SHIRONGWA 10
Weni ghu dimburura ukareli waushiri?
1. Maukarelikarunga naghantje ushiri ndi?
“Konekangenu kuvaprofete vavimpempa.”—MATHEUS 7:15.
Jesus kwa shongire vakwami vendi ashi pa kara tupu ukarelikarunga umwe waushiri. Kwa u fanikita kundjira yakutwara kumonyo wanaruntje. Jesus kwa ghambire ashi: “Ovo va yi wanango ne vasheshu.” (Matheus 7:14) Karunga kutambura tupu ukareli ogho washongango ushiri wakutundilira muNkango dendi. Vakareli navantje vaushiri kwa kara nalipuliro limwe.—Varura Johannes 4:23, 24; 14:6; Efesi 4:4, 5.
Kengera Vidiyo Karunga kutambura maukarelikarunga naghantje ndi?
2. Vinke a ghambire Jesus kuhamena Vakriste vavipempa?
“Vavo kughamba ashi vayiva Karunga, ngoli kumukanana muvirughana vyavo.”—TITUS 1:16.
Jesus kwa ghambire ashi vaprofete vavipempa ngava pukita vantu. Vavo kumoneka yira vakareli vaushiri. Kwa pura nka ashi nkirishe davo daVakriste. Ngoli ureru kuvadimburura ashi kapishi Vakriste. Munkedi munke? Nkalito yavo kapi ya kufana neyi yaVakriste vaushiri.—Varura Matheus 7:13-23.
3. Weni omo ghu dimburura Vakriste vaushiri?
Konakona nkalito ntano dino:
-
Vakriste vaushiri kwa fumadeka Bibeli ashi Nkango daKarunga. Vavo kushetekera ko kuditikita mo. Vakriste vaushiri kapi va kwamanga maghano ghavantu. (Matheus 15:7-9) Vakriste vaushiri kuparuka kukuyenda novyo vashonganga.—Varura Johannes 17:17; 2 Timotheus 3:16, 17.
-
Vakwami vaJesus vaushiri kufumadeka lidina lyaKarunga, Jehova. Jesus kwa fumadekire lidina lyaKarunga pakulitantera vantu. Ghuye a vatilire vantu vayive Karunga nakuvashonga varaperere ashi lidina lyaKarunga lifumane. (Matheus 6:9) Mumukunda wenu, ukareli munke washongango vantu kuhamena lidina lyaKarunga?—Varura Johannes 17:26; Varoma 10:13, 14.
-
Vakriste vaushiri kushonga kuhamena Uhompa waKarunga. Karunga kwa tumine Jesus palivhu mukuyashonga vantu kuhamena mbudi yayiwa yaUhompa. Uhompa waKarunga ngo tupu ngau ya ghupo po maudito ghavantu. Jesus kwa shongire vantu kuhamena Uhompa ogho dogoro kumfa dendi. (Lukas 4:43; 8:1; 23:42, 43) Ghuye kwa ghambire ashi vakwami vendi ngava shonga vantu kuhamena Uhompa. Ntjene muntu gha kutantere kuhamena Uhompa waKarunga, kuukareli munke a hamena?—Varura Matheus 24:14.
-
Vakwami vaJesus kapishi vaudjuni uno waudona. Vavo kapi va kuhamitiranga mo muupolitika. (Johannes 17:16; 18:36) Ntani nka kapi va temwininanga nkalito ndi virughana vyavidona vyamuudjuni.—Varura Jakobus 4:4.
-
Vakriste vaushiri kwa kuhora ngudu. Vakushonga muNkango daKarunga omo vafumadeka kehe rudi. Nampili ngoli maukareli ghavipempa gha kwatitanga ko vita, Vakriste vaushiri kapi va vi kwatitanga ko. (Miga 4:1-3) Vakriste vaushiri kurughanita ruvede naviweka vyavo mukuvatera nakukorangeda vaunyavo.—Varura Johannes 13:34, 35; 1 Johannes 4:20.
4. Ghuna dimburura ukarelikarunga waushiri ndi?
Ukareli munke washongango vyamuNkango daKarunga nakufumadeka lidina lyendi ntani kushonga vantu ashi Uhompa waKarunga ngo tupu ngau ya ghupo po maudito ghavo? Ukareli munke wa karo nashihoro ntani kapi wa kuhamitiranga muvita? Weni omo ghuna kughayara?—Varura 1 Johannes 3:10-12.
