Karunga kwa horowire lira lyaAbraham likare mbunga yendi nakuvapa dimuragho. Mbunga oyo kwa yi rukire ashi “Israel” ntani pantjayo tupu ka yi rughanenango Karunga waushiri. (Pisalme 147:19, 20) Marudi ghapeke gha vhulire nawo kuwanena mo uwa mumbunga yaIsrael.​—Varura Genesis 22:18.

Karunga kwa horowire Vaisrael va kare mbangi dendi. Ovyo vya va shorokiliro kwa negheda omu va vhura kuwana uwa vantu pakutikita mo dimuragho daKarunga. (Deuteronomi 4:6) Kupitira muVaisrael, marudi ghapeke gha vhulire kuyiva Karunga waushiri.​—Varura Jesaja 43:10, 12.

Muruku, mbunga yaVaisrael kapi kayi teghereranga kwaKarunga mpo a yi pinganitire po nambungakriste. (Matheus 21:43; 23:37, 38) Weno Vakriste vaushiri mbo vana karo Mbangi daJehova kapishi Vaisrael nka.​—Varura Virugana 15:14, 17.

Jesus kwa horowire vakwami vendi va yuvite nakutulita po vashongwa mumarudi naghantje. (Matheus 10:7, 11; 24:14; 28:19, 20) Shirughana osho shina kuwederere ngundu mumayuva ghetu. Jehova kwa horowora vantu mumarudi naghatje va hame kwendi. (Lishorwero 7:9, 10) Vakriste vaushiri kukukorangeda nakukuvatera. Mumapongero ghavo udjuni mudima, marongo ghavo ghakufana.​—Varura Heberi 10:24, 25.

Kuviha vyamwaka 1870 kambunga kavantu ovo kavakushongango Bibeli kwa papalire ushiri wamuBibeli. Vavo va yivire ashi Jesus kwa horowire mbungakriste yiyuvite, mpongoli vavalikire kuyuvita udjuni mudima. Mumwaka 1931 mpo va valikire kurughanita lidina Mbangi daJehova.​—Varura Virughana 1:8; 2:1, 4; 5:42.

Paruvede rwavapostoli, mbungayenditi ndjo ka yi yenditango mbungakriste mu lipititiro lyaJesus, Mutwe wambungakriste. (Virughana 16:4, 5) Namumayuva ghetu namo mushikwavo. Mbungayenditi ndjo yayenditango virughana vyamberewa daMbangi daJehova odo da torokango nakuvhukita vimbapiratjangwa nakuvituma mumaraka ghakupitakana pa 600. Mbungayenditi kutapa makorangedo namavyukito kumbungakriste dakupitakana pa 100 000 udjuni mudima kupitira muvimbapiratjangwa ovyo. Kehe mbungakriste kwa kara mo vakuronambunga ovo va yi pititirango. Vakafumu ovo kupakera mbili shiunda shaKarunga.​—Varura 1 Petrus 5:2, 3.

Mbangi daJehova kuyuvita mbudi yayiwa nakutulita po vashongwa. Yira vapostoli, natwe kuyenda mumandi tu ka yuvite. (Virughana 20:20) Atwe kushonga Bibeli vantu ovo vana shano kuyiva ushiri kuhamena Karunga. Mbangi daJehova kapishi mbunga tupu, ngoli vavo lipata limwe. Vavo kwa kuhora yira vantu namuunyendi. (2 Tesalonika 1:3) Mbunga yaJehova kwa kara naruhafo ngudu mbyovoshi vavo kuhafita Karunga nakuvatera vaunyavo.​—Varura Pisalme 33:12; Virughana 20:35.