Opo a katikire Jesus kuBetanie pepi naJerusalem, muholi wendi Lasarus kuna rara mayuva mane mumbira. Jesus mpo a yendire kumbira naMarta naMaria, vampandja vanakufa. Vantu kwa pongire. Ghayadara tupu ruhafo oro va kalire naro vaMarta naMaria opo Jesus a vhumbwire Lasarus kuufe.​—Varura Johannes 11:21-24, 38-44.

Marta a yivire kare mbudi yayiwa kuhamena vafe. Ghuye a yivire nawa-nawa ashi Jehova ngaka vhumbura vafe ngava paruke nka shimpe palivhu.​—Varura Job 14:14, 15.

Vantu kwa tunda kumbundu yalivhu. (Genesis 2:7; 3:19) Kwato shininke sha parukango opo a fa nga muntu. Ntjene muntu ana fu, uruvi namaghayaro ghendi kushayeka kurughana. Lasarus opo va mu vhumbwire kwato ovyo a timwitilire ko kuhamena mfa dendi morwa vafe kwato ovyo vayiva.​—Varura Pisalme 146:4; Muuditi 9:5, 6, 10.

Karunga kushora vafe mumundiro wanaruntje ndi? Bibeli kwa ghamba ashi vafe kwato ovyo vayiva, mpo ngoli mundiro wanaruntje kuna kara lirongo lyavimpempa lyakushwaukita Karunga. Ghuye kwanyenga vya kushora vantu mumundiro.​—Varura Jeremia 7:31.

Kengera Vidiyo Vinke vyava shorokerango vafe?

Vafe nakuvhurashi vatughambite ndi vatuyuve. (Pisalme 115:17) Ngoli, pakara vaengeli vavadona ovo vakutitunukango mushishwi shava vafo mposhi vaghambite vanamwenyo. (2 Petrus 2:4) Jehova a tu shweneka kushetekera ko kughambaghura navafe.​—Varura Deuteronomi 18:10, 11.

Shingi shavantu ovo vana karo mumbira ngava kava vhumbura kuufe pano palivhu. Novo kavarughanango vyavidona ngava va vhumbura morwa kapi va yivire Karunga.​—Varura Virughana 24:15.

Ovo ngava ka vhumbura ngava kavapa mpito yakukakushonga ushiri kuhamena Karunga ntani nakupura mwaJesus pakumulimburukwa. (Lishorwero 20:11-13) Ovo ngava ka vhumbura ntjene ngava ka rughana vyaviwa vavo ndi ngava kahafera liparu lyanaruntje palivhu.​—Varura Johannes 5:28, 29.

Vafe ngava ka vhumbuka morwa Karunga kwa tumine Monendi aya tu fere. Livhumbuko kutushonga kuhamena shihoro nankenda yaJehova. Palivhumbuko, are una shana kukamona?​—Varura Johannes 3:16; Varoma 6:23.