Mushiti wetu ndunge ngudu kutupitakana. Guhye atu hora ana shana kutupakera mbili. Kapi atu shitire ashi tukupangere naghumwetu. (Jeremia 10:23) Yira moomu mwanuke a hepa dimuragho davakondi, natwe twa hepa dimuragho daKarunga. (Jesaja 48:17, 18) MuBibeli kwa kara mo dimuragho daKarunga.​—Varura 2 Timotheus 3:16.

Dimuragho daJehova kutushonga omo tu hafera weno liparu ntani ovyo turughana ngatu ka wane monyo wanaruntje. Morwa Karunga ndje atu shito, vya kara namulyo kutambura dimuragho dendi.​—Varura Pisalme 19:7, 11; Lishorwero 4:11.

Dimuragho dimwe damuBibeli kutunegheda ovyo ana shana Karunga tu rughane mumaukaro ghakukushuva-shuva. (Deuteronomi 22:8) Tuna hepa kurughanita nawa ndunge detu mposhi tuyive dimuragho damuBibeli edi tu vhura kurughanita muukaro wangandi. (Vishegho 2:10-12) Pashihonena, Bibeli kutushonga ashi liparu kwatunda kwaKarunga. Muragho ogho kutuvatera kuvirughana nakumundi ndi muruyendo. Kutuvatera nka tukutakamite nawa.​—Varura Virughana 17:28.

Jesus kwa twenyine dimuragho mbiri damulyo po. Muragho wakuhova kwa negheda shitambo eshi va tu shitira, tu yive Karunga nakumuhora nakumulimburukwa. Kumeho yakutura po matokoro muliparu lyetu, tuna hepa kughayadara kumurogho ogho.  (Vishegho 3:6) Vantu ovo vatikitango mo muragho ogho, vavo kukara vaholi vaKarunga ntani kuwana ruhafo muliparu, kumeho ngava ka wana monyo wanaruntje.​—Varura Matheus 22:36-38.

Muragho wauviri kutuvatera tu kare nambili navaunyetu. (1 Korinte 13:4-7) Mukutikita mo muragho ghuno kwakwatera mo kutemwinina Karunga omo a tekuranga vantu.​—Varura Matheus 7:12; 22:39, 40.

Dimuragho damuBibeli kuvatera vamulipata omu va vhura kukunegheda shihoro. (Kolose 3:12-14) Nkango daKarunga kuvatera nka mukafumu namukamali omo nkwara davo di karerera.​—Varura Genesis 2:24.

Kutikita mo dimuragho damuBibeli kutuvatera nka muliparu. Pashinonena, vahona kwa hora varughani ovo va tikitango mo dimuragho damuBibeli pakutanta ushiri nakurughana ngudu. (Vishegho 10:4, 26; Heberi 13:18) Nkango daKarunga kuturonga nka ashi vi tugwanene po ovyo twa kara navyo ntani ashi uholi wetu naKarunga mulyo unene kupitakana viweka.​—Varura Matheus 6:24, 25, 33; 1 Timotheus 6:8-10.

Kutikita mo dimuragho damuBibeli kutuvatera tu kare naukanguki wauwa. (Vishegho 14:30; 22:24, 25) Pashihonena, kutikita mo muragho waKarunga kuhamena unkorwi kutughamena kumauvera naviponga. (Vishegho 23:20) Jehova gha pulitira kumakera marovhu. (Pisalme 104:15; 1 Korinte 6:10) Dimuragho daKarunga mulyo morwa kutushonga tu shwenene po nkalito namaghayaro ghamadona. (Pisalme 119:97-100) Vakriste vaushiri kapi va tikitiranga mo dimuragho daKarunga mukonda yakuwanena mo mauwa mpentjako nani ngoli mukufumadeka Jehova.​—Varura Matheus 5:14-16.