SHIRONGWA 29

Nke vya shorokerango muntu pakufa?

PLAY

Wa kombanita rumwe muntu a kuyendo kumushima mumfa ndi? Paruvede oro rwatjutju ngudu, kuvhura u kupure ashi: ‘Nke vya shorokerango muntu pakufa? Ngatu va mona nka ovo twa kombanita mumfa ndi?’ Mushirongwa shino ntani shakukwama ko, ngatu konakona malimbururo ghamuBibeli ghakushengawida.

1. Nke vya shorokerango muntu pakufa?

Jesus kwa shetakanitire mfa kuturo twa tunene. Muntu ogho ana porokero muturo kapi a yiva ovyo vina kushoroko mumukunduruko wendi. Weni mfa dakufana naturo? Nangeshi muntu ana fu, kapi a yuvhanga tjutju. Waro nka, kapi a ruranga vaholi nalikoro lyendi mpiri a va holire ngudu. Bibeli kughamba ashi, “vafe kwato ovyo va yiva.”.—Varura Muuditi 9:5.

2. Uwa munke tu wanena mo pakuyivha ushiri kuhamena mfa?

Vantu vavangi kwa tjira mfa navafe! Enengoli ngau wana lishengawido kovyo ya ghamba Bibeli kuhamena mfa. Jesus kwa ghambire ashi: “Ushiri ngau mu yovora.” (Johannes 8:32) Maukareli ghamwe kushonga vininke vyapeke. Bibeli kapi ya ghamba ashi muntu a kara namonyo ogho wa twikirango kuparuka pakufa. Mpo ngoli ashi muntu ntjene ana fu kapi a hepanga nka. Ntani nka, morwa vafe kwato ovyo va yiva, kapi va vhura kutuhepeka. Kapishi hepero tu va tjire ndi tu va karere ndi ashi tu va raperere po.

Vantu vamwe kutanta ashi vavo kuvhura kughambaura navafe. Ngoli ovyo nakuvhurashi kushoroka. Tuna kushongo ashi vafe “kwato ovyo va yiva.” Ovo va ghayarango ashi kwa ghambauranga navafe, nani vavo kwa ghambauranga navandemone ndi mpepo dadidona odo da kupirurango di kare yira vantu ovo vafo. Kuyiva ushiri kuhamena vafe kutupopera kuvandemone. Jehova kuturondora ashi nakadidishi ashi tu sheteke kughambaura navafe morwa a yiva ashi shiponga ngudu kukukwatakana navandemone.—Varura Deuteronomi 18:10-12.

TEDA KO

Kushonge u yive vyavingi ovyo ya ghamba ko Bibeli kuhamena mfa ntani pameka lipuro lyoye mwaKarunga washihoro ogho a pirango kuhepeka ovo vafo.

3. Kushonge ushiri kuhamena ukaro wavafe

Muudjuni vantu kwa kara namapuliro ghakukushuva-shuva kuhamena ovyo vya shorokerango muntu pakufa. Enengoli, kapishi mapuliro naghantje ogho ushiri.

Nke va pura vantu mumukunda wenu kuhamena vafe?

Mukuyiva ovyo ya ghamba Bibeli, kengera VIDIYO.

VIDIYO: Vinke vyava shorokerango vafe?—Karuha (1:19)

Varura Muuditi 3:20, makura timwitirenu mapuro ghano:

Kukuwa navelise oyo, nke vya shorokango pakufa muntu?
Mpovili vya katwikirango kuparuka ndi?

MuBibeli kwa tu tantera mo kuhamena mfa daLasarus, muholi wamunene waJesus. Opo u varura Johannes 11:11-14, koneka ovyo a ghambire Jesus kuhamena ukaro waLasarus. Makura timwitirenu mapuro ghano:

Kunke a shetakanitire Jesus mfa?
Nke vina kutushonga ovyo kuhamena ukaro wavafe?
Weni una kulikenga lishongo lyaBibeli kuhamena mfa?

4. Ushiri kuhamena vafe kutuyitira uwa

Kuyiva ushiri kuhamena mfa kutuyovora muutjirwe wavafe. Varura Muuditi 9:10, makura timwitirenu lipuro lino:

Kuvhura vafe va tu rughane vyavidona ndi?

Ushiri wamuBibeli kutushutura mo nka mulipuliro lyavimpempa ashi vafe twa hepa kuvahafita ndi kuvakarera. Varura Jesaja 8:19 ntani Lishorwero 4:11, makura timwitirenu lipuro lino:

Weni una kughayara a kuyuvhanga Jehova kuhamena muntu ogho a karerango ndi a shanango mbatero kuvafe?

Kuyiva ushiri kuhamena mfa kutuyovora mo mumapuliro ogho a nyenga Jehova

5. Ushiri kuhamena mfa kutupa lishengawido

Vantu vavangi kwa va shonga ashi opo ngava fa, ngava ka hepa morwa ndjo odo va tura. Ngoli, kutupa lishengawido pakuyiva ashi ntjene muntu ana fu kapi a hepanga, mpiri ogho a tuliro ndjo dadinene. Varura Roma 6:7, makura timwitirenu lipuro lino:

MuBibeli tuna varura ashi muntu ntjene ana fu, kumanguruka mo mundjo dendi. Makura weni una kughayara, muntu ogho a fo kuna kuhepa morwa ndjo odo a tura ndi?

Momo tuna kukushonga tu yive nawa Jehova, ngatu ya nongonona nka ashi ghuye kapi a hepekanga vafe ndi ava tondore maundjoni ghavo. Varura Deuteronomi 32:4 ntani 1 Johannes 4:8, makura timwitirenu mapuro ghano:

Kuvhura Karunga a karo nankalito vana twenya muvelise odo a kwatiteko ashi va hepeke vantu vakufa ndi?
Weni una kughayara, ushiri kuhamena mfa kutapa lishengawido ndi? Morwanke?

VAMWE KUGHAMBA ASHI: “Na kara nawoma kuhamena ovyo nga vi ntjorokero opo ngani fa.”