MuBibeli kwa kara mo mbudi yayiwa ashi vantu ngava ka paruka naruntje palivhu. (Pisalme 37:29) MuBibeli kwa kara mo mbapira 66. Karunga kwa rughanitire vakafumu vavalimburukwi 40 va tjange Bibeli. Mbapira ntano dakuhova kwa di tjangire Moses, hambara mwaka 3 500 da kapito. Mbapira yakuhulira kwa yitjangire mupostoli Johannes hambara mwaka 1 900 da kapito. Maghano ghare va tjangire muBibeli? Karunga kwa rughanitire mpepo yendi yakuponga, mukuyendita ovo vatjangiro Bibeli. (2 Samuel 23:2) Vavo kwa tjangire maghano ghaKarunga kapishi a vene. Mpongolishi Jehova ndje a yitito po Bibeli.​—Varura 2 Timotheus 3:16; 2 Petrus 1:20, 21.

Kengera Vidiyo Are gha tjango Bibeli?

Twa yiva ashi Bibeli kwatunda kwaKarunga morwa yayo kwa vyukilira kututantera vyakumeho. Kwato wakuvirughana vino. (Josua 23:14) Karunga Munankondo nadintje ndje tupu wakupumba meho yavantu.​—Varura Jesaja 42:9; 46:10.

Bibeli yakufanena pentjayo morwa kwatunda kwaKarunga. Bibeli kwa yi tapera mumaraka ghamangi. Nampili momu va yi tjangire pakare, yakuyenda shili naukonentu. Ntani vakafumu 40 ovo va yi tjangiro, kapi va tjangire vyakukulimba. Bibeli kunegheda shihoro shashinene shaKarunga ntani yakara shimpe nankondo dakuwapukurura liparu lyavantu. Maumbangi ghano naghantje kwa renkita vantu vavangi vapure ashi Bibeli shiri Nkango daKarunga.​—Varura 1 Tesalonika 2:13.

Bibeli kwa demenena kumbudi yayiwa ashi Karunga a kara nashitambo shashiwa kuvantu. Yayo ya tapa maukenu omo vantu vakombanitire paradisa nomo ngava ka yi vyutira po kumeho.​—Varura Lishorwero 21:4, 5.

MuNkango daKarunga kuwana mo veta namapukururo. Ntani kwa tjanga mo nka omo Karunga katekuranga vantu pakare, vishorokwa ovyo kunegheda nkalito yendi. Mpongoli Bibeli kuvhura yi ku vatere u yive Karunga. Yayo kufwaturura omo u vhura kukara muholi waKarunga.​—Varura Pisalme 19:7, 11; Jakobus 2:23; 4:8.

Mbapira yino ngayi ku vatera u kwate lighano Bibeli pakurughanita nkedi oyo karughanitanga Jesus. Ghuye katwenyanga Matjangwa nakughafwatwilira vantu “va gha yuvhe nawa.”​—Varura Lukas 24:27, 45.

Kwato nka vininke vyaviwa kupitakana Bibeli. Ngoli, vantu vamwe kapi vahora Bibeli. Ove ne wa shashayeka kukushonga. Mukukawana monyo wanaruntje nkwadi una hepa kuyiva Karunga.​—Varura Johannes 17:3.