SHIRONGWA 37
Ovyo ya ghamba Bibeli kuhamena virughana ntani vimaliva
Wa kara rumwe nashinka shashinene kuhamena virughana ndi vimaliva? Kuvhura kukara udito kurughana tu pakere shinka vihepwa vyetu ntani nka tu karere Jehova momo a vi shanena. Bibeli ya tapa mapukururo ogho a vhuro kutuvatera.
1. Vinke ya ghamba ko Bibeli kuhamena virughana?
Karunga ana shana tu hafere virughana vyetu. Bibeli kwa tanta ashi “kwato nka vyakuyitira uwa muntu nkwandi . . kuhafera ovyo a rughanena ngudu.” (Muuditi 2:24) Jehova kurughana unene. Ntjene atu mu temwinine pakurughana unene, atwe kumuhafita ntani natwe kukuyuvha ruhafo.
Virughana mulyo. Ngoli twa sha tura virughana vyetu vi kare mulyo kupitakana ukareli wetu kwaJehova. (Johannes 6:27) Ghuye a tu twenyidira ashi ntjene atu mu tura muhovo muliparu, ghuye ngatu pa ovyo tuna hepa.
2. Weni tu kenga vimaliva munkedi yauhunga?
Mpiri momo Bibeli ya ghamba ashi “vimaliva kupopera,” ngoli ya rondora nka ashi vimaliva mpantjavyo nakutuyitirashi ruhafo. (Muuditi 7:12) Mbyo ya tu korangederanga ashi twa sha hora vimaliva, enengoli tu kare vina “tu gwanene po ovyo twa kara navyo.” (Varura Heberi 13:5.) Ntjene avi tu gwanene po ovyo twa weka, kapi ngatu kara nashinka shakushana-shana nka vyapeke. Kapi ngatu wera mumakongo. (Vishegho 22:7) Ntani ngatu shwenena po gambling ndi tu tjida-tjide ngeshefa dakukonga ashi ngatu ngawopa wangu.
3. Weni omo tu rughanita vimaliva vyetu twa hana ugu?
Jehova Karunga wautapi ntani atwe kumutweminina ‘pakukara nautapi, nakupako vaunyetu.’ (1 Timotheus 6:18) Kuvhura tu rughanite nawa vimaliva vyetu twa hana ugu pakutapa vitapa kumbungakriste ntani kuvatera ovyo vana kuhepo, shinene po vapuli vaunyetu. Jehova kapi a demenenanga ashi vingashi tuna kutapa, ngoli shitambo osho tuna ku tapera. Ntjene atu tapa kutundilira kumushima, atwe ngatu hafa ntani ngavi hafita Jehova.—Varura Virughana 20:35.
TEDA KO
Kenga mauwa gha kukara nalishetakano kuhamena virughana ntani kukara vina tu gwanene po ovyo twa weka.
4. Fumadeka Jehova kuvirughana vyoye
Likukwatakano lyetu naJehova lya hepa kukundama omo twa kenganga virughana vyetu. Kengera VIDIYO, makura timwitirenu mapuro ghano.
-
Muvidiyo, nke vina kuhafito kuhamena nkedi daJason ntani nkalito yendi kuvirughana?
-
Nke ana rughana a kare nalishetakano lyavirughana vyendi?
Varura Kolose 3:23, 24, makura timwitirenu lipuro lino:
-
Morwanke nkalito yetu kuvirughana ya karera mulyo?
Virughana mulyo. Ngoli twa sha pulitira virughana vi kare mulyo unene muliparu lyetu kupitakana ukareli wetu kwaJehova
5. Kukara vina tu gwanene po kutuyitira uwa
Vantu vavangi kwa hora va wane vimaliva vyavingi mpapa va hulira. Ngoli Bibeli kwa tapa lipukururo lya peke. Varura 1 Timotheus 6:6-8, makura timwitirenu lipuro lino:
-
Nke yina kutukorangeda Bibeli ovyo tu rughana?
Mpiri visheshu twa weka, kuvhura shimpe tu hafe. Kengera VIDIYO, makura timwitirenu lipuro lino.
-
Mpiri ngoli va kara navimaliva vyavisheshu, vinke vya yitirango mapata ghano ruhafo?
Weni ntjeneshi twa weka vyavingi ngoli shimpe tuna shana nka vimweya? Jesus a vi neghedire mushihonenito ovyo vya karera shiponga. Varura Lukas 12:15-21, makura timwitirenu lipuro lino:
-
Nke una kushongere ko kushihonenito shaJesus? —Kenga velise 15.
Varura nakushetakanita Vishegho 10:22 ntani 1 Timotheus 6:10. Makura timwitirenu mapuro ghano:
-
Weni una kughayara, vini vyamulyo po? Kukara muholi waJehova ndi kukara navimaliva vyavingi? Morwanke?
-
Udito munke wa kara po wakutjida-tjida vimaliva?
6. Jehova nga tu pa vihepwa vyetu
Udito wavirughana ntani vimaliva ngavi sheteka lipuro lyetu mwaJehova. Kengera VIDIYO tu yive ovyo tu rughana ntjeneshi muudito ogho tuna kara ntani timwitirenu mapuro ghano.
-
Maudito munke aku gwanekilire nagho monyanyokwetu muvidiyo?
-
Nke a rughanine mposhi vi mutompoke kupita mo muudito?
Varura Matheus 6:25-34, makura timwitirenu lipuro lino:
-
Vinke a twenyidira Jehova kurughanena ovo va muturango muhovo?
VAMWE KUGHAMBA ASHI: “Na hepa kurughana unene mposhi ni pakere mbili lipata lyande. Nakuvhurashi niyende kumapongo ghambungakriste kehe shivike.”
-
Litjangwa munke lina kukuhuguvalito ashi kutura ukareli woye kwaJehova muhovo ndyo litokoro lyaliwa kutura po kehe pano?
LIKAMO
Virughana ntani vimaliva mulyo ngoli kapishi vi tu donganite kukarera Jehova.
Livyukuruko
-
Vinke vi kuvatero u kare nalishetakano lyavirughana?
-
Weni vi kuvatera ntjene u kara vina kugwanene po?
-
Weni u vi negheda ashi wa huguvara litwenyidiro lyaJehova ashi nga pakera mbili vantu vendi?
YIVAKO VYAVINGI
Varura u yive ntjeneshi Bibeli kwa twenya vimaliva ashi shininke shashidona.
“Maliva ntundiliro yamaudona naghantje ndi?” (Shirongwa kuintanet)
Kushonge u yive nkalito yautapi ya hafitango Karunga.
“Nke ya ghamba ko Bibeli kuhamena kutapa?” (Shirongwa kuintanet)
Gambling kuna kara udano tupu wakupira shiponga ndi?
“Ovyo ya ghamba ko Bibeli kuhamena —Gambling” (Awake!, March 2015)
Varura u yive ovyo vya renkitiro murume kadanango gambling ntani wawidi a tjindje liparu lyendi.
“I Ame kwa holire unene marumbatano ghankambe” (The Watchtower, November 1, 2011)
