SHIRONGWA 28
Tapa mpandu kwaJehova naJesus kovyo va ku rughanena
Weni wa kuyuvhanga ntjene muholi woye ana kupa ushwi wauwa? Tuna shihuguvara ashi ove kuhafa ngudu ntani kushana kutapa mpandu kwa muholi woye. Jehova naJesus kwa tu pa ushwi wamulyo ngudu kupitakana maushwi naghantje twa wana. Ushwi munke ogho ntani weni tu vhura kutapa mpandu yetu?
1. Nkedi munke yimwe tu tapa mpandu kovyo va tu rughanena Karunga naKristus?
MuBibeli kwa tu twenyidira ashi “kehe uno wakumupura [Jesus]” kuvhura kuparuka naruntje. (Johannes 3:16) Weni omo tu pura mwaJesus? Twa hepa kunegheda ashi twa pura mwaJesus kupitira mumatokoro ghetu ntani novyo twa rughananga. (Jakobus 2:17) Nange virughana vyetu novyo twa ghambanga kunegheda ashi twa pura mwaJesus atwe ngatu pameka uholi wetu naye naVashe Jehova.—Varura Johannes 14:21.
2. Shilika munke shakukukarera sha tu pango mpito tu tape mpandu kovyo va tu rughanena Jehova naJesus?
Matiku kumeho Jesus aka fe, uye a tantilire vakwami vendi nkedi yimwe omo va tapa mpandu kundjambo yendi. Ghuye kwa tulitire po shilika shakukukarera ya twenya Bibeli ashi “Murarero waHompa,” ndi osho sha yiviko ashi Livhuruko lyamfa daKristus. (1 Korinte 11:20) Jesus kwa tulire po shilika osho mposhi vapostoli vendi naVakriste navantje va vhuruke ashi a tu felilire. Kuhamena shilika osho, Jesus a tapire mpangera ashi: “Vi rughanangenu vino, mumvhurukirange po.” (Lukas 22:19) Pakukara po paMurarero, ove kutapa mpandu kushihoro shashinene osho va tu negheda Jehova naJesus.
TEDA KO
Konakona nkedi dimwe nka omo u tapa mpandu kushihoro shashinene va kara nasho kwetu Jehova naJesus. Kushonge u yive ovyo Livhuruko lyamfa daJesus lya karera mulyo.
3. Ovyo tu rughana mukunegheda rupandu
Turenke ashi ove kuna kuminangana mumema makura umwe a kuyaghura mo. Ngoli ngau vhurama ovyo ana kurughanene ogho muntu ndi? Ndi ngau shana-shana ndjira omo u mu pandura?
Atwe twa wana mpito yakukaparuka naruntje morwa nkenda yaJehova. Varura 1 Johannes 4:8-10, makura timwitirenu mapuro ghano:
-
Morwanke ndjambo yaJesus yina karere ushwi wakukukarera?
-
Weni una kukuyuvha kovyo va ku rughanena Jehova naJesus?
Weni tu tapa mpandu kovyo va tu rughanena Jehova naJesus? Varura 2 Korinte 5:15 ntani 1 Johannes 4:11; 5:3. Pakumana kuvarura kehe litjangwa, timwitirenu lipuro lino:
-
Kukuwa nalitjangwa, nke tu rughana mukutapa mpandu?
4. Temwinina Jesus
Nkedi yimwe nka omo tu tapa mpandu kuna kara pakutemwinina Jesus. Varura 1 Petrus 2:21, makura timwitirenu lipuro lino:
-
Weni omo u kwama nawa-nawa ntambo daJesus?
Jesus a holire Nkango daKarunga, kayuvhitanga mbudi yayiwa ntani kavateranga vantu
5. Kara palivhuruko lyamfa daKristus
Mukuyiva ovyo vya shorokiro paMurarero waHompa wakutanga, varura Lukas 22:14, 19, 20. Makura timwitirenu mapuro ghano:
-
Nke vya shorokiro paMurarero waHompa?
-
Nke vya fanikita mboroto navhinyu? —Kenga velise 19 ntani 20.
Jesus kwa shanine varongwa vendi va rughane Murarero waHompa rumwe mumwaka paliyuva da shorokire mfa dendi. Mbyo ngoli, Mbangi daJehova da pongera nga rumwe mumwaka va vhuruke mfa daKristus momo a vi rekilire. Mukuyiva ko vyavingi kuhamena lipongo lino lyamulyo, kengera VIDIYO. Makura timwitirenu lipuro lino.
-
Nke vya shorokango paMurarero waHompa?
Mboroto navhinyu kwa fanikita vintu. Mboroto kwa fanikita rutu rwaJesus rwa panyama rwa kutikiliramo oro a tapire a tu fere. Vhinyu kwa fanikita honde yendi
VAMWE KUGHAMBA ASHI: “Mukuwana liyovoro, wa hepa tupu kupura mwaJesus makura.”
-
Weni u vhura kurughanita Johannes 3:16 ntani Jakobus 2:17 u neghede muntu ashi vingi vya kwatero mo kupitakana tupu kupura?
LIKAMO
Atwe kutapa mpandu kwaJesus kovyo a tu rughanena pakupura mwendi nakukara po paLivhuruko lyamfa dendi.
Livyukuruko
-
Nke vya tanta kupura mwaJesus?
-
Weni una shana kutapa mpandu kovyo va ku rughanena Jehova naJesus?
-
Nke vya karera mulyo kukara po paLivhuruko lyamfa daKristus?
YIVAKO VYAVINGI
Nke mfa daJesus da tu tumangedanga tu rughane?
Kushonge u yive ko vyavingi kuhamena lipuro ntani nomo tu li negheda.
“Negheda lipuro mumatwenyidiro ghaJehova” (Ruhungu, Sikukutu 2016)
Varura shishorokwa eshi ashi, “Weno kukuyuvha ashi ame nimuntudjuni, nakene ntani nimukangure,” u kenge omo kukushonga kuhamena ndjambo yaKristus ya kundamine liparu lyamukadi umwe.
Konakona u yive ovyo vya karera ashi vasheshu tupu va lyango mboroto nakunwa vhinyu paLivhuruko lyamfa daJesus.
