Mumaukarelikarunga naghantje mwa kara vantu vavawa. Karunga ava yiva. Ngoli, maukarelikarunga ghamangi kurughana vininke vyavidona. (2 Korinte 4:3, 4; 11:13-15) Kukuyenda namarapoto ghambudi, maukarelikarunga ghamweya kukuhameka mughukorokotji, mumadipagho namuvita ntani kukwatera vanuke kunkondo. Ovyo kutjutjupita dimushima davo va horo kurughanena Karunga.​—Varura Matheus 24:3-5, 11, 12.

Ukarelikarunga waushiri kufumadeka Karunga ngoli wavimpempa kumushwaura. Maukarelikarunga ghavipempa kapi gha shonganga ushiri wamuBibeli kuhamena Karunga ntani vafe. Ngoli Jehova ana shana vantu va yive ushiri kumuhamena.​—Varura Muuditi 9:5, 10; 1 Timotheus 2:3-5.

Karunga gha yiva maukarelikarunga ogho gha kurenkitango ashi kumurughanena ngoli kwa hora udjuni waSatana. (Jakobus 4:4) Nkango daKarunga kutwenya maukarelikarunga naghantje ghavimpempa ashi ‘Babilon yayinene.’ Babilon shitata shakare omo watamekire ukarelikarunga wavimpempa muruku rwaRuhandjo mumayuva ghaNowa. Karunga ntaaantani nga ka ghupe po maukareli ogho ghapukitango nakuhepeka vantu.​—Varura Lishorwero 17:1, 2, 5, 16, 17; 18:8.

Jehova a yiva ovo va horo kumukarera ovo va karo mumaukarelikarunga ghavipempa udjuni mudima. Ghuye kuna kupongaika vantu ovo pakuvashonga ushiri.​—Varura Miga 4:2, 5.

Jehova kwa hora vantu ovo va horo ushiri nauwa. Ghuye kuna kuvarondora va tunde mo mumaukarelikarunga ghavipempa. Ovo va horo Karunga kuna kutura po marunduruko mposhi va mu hafite.​—Varura Lishorwero 18:4.

Pakare, vantu vavawa ovo va yuviro mbudi yayiwa kuvapostoli kwa yitambwire naruhafo. Jehova kwavashongire omu va paruka munaruwa nakukara nashitambo muliparu. Va tupa shihonena shashiwa, mbyovoshi vavo kwa tambwire mbudi yayiwa nakukutura mo ngundu mukurughanena Jehova.​—Varura 1 Tesalonika 1:8, 9; 2:13.

Jehova kutambura mulipata lyendi ovo va tundango muukareli wavipempa. Ntjene a ghu hama kwaJehova, ghuye nga kara muholi ghoye, ngau hamena kulipata lyendi lyava va mu karerango ntani ngau kawana monyo wanaruntje.​—Varura Markus 10:29, 30; 2 Korinte 6:17, 18.

Vantu ngava kahafa opo ngava kaghupa po maukarelikarunga ghavipempa. Vantu udjuni nauntje kapi ngava ka hepa nka. Kapi ngaku ka kara nka maukareli ghavimpempa ogho nga gha ka pukito vantu nakuvagaununa. Makura vantu navantje palivhu ngava ka rughanena Karunga umwe waushiri.​—Varura Lishorwero 18:20, 21; 21:3, 4.