Jesus kwa ghambire ashi liyoghero kuna kara shihepwa mukukara Mukriste. (Varura Matheus 28:19, 20.) Nke nani liyoghero? Ntani nke a hepa kurughana muntu a wane liyoghero?

1. Nke liyoghero?

Nkango “liyoghero” kwa tunda kunkango yaRugreka ya tantango ashi “kudivida” mumema. Opo Jesus va mu yoghire kwa mu dividire mumukuro waJordan makura a ‘yaghuka mumema.’ (Markus 1:9, 10) Mukukufana, Vakriste vaushiri navo kuvayogha pakuvadivida mumema.

2. Nke lya neghedanga liyoghero?

Pakuwana liyoghero, muntu kunegheda ashi a kutapa mwene kwaJehova Karunga. Weni muntu a kutapanga? Kumeho muntu a wane liyoghero, ghuye kutantera Jehova mundapero ashi ana shana kumurughanena naruntje. Uye kutwenyidira Jehova ashi ngamu karera tupu pantjendi nakutura mpango yendi muhovo muliparu lyendi. Ntani uye kutokora ‘kukudina mwene a kwame’ marongo nashihonenito shaJesus. (Matheus 16:24) Kukutapa nakuwana liyoghero kupa muntu mpito a ture po uholi waunene naJehova ntani vapuli vaunyendi.

3. Nke a hepa kurughana muntu a wane liyoghero?

Kumeho u wane liyoghero wa hepa tanko kukushonga kuhamena Jehova nakutunga po lipuro lyalinene mwendi. (Varura Heberi 11:6.) Momo lina kukuwederera liyivo nalipuro lyoye, nashihoro shoye kwaJehova nasho nka ngashi kura. Waro nka, ngau shana kutantera ko vapeke kuhamena Jehova nadimuragho dendi. (2 Timotheus 4:2; 1 Johannes 5:3) Ntjene muntu a tameke kuparuka “munkedi omo a shana Jehova mposhi a mu hafite nawa-nawa,” uye nga tokora kutapa liparu lyendi kwaKarunga nakuwana liyoghero.—Kolose 1:9, 10. a

 TEDA KO

4. Kuvhura tukushongere ko kuliyoghero lyaJesus

Varura Matheus 3:13-17 u yive vyavingi kuhamena liyoghero lyaJesus. Makura timwitirenu mapuro ghano:

• Jesus kwa mu yoghire ghuye mukeke ndi mwanuke?

• Weni omo va mu yoghire? Kwa mu telire mema ndi?

Jesus kwa tamekire kurughana shirughana a mu pire Karunga muruku rwakuwana liyoghero. Varura Lukas 3:21-23 ntani Johannes 6:38, makura timwitirenu lipuro lino:

• Muruku rwakuwana liyoghero, shirughana munke a tulire Jesus muhovo muliparu lyendi?

5. Liyoghero shitambo shakuvhura kutikitamo

Pakutanga kuvhura u kare nawoma wakukutapa nakuwana liyoghero. Mpiri ngoli, kuvhura u kutulire po ntambo dangandi dogoro ngau kuyuvhe ashi una shana kutura po litokoro olyo lyamulyo. Mukukenga vantu ovo va virughano, kengera VIDIYO.

Varura Johannes 17:3 ntani Jakobus 1:5, makura timwitirenu lipuro lino:

• Nke vi vatero muntu a wapere liyoghero?

1. Atwe kukutapa kwaJehova pakumutantera ashi tuna shana kumurughanena naruntje

2. Paliyoghero, atwe kunegheda kuvantu ashi twa kutapa kwaKarunga

 6. Pakutuyogha atwe kuyahama kulipata lyaJehova

Pakuwana liyoghero, atwe kuhama kulipata lyaudjuni nauntje. Mpiri ntundiliro detu dikushuve, lipuliro lyetu lyakufana ntani kukwama dimuragho dakukufana. Varura Pisalme 25:14 ntani 1 Petrus 2:17 makura timwitirenu lipuro lino:

• Weni liyoghero lya kundamanga likukwatakano lyamuntu naJehova ntani vakareli vendi?

 LIKAMO

Jesus kwa shongire ashi Vakriste va hepa kuwana liyoghero. Kumeho muntu a wane liyoghero, a hepa kutunga po lipuro lyalinene mwaJehova nakukwama dimuragho dendi ntani kukutapa mwene kwaJehova.

Livyukuruko

• Nke liyoghero, ntani morwanke lya karera mulyo?

• Weni kukutapa naliyoghero vya kukwatakana?

• Nke a hepa kurughana muntu kumeho a kutape nakuwana liyoghero?