SHIRONGWA 2
Are Karunga?
1. Morwanke tu mu rughanenena Karunga?
Karunga waushiri, ndje a shito vininke navintje. Ghuye kwato litameko nauhura. (Pisalme 90:2) Ndje ntundiliro yambudi yayiwa yamuBibeli. (1 Timotheus 1:11) Pakumona ashi ndje a tu po liparu, vya wapa kumurughanena pentjendi ti.—Varura Lishorwero 4:11.
2. Weni a kara Karunga?
Kwato muntu ogho a mono Karunga morwa ghuye mpepo, liparu lyendi kapi lya kufana navishitwa vyapalivhu. (Johannes 1:18; 4:24) Ngoli, kuvhura tu mu yivire kuvininke ovyo a shita. Marudi ghanyango nadimucuko kunegheda shihoro naukonentu wendi. Unene waudjuni kutunegheda unankondo wendi.—Varura Varoma 1:20.
Kuvhura tu kushonge vyavingi kuhamena Karunga pakuvarura Bibeli. Pashihonena, Bibeli kututantera kuhamena ovyo a hora novyo a nyenga, nomo a tekuranga vantu ntani novyo a rughananga mumaukaro ghakukushuva-shuva.—Varura Pisalme 103:7-10.
3. Karunga a kara nalidina ndi?
Jesus kwa ghambire ashi: “Shetu wamuliwiru lidina lyoye lifumane.” (Matheus 6:9) Mpili ngoli a kara navitwenyidito vyavingi, ghuye kwa kara nalidina limwe. Kehe vano kulitwenya muliraka lyawo. MuRumanyo ne Jehova.—Varura Pisalme 83:18, NW.
Lidina Jehova va lighupa mo muBibeli dadingi mbyo vatura mo Hompa ndi Karunga. Opo va tjangire Bibeli, lidina Jehova kwa litjangire mo vikando 7 000. Opo Jesus kashonganga vantu, ka yivita nga lidina lyaKarunga.—Varura Johannes 17:26.
Kengera Vidiyo Are lidina lyaKarunga?
4. Jehova kutupakera shinka ndi?
Kuvhuka kwamaudito ngoli kutanta ashi Karunga kapi a kara nashinka kwetu ndi? Shingi shavantu kughamba ashi Karunga ndje a yititango po maudito mukutusheteka, ngoli ovyo kapishi ushiri.—Varura Jakobus 1:13.
Karunga kwa pa kehe ghuno limanguruko lyakutura po matokoro. Atwe kuhafera limanguruko olyo. (Josua 24:15) Shingi shavantu kurughana vaunyavo udona, mbyo runa vhukiri ruhepo. Vyavyo kuguvita Jehova.—Varura Genesis 6:5, 6.
Jehova Karunga kutupakera shinka. Ghuye ana shana tu hafere liparu. Ntaantani tupu nga ka ghupe po ruhepo novo varuyititango po. Ghuye a kara nakonda yayiwa ovyo a ru pulitilira. Mushishongwa 8, ngatu ka kushonga konda oyo.—Varura 2 Petrus 2:9; 3:7, 13.
5. Weni tu shuwenena Karunga pepi?
Jehova kuna kutuyita tu shuwenene pepi naye, mundapero. Ghuye kwa hora kehe uno. (Pisalme 65:2; 145:18) Ghuye a shana ku tu ghupira po. Mpili momo twa djonanga, ghuye kumona omo twa kondjanga mukumuhafita. Kuvhura tu hafere uholi naKarunga, mpili momo twa djonanga.—Varura Pisalme 103:12-14; Jakobus 4:8.
Pakumona ashi atu pa liparu, tuna hepa kumuhora ngudu kupitakana kehe uno. (Markus 12:30) Pakukushonga kuhamena Karunga ngau neyeda ashi wa mu hora ntani ngau shuwenena pepi naye.—Varura 1 Timotheus 2:4; 1 Johannes 5:3.