Jehova, Karunga waruhafo ana shana mapata gha kare naruhafo. Ndje a turo po nkwara. Kukwara paveta kuyita ruhafo mulipata mbyovoshi kuvatera mukurera nawa vanuke. Vakriste vana hepa kufumadeka veta dashirongo kuhamena nkwara.​—Varura Lukas 2:1, 4, 5.

Weni a kenganga Karunga nkwara? Kwa shana ashi nkwara di karerere po. Jehova kuna shana vakafumu navakamali vafumadeke nkwara davo. (Heberi 13:4) Ghuye kwa nyenga vantu vakutjora nkwara. (Malakia 2:16) Kushondera ndjo tupu konda gha pulitira Karunga Vakriste mukutjora po nkwara nakukwara nka.​—Varura Matheus 19:3-6, 9.

Jehova kwa shitire mukafumu namukamali varughanene kumwe. (Genesis 2:18) Mukafumu ndje mutwe walipata, ana hepa kupakera mbili lipata lyendi nakuvashonga kuhamena Karunga. Ntani ana hepa nka kuhora ngudu mukamali wendi. Mukafumu namukamali vana hepa kukuhora nakukufumadeka. Vavo kukudjonena, mbyongoli va hepera kukushonga kukughupira po maundjoni ghavo.​—Varura Efesi 4:31, 32; 5:22-25, 33; 1 Petrus 3:7.

Ntjene muna kara namaudito munkwara denu, muna hepa kushetekera ko kukunegheda shihoro. (1 Korinte 13:4, 5) Nkango daKarunga kapi da korangedanga ashi kukushwena  ndjo nkedi yayiwa mukukoshonona po maudito munkwara.​—Varura 1 Korinte 7:10-13.

Jehova kuna shana ashi mu hafe. Ghuye kutapa mapukururo ghamawa omo muvhura kuhafera unantjoka wenu. Jehova ana shana mu tegherere kumapukururo ghavakondi venu mposhi mu wanene mo mauwa. (Kolose 3:20) Jehova ana shana nka muwane ruhafo pakumurughanena naMonendi.​—Varura Muuditi 11:9–12:1; Matheus 19:13-15; 21:15, 16.

Muna hepa kurughana ngudu mposhi mu va pe mararo, ndya navyuma. (1 Timotheus 5:8) Ngoli shamulyo po, muna hepa kuvashonga va hore Karunga nakumutemwinina. (Efesi 6:4) Shihonena shenu shakuhora Karunga ngashi vatera vana venu. Ntjene a mu vapukurura kukuyenda naNkango daKarunga ngavi va vatera.​—Varura Deuteronomi 6:4-7; Vishegho 22:6.

Vanuke kuhafa ntjene a mu vakorangeda nakuvapandadeka. Vana hepa nka mavyukito namapukururo. Ntjene a mu virughana ovyo, ngavi va kunga kunkalito dadidona. (Vishegho 22:15) Kapishi kuvapishura nanyanya ndi naugara.​—Varura Kolose 3:21.

Mbangi daJehova da kara nambapira dakuvatera vakurona navanuke. Maghano ghamo kwatunda muBibeli.​—Varura Pisalme 19:7, 11.