarunga yakuyuvhita

Paruvede rwaVakriste vakuhova, varwaniti kwa shanine kushayikita vakwami vaJesus mukuyuvhita. Vakriste ovo kwa popilire unankondo wavo wakuyuvhita ‘kughuto wavapangeli.’ (Filipi 1:7) Mbangi daJehova nado kurughana vyakukufana. a

Kengera VIDIYO.