Mumbapira yino kwa kara mo mapukururo ghamuBibeli ghamangi ogho a vhuro kukuvatera nalipata lyoye. Jehova ana shana ghu hafe. Ghuye kwa twenyidira ashi ntjene ngau ture muhovho ukareli wendi, ngaku pa ‘navintje’ una hepa. (Matheus 6:33) Jehova kuna shana ghu kare muholi wendi. Kuture mo unene ghu tulite po uholi naKarunga. Mfumwa yayinene kukara muholi wendi.—Matheus 22:37, 38.

VINKE YA GHAMBA KO BIBELI? ‘Ame ngani kara Shenu, anwe ngamu kara vana vande, ngoli ana kutanta Karunga.’ (2 Vakolinte 6:18) Karunga kuna shana ghu kare muholi wendi wamunene. Kuraperera kwendi ndjo nkedi yimwe ghu vhura kuvirughana. Jehova kuna kukutantera ashi: ‘Raperera kehe pano.’ (1 Vatesaronika 5:17) Ghuye ana kuwapayikire kutegherera kuvinka vyoye namaghano ghoye. (Vafilipi 4:6) Opo ghu raperera nalipata lyoye, vavo ngava dimburura ashi Karunga mulyo koye.

Kapishi kuraperera tupu kwaKarunga, ene ngoli una hepa nka kutegherera kwendi. Pakukushonga Nkango dendi navimbapiratjangwa vyaBibeli, ove kuna tegherera kwaKarunga. (Pisarome 1:1, 2) Ghayadara ko unene kovyo una kukushonga. (Pisarome 77:11, 12) Nkedi yimwe nka omo ghu vhura kutegherera kwaKarunga pakuyenda kehe pano kumapongo ghaShikriste.—Pisarome 122:1-4.

Pakutantere ko vapeke kuhamena Jehova kuna kara nka nkedi yimwe omo ghu pameka likukwatakano lyoye naye. Moomo ngau twikire kuvirughana ovyo mo nka ngali pama likukwatakano lyoye naKarunga.—Matheus 28:19, 20.

VINKE GHU RUGHANA?

• Kutulire po ruvede rwa kuvarura Bibeli nakuraperera kehe liyuva

• Lipata nalintje lina hepa kutura Jehova muhovho kupitakana kukuhafita

VINKE YA GHAMBA KO BIBELI? “Shwenenenu Karunga pepi naye gha mu shwenene pepi.” (Jakopo 4:8) Kutulirenu po ruvede rwa kurughana ukareli walipata kehe shivike. (Genesis 18:19) Ene ngoli, vingi vyahameno mo. Kehe vino mu rughana muna hepa kuvhuruka Karunga. Pameka likukwatakano lyalipata lyoye naKarunga pakutimwitira kumuhamena ‘ntjene mumundi muna kara ndi muruyendo ndi kuna kupwiyumuka ndi kuna kurughana.’ (Deuteronomium 6:6, 7) Kara nashitambo yira Joshuwa, ogho a ghambiro ashi: “Ame nalipata lyande ngatu karera Jehova.”—Josuwa 24:15, NW.

VINKE GHU RUGHANA?

• Pakukushonga nalipata lyoye rughanita virongwa ovyo vi vhuro kuvavatera