SHIRONGWA 35

Omo tu tura po matokoro ghamawa

PLAY

Natuvantje twa kara namatokoro ghakutura po. Shingi shamatokoro ogho kutukundama ngudu ntani likukwatakano lyetu naJehova. Pashihonenito, pamwe tuna hepa kutokora oko tu ka tunga, omo tu vhura kukurera ndi ntjeneshi kuvhura tu kware. Pakutura po matokoro ghamawa, ngatu hafa muliparu nakuhafita Jehova.

1. Weni u rughanita Bibeli mposhi u ture po matokoro ghamawa?

Kumeho u tokore, raperera kwaJehova a ku vatere ntani kona-kona Bibeli u kenge maghayaro ghendi kovyo una shana kurughana. (Varura Vishegho 2:3-6.) Mumaukaro ghamwe, Jehova a tapa veta yakuvyukilira muBibeli. Ntjeneshi atu limburukwa veta oyo, lyalyo ngali kara litokoro lyaliwa shiri kutura po.

Weni ngoli ntjeneshi mwato muBibeli veta yakuvyukilira yakuhamena ovyo tu vhura kurughana? Jehova shimpe nga ku pititira “mundjira oyo u vhura kuyenda.” (Jesaja 48:17) Yira weni? Pa kara mpango damuBibeli odo di vhuro kukupititira. Mpango damuBibeli kuna kara ushiri ogho wa shororo maghayaro namakuyuvho ghaKarunga. Pamaruvede ghamwe, opo twa varuranga shishorokwa shamuBibeli atwe kukushonga kuhamena omo Karunga a kenganga vininke. Ntjeneshi tuna nongonona makuyuvho ghaJehova, kuvhura ngatu ture po matokoro a kumuhafita.

2. Vinke tuna hepa yivilita kumeho yakutura po litokoro?

MuBibeli kwa ghamba ashi: “Muntu wandunge kukonakona kehe ntambo ana kuyenda.” (Vishegho 14:15) Kutanta ashi kumeho tu ture po litokoro, tuna hepa kughayadara ko ngudu kuhamena litokoro lyetu. Kumeho u tokore kupure ashi: ‘Mpango munke yamuBibeli yina wapero po pano? Litokoro munke li ndjitiro mpora yapamaghayaro? Weni litokoro lyande ngali kundama vapeke? Shamulyo po, litokoro lyande kulihafita Jehova ndi?’—Deuteronomium 32:29.

Jehova a kara nankondo dakututantera ashi vinipo vyaviwa ntani vyavidona. Ntjene atu yiva nawa veta ntani mpango damuBibeli nakutokomena kudikwama atwe ngatu tunga po liywi lyayiwa lyakumushima. Liywi lyakumushima kuna kara makuyuvho ghamunda ghakutuyivita vyauhunga ntani vyalipuko. (Roma 2:14, 15) Liywi lyakumushima va deura ngali tu vatera tu ture po matokoro ghamawa.

TEDA KO

Kona-kona omo mpango damuBibeli ntani liywi lyakumushima vya kara hepero pakutura po matokoro.

3. Pulitira Bibeli yi ku pititire

Weni mpango damuBibeli di tu pititira pakutura po matokoro? Kengera VIDIYO, makura timwitirenu mapuro ghano.

VIDIYO: Pulitira mpango damuBibeli di ku pititire (5:54)

Umanguruki munke a tu pa Jehova?
Morwanke Jehova a tu pera umanguruki wakutokora naumwetu?
Nke a tu pa vi tu vatero tu rughanite nawa umanguruki wetu wakutura po matokoro?

Pakumona shihonenito shampango yamuBibeli, varura Efesi 5:15, 16. Makura timwitirenu omo u vhura “kurughanita nawa ruvede roye” . . .

u varure Bibeli kehe liyuva
u kare mukwali ndi mukurona ndi mona wamuwa
u yende kumapongo

4. Deura liywi lyoye lyakumushima u ture matokoro ghamawa

Ureru kutura po litokoro lyaliwa ntjene pana kara veta yamuBibeli yakuvyukilira. Weni ngoli ntjene mwato veta yakuvyukilira? Kengera VIDIYO, makura timwitirenu lipuro lino.

VIDIYO: “Kara naliywi lyaliwa lyakumushima” (5:13)

Muvidiyo, vinke a rughanine monanyokwetukadi a deure liywi lyendi lyakumushima ntani a ture po litokoro lyakuhafita Jehova?

Morwanke tu pilira kupura vaunyetu va tu tokwere po? Varura Heberi 5:14, makura timwitirenu mapuro ghano:

Mpiri momo vya kara ureru kupura vapeke va tu tokwere po, ngoli nke tuna hepa kuyiva kuhangura naumwetu?
Mbatero munke ya karopo oyo yi kuvatero u tunge po liywi lyakumushima lyanamoye nakutura po matokoro ghamawa?

Yira karata liywi lyetu lyakumushima nalyo kutuvatera tu yive omo tu yenda muliparu

5. Fumadeka liywi lyakumushima lyavaunyoye

Vantu kutura po matokoro ghakukushuva. Weni tu fumadeka liywi lyakumushima lyavaunyetu? Kona-kona maukaro maviri:

Ukaro 1: Monanyokwetukadi ogho a horo kukupainda pakukutjuna kushipara a dirukire kumumbungakriste oko vanavanyokwetu kapi vya va hafitanga ntjene umwe a vi rughana.

Varura Roma 15:1 ntani 1 Korinte 10:23, 24, makura timwitirenu lipuro lino:

Nke u rughana ntjeneshi una kara namuntu ogho liywi lyendi lyakumushima lya shweneka kurughana shininke osho lyakupulitira liywi lyoye lyakumushima?

Ukaro 2: Monanyokweturume a yiva ashi Bibeli kapi ya shweneka kunwa marovhu nalishetakano, ngoli a tokoro kupira kunwa. A va muyita kushilika oko ana kumona vanavanyokwetu kuna kunwa marovhu.

Varura Muuditi 7:16 ntani Roma 14:1, 10, makura timwitirenu lipuro lino:

Weni u rughanita velise dino ntjene au kenge muntu kuna kurughana shininke osho lyakushweneka liywi lyoye lyakumushima?

Nke u rughana u ture po litokoro lyaliwa?

1. Shungida Jehova a kuvatere u yive ovyo u rughana.—Jakobus 1:5.

2. Rughana mapaparo muBibeli namuvimbapiratjangwa vyaBibeli u wane mpango damuBibeli odo u rughanita. Kuvhura nka u pure Vakriste ovo va karo nauyivi.

3. Ghayadara ko vitundwamo omo litokoro lyoye li kundama liywi lyoye lyakumushima ntani liywi lyakumushima lyavaunyoye.

VAMWE KUGHAMBA ASHI: “Wa kara nankondo dakutokoro kehe vino una shana kurughana. Nke ngoli u karera nashinka ovyo va ghamba vantu?”

Morwanke tu ghayadarera ko makuyuvho ghaKarunga ntani nka ghavaunyetu?

LIKAMO

Atwe kutura po matokoro ghamawa ntjeneshi atu konakona omo aku yuvhanga Jehova kuhamena shuma osho ntani ntjeneshi matokoro ghetu ngagha vatera ndi ngagha tjutjupita vapeke.