SHIRONGWA 4
Are Jesus Kristus?
1. Weni omo lya tamikire liparu lyaJesus?
Nkalito munke ya renkitiro Jesus a kare ureru kumushuwenena vantu?—MATHEUS 11:29; MARKUS 10:13-16.
Jesus kwa kalire muengeli muliwiru kughuto wakuyamushampuruka palivhu. (Johannes 8:23) Ndje a hovire kushita Karunga. Muruku Jesus a ya vatilire Karunga mulishito lyavininke navintje. Karunga kwa shitire Jesus papentjendi mbyo va mu twenyenanga ashi MonaKarunga “a huru.” (Johannes 1:14) Jesus kumutwenya nka ashi “Nkango,” morwa kwakalire mughambeli po waKarunga.—Varura Vishegho 8:22, 23, 30; Kolose 1:15, 16.
2. Nke Jesus a yelilire palivhu?
Karunga kwa tumine Monendi aye palivhu pakumutura mushira shamukadona wamuJuda Maria. Jesus kapi a kalire navashe vapanyama. (Lukas 1:30-35) Ghuye kwa yelilire palivhu (1) mukuyashonga vantu ushiri kuhamena Karunga, (2) mukuyatunegheda shihonena omo tumurughanena Karunga mpili mumaudito, ntani (3) mukuya tapa monyo wendi u kare shiyovolito.—Varura Matheus 20:28.
3. Nke twa hepera shiyovolito?
Shiyovolito kuna kara mfuto yakufutira muntu ana karo muukaro wamfa. (Ekxodus 21:29, 30) Karunga kapi a shanine ashi vantu vakurupe nakufa. Weni omo tuna viyiva ovyo? Karunga kwa tantilire muntu wakuhova, Adam ashi, ntjene a tura “ndjo” nga fa. Kutanta ashi ndi kapi a djonine ndi kapi gha fa. (Genesis 2:16, 17; 5:5) Kutwara muBibeli, mfa kwa diyititapo Adam. Ruvaro rwaAdam naruntje kwa pinga ndjo ano vitundwamo mfa. Mbyongoli twa hepera shiyovolito mu kutuyovora kumfa odo twa pinga kwaAdam.—Varura Varoma 5:12; 6:23.
Are a vhuliro kufuta ndjambo mukutuyovora kumfa? Opo twa fanga, atwe kufuta ndjo detu. Kwato muntu wakuvhura kufutira po vaunyendi ndjo davo.—Varura Pisalme 49:7-9.
4. Nke a felilire Jesus?
Jesus kapi a paka ndjo. Kapi a hepire kufa mukufuta ndjo dendi. Ngoli ghuye kwa felilire ndjo davantu. Karunga kwa neghedire shihoro shendi kwetu pakutuma Monendi mukuyatufera. Jesus naye kwa neghedire shihoro shendi kwetu pakulimburukwa vashe Karunga ntani nakutapa monyo wendi morwa ndjo detu.—Varura Johannes 3:16; Varoma 5:18, 19.
Kengera Vidiyo Nke a felilire Jesus?
5. Vinke ana kurughana weno Jesus?
Jesus opo a kalire palivhu, kaveruranga vaveli, kavhumburanga vafe nakuvatera vantu mumaudito ghavo. Shimpe waro, ngaka virughanena vantu vavalimburukwi kughuto. (Matheus 15:30, 31; Johannes 5:28) Muruku rwamfa daJesus, Karunga kwa mu vhumbulire a kare muengeli. (1 Petrus 3:18) Kutunda opo, Jesus mpo a katatilire kurulyo rwaKarunga dogoro poopo va mu pire nkondo dakupangera livhu nalintje. (Heberi 10:12, 13) Weno Jesus kuna kupangera muliwiru ntani vakwami vendi kuna kuyuvita mbudi yayiwa muudjuni mudima.—Varura Daniel 7:13, 14; Matheus 24:14.
Ntaantani Jesus nga ka ghupe po ruhepo novo varuyititango po. Navantje vapuro mwaJesus pakumulimburukwa ngava ka hafera liparu muparadisa palivhu. —Varura Pisalme 37:9-11.
