Karunga kuna shana vantu navantje va raperere kwendi. (Pisalme 65:2) Kapi gha teghereranga ndi a tambure ndapero nadintje. Pashihonena, ntjene mukafumu kuhepeka mukamali wendi, Karunga nakutamburashi ndapero dendi. (1 Petrus 3:7) Opo Vaisraeli kava twikiranga kudjona, Karunga kapi ka tamburanga ndapero davo. Ndapero mulyo ngudu. Ntjene muntu wamudona a kushighura, Karunga kutambura ndapero dendi.​—Varura Jesaja 1:15; 55:7.

Kengera Vidiyo Karunga kutegherera ndaperero nadintje ndi?

Ndapero kuna kara ruha rwaukareli wetu, mpongolishi tuna hepa kuraperera tupu kwaJehova, Mushiti wetu. (Matheus 4:10; 6:9) Morwa atwe kudjona, tuna hepa kuraperera kupitira mulidina lyaJesus, morwa ndje a tu fero kundjo detu. (Johannes 14:6) Jehova kapi ana shana tuvyukuruke ndapero detu ndi tu di kwate mumutwe. Ghuye ana shana tu raperere kutundilira kumushima.​—Varura Matheus 6:7; Filipi 4:6, 7.

Mushiti wetu kuyuva ndapero damumushima. (1 Samuel 1:12, 13) Ghuye ana shana turaperere kehe ruvede, yira pakurambuka napakulya ntani ntjene tuna kara namaudito.​—Varura Pisalme 55:22; Matheus 15:36.

Kapishi ureru kutulita po uholi naKarunga mbyovyoshi atwe kwa tunga mukatji kavantu va diro kupura mwaKarunga ntani vavo kushentja matwenyedero ghendi kuhamena liparu lyaliwa palivhu. (2 Timotheus 3:1, 4; 2 Petrus 3:3,  13) Mbyongoli tuna hepere kukara kumwe navapuli vaghunyetu mposhi tukukorangede.​—Varura Heberi 10:24, 25.

Kukara kumwe navantu ovo va horo Karunga ngavi tuvatera tu ture po uholi naye. Mumapongero ghaMbangi daJehova vavo kukukorangeda-korangeda.​—Varura Varoma 1:11, 12.

Pakughayadara ko ngudu kovyo ghuna kukushonga muNkango dendi. Ghayadara ko ngudu kuruvirughana vyaKarurnga namapukururo ghendi ntani matwenyedero ghendi. Kuraperera nakuteda kutuvatera tukwate lighano shihoro shaKarunga naunongo wendi.​—Varura Josua 1:8; Pisalme 1:1-3.

Ntjene ghu huguvare mwaKarunga nakupura mwendi, ngau kara muholi wendi. Lipuro kuna kara yira shinamwenyo osho shina hepo ndya. Una hepa kupameka lipuro lyoye pakughayadara ko ngudu kovyo wakushonga kuhamena Karunga.​—Varura Matheus 4:4; Heberi 11:1, 6.

Jehova kupakera shinka ovo va mu horo. Ghuye kuvapopera kwa kehe vino vi djonaghuro lipuro nalihuguvaro lyavo lyamonyo wanaruntje. (Pisalme 91:1, 2, 7-10) Jehova kuturondora kuvininke ovyo vi vhuro kutuvelita nakutuyitira ruguvo. Jehova kutushonga omo tu vhura kuhafera liparu.​—Varura Pisalme 73:27, 28; Jakobus 4:4, 8.