Natuvantje twa shana kutovorora omo tu dwata nomo tu moneka. Ntjene tu kwama mpango damuBibeli atwe ngatu dwata ovyo twa hora nakuhafita Jehova. Tu kona-konenu mpango dimwe odo.

1. Mpango munke di tu vatero tu tovorore nawa ovyo tu dwata nomo tu moneka?

Tuna hepa ‘kughayara ko nawa mposhi tu kuwapeke munkedi yalifumadeko nakudwata vyuma vyakuwapera’ ntani kukena kehe pano mposhi tu moneke kuvantu ashi atwe ‘kukarera Karunga.’ (1 Timotheus 2:9, 10) Kona-kona mpango dino ne: (1) Tuna hepa kudwata “munkedi yalifumadeko.” Yira momo wa vi monanga kumapongo ghambungakriste, vantu vaJehova kudwata munkedi dakukushuva-shuva, ngoli omo vadwatanga nakukuwapeka kudimutwe davo kunegheda ashi va fumadeka Jehova. (2) Kudwata “vyakuwapera” kutanta ashi, kapishi tu dwate vyuma vyakurambwita makuyuvho ghakukugwanekera panyama ghava vapeke ndi vi renkito vapeke va tu kengurure unene. (3) Atwe kunegheda ashi “kughayara ko nawa” pakupira kutambura kehe yino mode ya yango ya ndwatito ndi makuwapeko kumutwe. (4) Limoneko lyetu kehe pano lina hepa kunegheda ashi, atwe vantu twa “karerango Karunga,” ntani ashi atwe kukarera Karunga washiri.—1 Korinte 10:31.

2. Morwanke tu ghayadarera ko vanavanyokwetu kumeho tu tokore ovyo tu dwata?

Mpiri momo twa kara nalimanguruko lyakutovorora ovyo tuna shana kudwata, tuna hepa shimpe kughayadara ko omo vi kundama vapeke. Tuna hepa kukondja mpapa twa hulira tu pire kugarapita vapeke enengoli tu ‘kondjere uwa wavaunyetu mposhi tu va nkondopeke.’—Varura Roma 15:1, 2.

3. Weni omo twa monekanga vi koka vantu kuukareli waushiri?

Atwe kushetekera ko kehe pano kudwata munkedi yakuwapera enengoli kutakamita omo twa dwatanga opo twa yendanga kumapongo namuvirughana vyakuyuvhita. Kapi tuna shana limoneko lyetu li donganite vantu kumbudi tuna kuvayuvhitira. Enengoli tuna horo limoneko lyetu lirenkite vantu va shane kukushonga kuhamena Karunga twa kareranga ‘nakuwapeka lishongo lyaMuyovoli wetu.’—Titus 2:10.

 TEDA KO

4. Limoneko lyaliwa kunegheda ashi atwe twa fumadeka Jehova

Konda munke yamulyo tu yivilitira ashi atwe kuna kumoneka nawa? Varura Pisalme 47:2, makura timwitirenu mapuro ghano:

• Weni pakuyiva ashi atwe kwa karera po Jehova vi kundama omo twa dwatanga?

• Una kughayara vya kara hepero tu kare nashinka kuhamena omo twa monekanga kumapongo namuvirughana vyakuyuvhita ndi? Morwanke?

 5. Ovyo vi tu vatero mposhi tu tovorore nawa ovyo tu dwata nomo tu moneka

Kengera VIDIYO.

Vikareshi vyuma vyetu ndiro ndi mbiliha, vina hepa kukena nakuwapera kuvidwata oko tuna kara. Varura 1 Korinte 10:24 ntani 1 Timotheus 2:9, 10. Makura timwitirenu ovyo tu shwenena po kudwata vyuma . . .

• vyakukundjambaika ndi ghamamunene.

• vyakupata, kukengerera ndi walye vyakurambwita makuyuvho ghakukugwanekera panyama.

Vakriste kapi vana hepa kukwama Veta yaMoses, enengoli kuvhura va kushongere ko omo a ghayaranga Jehova. Varura Deuteronomi 22:5, makura timwitirenu lipuro lino:

• Morwanke tu shwenena po vyuma nalimoneko vyakurenkita murume a moneke yira mukadi ndi mukadi a moneke yira murume?

Varura 1 Korinte 10:32, 33 ntani 1 Johannes 2:15, 16, makura timwitirenu mapuro ghano:

• Morwanke tu karera nashinka ntjeneshi limoneko lyetu kugarapita vantu vamumukunda ndi vamumbungakriste?

• Ndwatito namakuwapeko munke a fumano mumukunda wenu?

• Una kughayara makuwapeko ogho ghamwe a wapera Mukriste ndi? Morwanke?

 LIKAMO

Litokoro lyaliwa kuhamena omo tu dwata nomo tu moneka kunegheda lifumadeko kwaJehova nakwavapeke.

Livyukuruko

• Morwanke ndwatito nomo twa kuwapekanga vya karera mulyo kwaJehova?

• Mpango munke damuBibeli di tu vatero tu ture po matokoro kuhamena ndwatito?

• Weni limoneko lyetu lya kundamanga omo vantu va monanga ukareli wetu?