SHIRONGWA 26

Nke pa karera udona naruhepo?

PLAY

Opo sha shorokanga shiponga vantu kukupura ashi: “Nke vina shorokere?” Kutuhafita pakuyiva ashi Bibeli ya tapa malimbururo ghakuvyukilira kulipuro olyo!

1. Weni Satana a yita udona muudjuni?

Satana Mudjonauli kwa rwanitire Karunga. Ghuye kwa shanine kupangera vaunyendi, mbyo a shongawire vantu va kuhova vaAdam naEva va kwatiteko urwaniti wendi. Satana kwa vi rughanine vino pa kukonga Eva. (Genesis 3:1-5) Ghuye kwa renkitire Eva a kuyuvhe ashi Jehova kwa mu horekera vininke vyaviwa. Satana kwa kongire ashi vantu ngava hafa unene nangeshi va pire kulimburukwa Karunga. Ghuye kwa kongire Eva pakumutantera ashi kapi nga fa. Mpo ngoli Bibeli ya twenyenanga Satana ashi ‘mukavimpempa ntani nka ndje sha vimpempa.’—Johannes 8:44.

2. Nke va tovolire kurughana Adam naEva?

Jehova kwa pire vininke vyavingi Adam naEva. Ghuye a va tantilire ashi kuvhura va lye kuvitondo navintje mushipata kughupa ko tupu shimwe. (Genesis 2:15-17) Ngoli vavo ava panga kulya kushitondo osho va va shwenekire. Eva “a potorako kunyango makura a li.” Muruku, Adam “naye a li.” (Genesis 3:6) Vavo kwa dinine Karunga. Morwa Adam naEva kwa tikilire mo, vya kalire ureru kwavo kurughana vyauhunga. Ngoli va dinine Karunga, a va djono muwina nakushwena upangeli wendi. Litokoro olyo kwa va yitilire ruhepo rwarunene.—Genesis 3:16-19.

3. Weni lya tu kundama litokoro lyaAdam naEva?

Opo Adam naEva va djonine, kapi va tikilire mo nka, makura ruvharo rwavo naruntje kwa pinga kupira kutikilira mo. Bibeli kwa ghamba kuhamena Adam ashi: ‘Ndjo kwa yire muudjuni mukonda yamuntu umwe tupu, ano ndjo kwa yita mfa.’—Roma 5:12.

Atwe kuhepa morwa konda dakukushuva-shuva. Pamaruvede ghamwe atwe kuhepa morwa matokoro ghanaumwetu ghamadona. Mpamwe, atwe kuhepa morwa matokora ghamadona va turanga po vapeke. Mpamwe nka, atwe kuhepa morwa kukara palivango opo shina shorokere shiponga.—Varura Muuditi 9:11.

TEDA KO

Konakona u yive ashi Karunga kapishi ndje a yito udona naruhepo muudjuni ntani omo a kuyuvhanga opo twa hepanga.

4. Ogho a tu yitiro ruhepo

Vantu vavangi kughayara ashi Karunga ndje a pangerango udjuni. Ushiri ndi? Kengera VIDIYO.

VIDIYO: Are ana kupangero udjuni? (1:24)

Varura Jakobus 1:13 ntani 1 Johannes 5:19, makura timwitirenu lipuro lino:

Udona naruhepo kwaKarunga vya tunda ndi?

5. Konakona ovyo wa yita upangeli waSatana

Kengera VIDIYO.

VIDIYO: Morwanke Karunga a pulitira udona naruhepo?—Karuha (3:07)

Varura Genesis 3:1-6, makura timwitirenu mapuro ghano:

Vimpempa munke a ghambire Satana?—Kenga velise 4 ntani 5.
Nkango munke a ghambire Satana da tambiro ashi Jehova kuhorekera vantu vininke vyaviwa?
Kukuwa nankango daSatana, vantu va hepa Jehova a va pangere mposhi va hafe ndi?

Varura Muuditi 8:9, makura timwitirenu lipuro lino:

Morwa Jehova kapishi ndje ana kupangero udjuni uno, vinke vya shoroko?

Adam naEva kwa tikilire mo ntani kwa kalire muParadisa. Ngoli vavo va teghelire kwaSatana nakurwanita Jehova
Muruku yaurwaniti, ndjo naruhepo namfa mpo vya yire muudjuni
Jehova ngaya ghupa po ndjo, ruhepo namfa. Vantu ngava yatikilira mo nka nakuyaparuka muParadisa

6. Jehova kumuguma ruhepo rwetu

Karunga kuvipakera shinka opo twa hepanga ndi? Konakona ovyo a tjangire Hompa David ntani mupostoli Petrus. Varura Pisalme 31:7 ntani 1 Petrus 5:7, makura timwitirenu lipuro lino:

Weni una kukuyuvha pakuyiva ashi Jehova kumona ntani a kara nashinka kuruhepo rwetu?

7. Karunga nga ghupa po ruhepo naruntje

Varura Jesaja 65:17 ntani Lishorwero 21:3, 4, makura timwitirenu lipuro lino:

Morwanke vi tu shengawidira pakuyiva ashi Jehova nga ya ghupapo vininke navintje vyavidona vana kupita vantu?

Maukenu nka ghamwe

Opo Satana a kongire pakutanga, ghuye kwa shwawire Jehova. Kutanta ashi, kwa nyatikire lidina lyaJehova ashi ghuye kapishi Mupangeli wamuwa washihoro. Opo Jehova nga ghupapo ruhepo, nga kenita lidina lyendi. Kutanta ashi, nga negheda ashi ndje mupangeli wamuwa po. Kukenita lidina lyaJehova kuna kara shininke shamulyo po ngudu kwa navintje.—Matheus 6:9, 10.

VAMWE KUGHAMBA ASHI: “Ruhepo kwaKarunga rwa tunda.”