Mulikushongo lino lyaBibeli, wakushonga vyavingi kuhamena Jehova. Vininke wakushonga vyakurenkita u mu hore ngudu mbyo walye wakutapa naumoye nakuwana liyoghero. Ntjeneshi kapi wakutapa nakuwana liyoghero, ove walye kuna kughayara kuvirughana ntantani. Ngoli kushweghenena pepi naJehova kapi vya shagheranga paliyoghero. Ngau twikira kushweghenena pepi naJehova naruntje. Munkedi munke?

1. Morwanke u twikilira kunkondopeka uholi woye naJehova?

Tuna hepa kurughana unene mposhi tu twikire kunkondopeka uholi wetu naJehova. Morwanke? “Mposhi ngatu pire kuyapuka mo mundjira” nakutunda ko kwendi. (Heberi 2:1) Vinke vi tu vatero tu twikire kukarera Jehova naulimburukwi? Pa kukuhameka mo unene mushirughana shakuyuvhita ntani nakushana-shana ndjira dapeke dakukarera Karunga mpopo twa hulira. (Varura Filipi 3:16.) Kukarera Jehova ntjo shininke shashiwa po unene muliparu!—Pisalme 84:10.

2. Vinke nka u twikira kurughana?

Nampiri ngoli lina kushagha likushongo lino lyaBibeli, liparu lyoye lyaUkriste shimpe kulitwikira. Bibeli kututantera ashi tuna hepa ‘kudwata muntu wamupe.’ (Efesi 4:23, 24) Pa kutwikira kukushonga Nkango daKarunga ntani nakuyenda kumapongo ghambungakriste, ngau kushonga vyavingi vyavipe kuhamena Jehova navikara vyendi. Shana nkedi dimwe omo u temwinina vikara vyendi muliparu lyoye. Twikira kutura po marunduruko una hepa muliparu lyoye mposhi u hafite Jehova.

3. Weni Jehova a kuvatera mposhi u nkondopeke uholi woye naye?

Bibeli kughamba ashi: “Karunga. . . nga mu deura nawa-nawa. Uye nga mu pameka nakumunkondopeka, ntani nakumutura palitateko lya koro.” (1 Petrus 5:10) Natuvantje ngatu kugwanekera namasheteko ghakurughana vyavidona. Ngoli Jehova nga tu pa ovyo tuna hepa mposhi ngatu kore mukughashwenena po. (Pisalme 139:23, 24) Uye a twenyidira mukukupa shihoro nankondo mposhi u mu karere naulimburukwi.—Varura Filipi 2:13.

 TEDA KO

4. Twikira kughambaura nakutegherera kwamuholi woye wamunene po

Kuraperera nakukushonga Bibeli vyakuvatera u kare muholi waJehova. Weni vininke ovyo viviri vi kuvatera shimpe u shweghenene pepi naJehova unene-nene?

Varura Pisalme 62:8, makura timwitirenu lipuro lino:

• Mukunkondopeka uholi woye naJehova, weni u wapukururura munkedi omo wa rapereranga?

Varura Pisalme 1:2, makura timwitirenu lipuro lino:

• Mukunkondopeka uholi woye naJehova, weni u wapukurura munkedi wa varuranga Bibeli?

Nke u rughana mposhi u wanene mo uwa mulikushongo lyanaumoye lyaBibeli? Mukuwana ko maghano, kengera VIDIYO, makura timwitirenu mapuro ghano.

• Pamaghano vana negheda muvidiyo, ghani una shana kurughanita?

• Virongwa munke una horo kukushonga?

 LIKAMO

Twikira kunkondopeka uholi woye naJehova ntani kutulire po vitambo vyapampepo. Pa kuvirughana ovyo, ove ngau hafera liparu weno ntani naruntje!

Livyukuruko

• Morwanke u vi pulira ashi Jehova nga ku vatera u mu karere naulimburukwi?

• Weni u nkondopeka uholi woye naJehova?

• Weni kukutulira po vitambo vyapampepo vi ku vatera u nkondopeke uholi woye naJehova?