SHIRONGWA 38
Kara narupandu kuushwi waliparu
Vingi twa haferanga muliparu. Mpiri momo twa kugwanekeranga namaudito, shimpe mpovili twa haferanga muliparu. Weni tu negheda ashi twa kara narupandu kuushwi waliparu? Ntani konda munke yamulyo tu vi rughanena?
1. Nke tu karera narupandu kuliparu?
Tuna hepa kukara narupandu kuliparu mbyovyoshi wawo ushwi wakutunda kwaShetu washihoro Jehova. Uye ndje “ntundiliro yaliparu” kutanta ashi ndje a shito vininke navintje. (Pisalme 36:9) “Uye ndje a tapango liparu kuvantu namunku ntani navininke navintje.” (Virughana 17:25, 28) Jehova kutupa ovyo tuna hepa mposhi tu paruke. Ngoli shashinene po, uye kutupa vininke mposhi tu hafere liparu.—Varura Virughana 14:17.
2. Weni tu mu negheda Jehova ashi twa kara narupandu kuushwi waliparu?
Kutunda tupu opo wa kalire mulira, Jehova a kalire nashinka koye. Mulipititiro lyampepo yakupongoka, David kwa tantilire Karunga ashi: “Ove wa nkengire, ame shimpe nakuntjampuruka shi.” (Pisalme 139:16) Liparu lyoye mulyo ngudu kwaJehova. (Varura Matheus 10:29-31.) Nga vi mu tjutjupita ngudu ntjeneshi umwe a dipagha unyendi muwina ndi a kuponde. a (Exodus 20:13) Nga vi mu tjutjupita nka Jehova ntjeneshi atu tura liparu lyetu mushiponga ndi tu ture liparu lyavaunyetu mushiponga. Ntjeneshi a tu pakere mbili liparu lyetu nakufumadeka liparu lyavaunyetu, atwe kunegheda ashi twa kara narupandu kuushwi wauwa waliparu.
TEDA KO
Kona-kona nkedi dimwe omo u negheda rupandu kuushwi waliparu.
3. Kara nashinka naukanguki woye
Vakriste vakutapo kwaJehova kurughanita liparu lyavo nalintje mukumukarera. Vyavyo kwa fana yira kutapa marutu ghavo a kare ndjambo kwaKarunga. Varura Roma 12:1, 2, makura timwitirenu mapuro ghano:
-
Vinke vikutumangedo u pakere shinka ukanguki woye?
-
Munkedi munke dimwe u vi rughana?
4. Kandana po viponga vi yito urema ndi mfa
Bibeli kutukorangeda tu shwenene po kurughana vininke vyashiponga. Kengera VIDIYO u kushonge vininke vimwe u rughana mposhi u kukunge.
Varura Vishegho 22:3, makura timwitirenu omo ove ntani vapeke mukukunga . . .
-
mumundi.
-
kuvirughana.
-
pakudana maudano.
-
pakushinga ndi pakuronda mumauyendero.
5. Fumadeka liparu lyamukeke wamulira
Mumutango waDavid, uye kwa ghambire omo Jehova a kuturamo mwanavintje vya shorokerango mukeke nomo a kuranga mulira lyavawina. Varura Pisalme 139:13-17, makura timwitirenu lipuro lino:
-
Weni a vi kenganga Jehova, liparu lyamuntu kuvareka opo lyakwatekanga lira ndi palishampuruko?
Veta yaJehova kuVaisrael pa kare kwa popelire vanyokwa ntani vana vavo vamulira. Varura Exodus 21:22, 23, makura timwitirenu mapuro ghano:
-
Weni Jehova a kengire muntu ogho a dipaghiro mukeke wamulira mumponyo?
-
Weni ngoli a kuyuvha ntjeneshi umwe a virughanene muwina? b
-
Weni omo una kukuyuvha kuhamena omo a vi kenganga Jehova?
Mpiri mukadi ogho a mono ashi liparu mulyo kuvhura a kuyuvhe ashi kukughupa lira ndyo tupu litokoro lyendi lina karo po. Varura Jesaja 41:10, makura timwitirenu mapuro ghano:
-
Ntjeneshi mukadi kuna kukugwanekera namakondjito ashi a kughupe lira, kware a pura livatero? Morwanke?
VAMWE KUGHAMBA ASHI: “Mukadi a kara nankondo dakutokora ntjeneshi kwa kughupa lira mbyovyoshi rutu ne rwendi.”
-
Nke una vi pulire ashi Jehova kukenga liparu lyamukadi namonendi wamulira ashi mulyo ngudu?
LIKAMO
Bibeli kutushonga tu hore, tu fumadeke nakukunga ushwi waliparu a tu pa Jehova. Evi kwa kwateramo liparu lyetu neli lyavaunyetu.
Livyukuruko
-
Nke lya karera liparu lyamuntu mulyo ngudu kwaJehova?
-
Weni a kuyuvhanga Jehova ntjene umwe a dipagha unyendi muwina ndi a kuponde?
-
Nke wakarera narupandu kuushwi waliparu?
YIVAKO VYAVINGI
Weni tu pandura Jehova kuushwi waliparu?
Wana lilimbururo kulipuro ashi, Karunga nga ghupira po mukadi ogho a kughupo lira ndi?
“Nke yaghambako Bibeli kuhamena kukughupa lira?” (Shirongwa kuintanet)
Kushonge omo a kenganga Jehova liparu vi kundama omo u horowora vikuhafito vipiro kutura liparu lyoye mushiponga.
“‘Extreme Sports’—Should You Take the Risk?” (Awake!, October 8, 2000)
Weni ntjeneshi umwe ana shana a kuponde? Kona-kona omo Bibeli yi vhura kuvatera.
“Nashana kufa—Bibeli kuvhura yi mvhatere ntjene nashana kukuponda ndi?” (Shirongwa kuintanet)
a Jehova a kara nashinka shashinene kovo va dompo dimushima. (Pisalme 34:18) Uye kukwata lighano makuyuvho ghatjutju gharenkitango vantu va shane kukuponda ntani ana shana kuvavatera. Mukumona omo mbatero yendi yi vhura kuvatera umwe ana shano kukuponda, varura shirongwa ashi “Nashana kufa—Bibeli kuvhura yimvhatere ntjene nashana kukuponda ndi?” shina karo muruha “Yivako vyavingi” mushirongwa shino.
b Ovo va kughupo mara, kapishi vakuyuvhe undjoni waunene mbyovyoshi Jehova kuvhura kuvaghupira po. Kumaukenu ghamangi, varura shirongwa ashi “Nke yaghambako Bibeli kuhamena kukughupa lira?” shina karo muruha “Yivako vyavingi” mushirongwa shino.
