SHIRONGWA 34

Weni tu negheda ashi twa mu hora Jehova?

PLAY

Kuna kukuyuvha ashi wa shuwenena Karunga pepi kutunda opo wa vareka kukushonga Bibeli ndi? Una shana kutwikira kunkondopeka uholi woye kumwe naye ndi? Vhuruka ashi, momo Jehova ana kumona shihoro shoye kwendi kuna kukuwederera, mo ngoli nka naye nga kuhora nakukupakera mbiri. Weni umu negheda ashi wa mu hora?

1. Weni tu negheda Jehova ashi twa mu hora?

Atwe kunegheda Jehova ashi twa mu hora pakumulimburukwa. (Varura 1 Johannes 5:3.) Ghuye kapi a tininikanga muntu ashi a mu limburukwe. Ngoli, ghuye ku tu pa mpito tu tovorore ntjeneshi tuna shana kumulimburukwa ndi hawe. Morwanke? Jehova ana shana tu mu limburukwe “kutundilira kumushima.” (Roma 6:17) Kutanta ashi, ana shana u mu limburukwe morwa wa mu hora kapishi kumutininiko. Ruha 3 ntani 4 mumbapira yino kwa gha wapaika mukukuvatera u neghede shihoro shoye kwaJehova pakurughana ovyo vyamuhafitango ntani u shwenene po ovyo a nyenga.

2. Morwanke vi karera udito kunegheda shihoro shetu kwaJehova?

“Muhungami kwa kara namaudito ghamangi.” (Pisalme 34:19) Natuvantje kukondja namapuko ghetu. Waro nka, kukugwanekera naudito waliparu, lirenkerero mo ntani maudito ghamweya nka. Ntjene kuna kupita mumaudito, kuvhura kukara udito kulimburukwa Jehova. Mbyovyoshi ureru kurughana udona. Enengoli ntjene au limburukwa Jehova, ove kunegheda ashi wa mu hora ngudu kupitakana navintje. Ntani ove kunegheda ashi wa kwaterera kwendi naulimburukwi. Ntani naye nga kwaterera koye. Ghuye kapi nga ku shuvilira.—Varura Pisalme 4:3.

TEDA KO

Kona-kona u yive ovyo ulimburukwi woye wa karera mulyo kwaJehova, ntani kushonge u yive ovyo vi kuvatero u kwaterere kwendi naulimburukwi.

3. Likutatano omo nove wa hamena

Kukuwa nambapira yaJoba muBibeli, Satana kapi tupu a rundilire Joba, ngoli nani vantu navantje ovo va shano kukarera Jehova. Varura Joba 1:1, 6–2:10, makura timwitirenu mapuro ghano:

Kukuwa naSatana, ashi morwanke Joba ka limburukwiranga Jehova? (Kenga Joba 1:9-11.)
Nke a ghamba Satana kuhamena vantu navantje, kukukwatera mo nove? (Kenga Joba 2:4.)

Varura Joba 27:5b, makura timwitirenu lipuro lino:

Weni Joba a neghedire ashi a hora ngudu Jehova?

Joba kwa neghedire shihoro shendi kwaJehova pakukwaterera kwendi

Natwe kunegheda Jehova ashi twa mu hora pakukwaterera kwendi

4. Hafita mushima waJehova

Varura Vishegho 27:11, makura timwitirenu mapuro ghano:

Weni a kuyuvhanga Jehova opo wa kara nga wandunge nakumulimburukwa? Morwanke?

5. Kuvhura kukwaterera kwaJehova

Shihoro shetu kwaJehova kututumangeda tu tantere ko vapeke kumuhamena. Atwe ngatu vi rughana mpiri vi kare udito mbyovyoshi twa kwaterera kwendi. Kengera VIDIYO, makura timwitirenu mapuro ghano.

VIDIYO: Popera lipuro lyoye mpiri mumarwanito (5:09)

Ove kukuditopera kutantera ko vapeke kuhamena Jehova ndi?
Muvidiyo, nke vya vateliro Grayson a funde po utjirwe?

Ureru kukwaterera kwaJehova ntjeneshi twa hora ovyo a hora ntani kwa nyenga ovyo a nyenga. Varura Pisalme 97:10, makura timwitirenu mapuro ghano:

Kukuwa novyo wakushonga, vininke munke vimwe a hora Jehova? Vininke munke a nyenga?
Weni u kushonga kuhora vyaviwa ntani kunyenga vyavidona?

6. Atwe kuwanena mo uwa pakulimburukwa Jehova

Kuna kara shininke shashiwa kehe pano kulimburukwa Jehova. Varura Jesaja 48:17, 18, makura timwitirenu mapuro ghano:

Ghuna kughayara kuvhura tu mu huguvare Jehova ashi ndje a yivo vyakutiyitira uwa ndi? Morwanke?
Dogoro mpopano, weni wa wanena mo uwa mulikushongo lyoye lyaBibeli ntani kuhamena Karunga washiri Jehova?

VAMWE KUGHAMBA ASHI: “Karunga kapi a pakeranga shinka ovyo narughananga.”