Mfa kuguvita shiri ntani kuyita maruntjodi. Mbyo ngoli Bibeli ya twenyanga mfa ashi nkore. (1 Korinte 15:26) Mushirongwa 27, wakushongire ashi Jehova nga djonaghura po nkore oyo. Nke ngoli ngavi shorokero vantu ovo va fo? Mushirongwa shino, ngau kushonga vyavingi kuhamena litwenyidiro nka limwe lyaJehova ashi nga ka rambwita kuufe limumbunga lyavantu ngava hafere liparu naruntje! Uye ngaka va vhumbura! Shiri ngavi shoroka ovyo ndi? Ngava va rwambwita kuufe va parukire muliwiru ndi palivhu?

1. Nke Jehova ana shana kurughanena ovo twa kombanita mumfa?

Jehova ana shana kurambwita kuufe ovo va fo. Murume a kaliro nalipuliro walidina Joba a tulire lihuguvaro mwaKarunga ashi kapi nga mu vhurama opo nga fa. Ghuye kwa tantilire Karunga ashi: “Ngau ndjita, ame ngani kulimburura [kutundilira muntoko.]”—Varura Joba 14:13-15.

2. Weni tuna vi yiva ashi vafe ngava va vhumbura?

Jesus opo a kalire palivhu, Karunga a mu pire nkondo a vhumbure vantu. Uye a rambwitire kuufe mukadona wamwaka 12 ntani mona wamukafumu wamufitavya. (Markus 5:41, 42; Lukas 7:12-15) Lasarus muholi waJesus naye a dohorokire. Mpiri momo a kalire muntoko mayuva mane, Jesus a mu rambwitire kuufe. Muruku rwakuraperera kwaKarunga, Jesus kwa yiyilire kuntoko ashi: “Lasarus, rupuka mo!” Makura “mufe a rupuka mo” ghuye muyumi! (Johannes 11:43, 44) Ghayara tupu omo va hafire valikoro navaholi vaLasarus!

3. Lihuguvaro munke u kara nalyo kovo wakombanita mumfa?

Bibeli kwa twenyidira ashi: “Ngaku kara livhumbuko.” (Virughana 24:15) Ovo a rambwitire Jesus kuufe kapi va yendire muliwiru. (Johannes 3:13) Vavo va hafire opo va varambwitire kuufe palivhu. Waro nka, Jesus nga ka rambwita kuufe limumbunga lyavantu pano palivhu va ka hafere liparu naruntje. Ghuye kwa ghambire ashi “navantje ovo va karo mumbira” mpiri ovo va fo kare-kare, Karunga nga va vhuruka nakuvavhumbura.—Johannes 5:28, 29.

 TEDA KO

4. Jesus a neghedire ashi ghuye kuvhura kuvhumbura vafe

Kushonge u yive kuhamena ovyo a rughanenine Jesus muholi wendi Lasarus. Varura Johannes 11:14, 38-44, makura timwitirenu mapuro ghano:

• Weni tuna yiva ashi Lasarus shiri a dohorokire? —Kenga velise 39.

• Nangeshi Lasarus a yendire muliwiru, ghuna kughayara Jesus ndi a mu vyutire nka a ya paruke palivhu ndi?

Kengera VIDIYO.

5. Vangi ngava vhumbura!

Varura Pisalme 37:29, makura twimwitirenu lipuro lino:

• Kuni ngali tunga limumbunga lyavantu ngava vhumbura?

Jesus nga vhumbura vantu vavangi rambangako ovo ka va pirango kukarera Jehova. Varura Virughana 24:15, makura timwitirenu lipuro lino:

• Are una shana kukamona palivhumbuko?

• Weni lihuguvaro lyalivhumbuko lya tapa lishengawido nalihuguvaro kuvakondi vaPhelicity?

 LIKAMO

MuBibeli kwa twenyidira mo ashi limumbunga lyavantu va dohoroko ngava vhumbuka. Jehova ana shana nga va paruke nka ntani a pa Jesus nkondo dakuvavhumbura.

Livyukuruko

• Weni Jehova naJesus vana kukuyuvha kuhamena kurambwita vafe kuufe?

• Kuni ngali ka tunga limumbunga lyavantu olyo ngava ka vhumbura, muliwiru ndi palivhu? Nke una kughambera ngoli?

• Nke vina kukupo lihuguvaro ashi ovo wakombanita mumfa ngava ka vhumbuka?