Jesus ndje Mutwe waMbungakriste. (Efesi 5:23) Namuntji, kutundilira muliwiru, Jesus kuna kupititira vakareli vendi palivhu kupitira ‘mumupika wakulimburukwa nawandunge.’ (Varura Matheus 24:45.) Jesus mwene a tovororo “mupika” ogho nakumupa nkondo dakutura po matokoro gha ngandi ngoli shimpe ana hepa kulimburukwa Jesus nakurughanena vaghuni vendi. Are ogho mupika? Weni mupika a tu pakeranga mbiri?

1. Are “mupika wakulimburukwa nawandunge”?

Jehova kehe pano ka rughanitanga mukafumu ndi kambunga kavakafumu mukupititira vantu vendi. (Malakia 2:7; Heberi 1:1) Kunyima yamfa daJesus, vaapostoli ntani vakuronambunga muJerusalem mbo kava pititirango. (Virughana 15:2) Mukukufana nanamuntji, kambungaghona kavakuronambunga va twenyanga ashi Mbungayenditi yaMbangi daJehova kutapa ndya dapampepo nakupititira shirughana shakuyuvhita. Mbunga oyo kuna kara “mupika wakulimburukwa nawandunge ogho a tumbire [Jesus].” (Matheus 24:45a) Navantje vamumbungayenditi kuna kara Vakriste ava va waveka nampepo yakupongoka, ovo ngava kapangero kumwe naJesus muUhompa wendi wamuliwiru muruku rwamfa davo.

2. Ndya munke dapampepo a tapanga mupika wakulimburukwa?

Jesus kwa ghambire ashi mupika wakulimburukwa nga “pange [Vakriste vaunyendi] ndya paruvede rwado.” (Matheus 24:45b) Yira momo tupu ndya odo twa lyanga da vateranga marutu ghetu gha kare nankondo naukanguki, ndya dapampepo odo dina karoshi mavyukito ghamuNkango daKarunga kutupa nkondo odo tuna hepa mposhi tu limburukwe Jehova nakukutura mo mushirughana osho a tu pa Jesus. (1 Timotheus 4:6) Atwe kuwana ndya dapampepo kupitira mumapongo, muvigongi, muvimbapiratjangwa ntani muvidiyo, vyavyo kutuvatera tu yive ovyo Karunga ana shana tu rughane ntani nakunkondopeke uholi wetu kumwe naye.

 TEDA KO

3. Vantu vaJehova va hepa liwapaiko

Mulipititiro lyaJesus, Mbungayenditi kuyendita virughana vyaMbangi daJehova. Ndjenditito yakukufana ndjo nka yakaliro kuVakriste vakare. Kengera VIDIYO.

Varura 1 Korinte 14:33, 40, makura timwitirenu lipuro lino:

• Weni velise dino danegheda ashi Jehova ana horo Mbangi dendi va di yendite?

4. Mupika wakulimburukwa kuyendita virughana vyetu vyakuyuvhita

Kuyuvhita kuna kara shirughana shamulyo po ngudu kava rughananga Vakriste vakuhova. Varura Virughana 8:14, 25, makura timwitirenu mapuro ghano:

• Mushirugho shaVakriste vakuhova, are kayenditango shirughana shakuyuvhita?

• Nke va rughanine Petrus naJohannes opo va wanine mavyukito ghakutunda kuvaapostoli vaunyavo?

Kuyuvhita kuna kara shirughana shamulyo po ngudu ya yenditanga Mbungayenditi. Kengera VIDIYO.

 Jesus a neghedire omo kuyuvhita kwa kara namulyo. Varura Markus 13:10, makura timwitirenu mapuro ghano:

• Morwanke shirughana shakuyuvhita sha karera namulyo unene kuMbungayenditi?

• Morwanke twa hepera “mupika wakulimburukwa nawandunge” a pititire shirughana shakuyuvhita udjuni nauntje?

5. Mupika wakulimburukwa kutapa mavyukito

Mbungayenditi kutapa mavyukito kuVakriste udjuni nauntje. Weni omo ya tokoranga ashi mavyukito munke yi tapa? Kona-kona omo Mbungayenditi ya pashirugho shaVakriste vakuhova kava vi rughananga. Varura Virughana 15:1, 2, makura timwitirenu mapuro ghano:

• Mapiro kukuyuvha munke va kalire nagho Vakriste vakuhova?

• Kware va yendire Paulus, Barnabas navaunyavo mposhi va koshonone po udito ogho?

Varura Virughana 15:12-18, 23-29, makura timwitirenu lipuro lino:

• Kumeho yakutura po litokoro, vinke ya hepire kurughana Mbungayenditi yakuhova mukuwana mavyukito ghaKarunga kuudito ogho?—Kenga velise 12, 15 ntani 28.

Varura Virughana 15:30, 31 ntani 16:4, 5, makura timwitirenu mapuro ghano:

• Weni Vakriste vakuhova va tambulire mavyukito ghakutunda kuMbungayenditi?

• Weni Jehova a va tungikire morwa kwa limburukwire?

Varura 2 Timotheus 3:16 ntani Jakobus 1:5, makura timwitirenu lipuro lino:

• Kuni Mbungayenditi ya wananga mavyukito pakutura po matokoro namutji?

 LIKAMO

Mbungayenditi mbo “mupika wakulimburukwa nawandunge” a tovorora Kristus. Yayo kutapa mavyukito nandya dapampepo kuVakriste udjuni nauntje.

Livyukuruko

• Are a tovororo “mupika wakulimburukwa nawandunge”?

• Weni Mbungayenditi ya tu pakeranga mbiri?

• Nove wa vi pura ashi Mbungayenditi mbo “mupika wakulimburukwa nawandunge” ndi?