Lishampuruko lyamukeke kuyita ruhafo ntani shitumbukira shashinene. Nove namukwali ghoye ngamu dimburura ashi ruvede rwenu nankondo denu ngamu di rughanita mukurera mukeke. Kupira kurara nawa nashinka shamukeke kuvhura kuyita maudito munkwara denu. Nove namukwali ghoye muna hepa kutura po marunduruko mposhi mu rere mukeke nakupameka nkwara denu. Weni ghamu vatera mapukururo ghamuBibeli mu koshonone po maudito ogho?

VINKE YA GHAMBA KO BIBELI? “Shihoro kukudidimikira ntani mbili.” Ntani nka shihoro “kapi sha shananga uwa washene, ntani kapi sha kara naugara.” (1 Vakolinte 13:4, 5) Mugholikadi kuvhura ngau demenene kehe pano kupakera shinka mukeke. Ano nturaghumbo ghoye kuvhura nga kuyuvhe ashi una mu shuvilili, mpongoli wa sha kuvurama ashi naye ana kuhepa. Nalididimiko nambili mu neghede a kuyuvhe ashi una mu hepa ntani mu pulitire naye a ku vatere kupakera shinka mukeke.

Bibeli kughamba ashi: “Anwe vanturaghumbo, tekurenu vagholikadi venu nandunge.” (1 Peturusa 3:7) Kwata lighano ashi mukamali ghoye nga rughanita nkondo dendi a pakere shinka mukeke. Shitumbukira osho ngashi mu renkita a kuyuvhe liroroko naruguvo. Pamaruvede ghamwe, kuvhura a ku garapere, ngoli wa sha garapa morwa “kukara mudidimiki kwa pitakana kukara naunankondo.” (Yisewe 16:32) Mu kwate lighano nakumuvatera.—Yisewe 14:29.

VINKE GHU RUGHANA?

• Nturaghumbo: Vatera mukamali ghoye mukutakamita mukeke matiku. Sheshupita shirugho osho wa rughanitanga kuvininke vyapeke mposhi ghu kare kumwe namukamali ghoye namonoye

• Mugholikadi: Ntjene mukafumu ghoye ana shana kukuvatera namukeke, tambura mbatero yendi. Ntjene kapi ana kuvirughana omo vya wapera wa sha mu garapera ene ngoli mu neghede pambili

VINKE YA GHAMBA KO BIBELI? ‘Vavo rutu rumwe tupu.’ (Matheus 19:5) Nampiri mu kare namukeke muna hepa kuvhuruka ashi nove namukwali ghoye shimpe “rutu rumwe.” Rughanenu mpoopo mwa hulira mu pameke likukwatakano lyenu.

Vagholikadi, tamburenu mbatero oyo vana kutapa vanturaghumbo venu. Nkango denu dadiwa dampandu “kuverura.” (Yisewe 12:18) Vanturaghumbo, tanterenu vakamali venu ashi mwa va hora ntani vavo mulyo. Va pandayikenu kovyo vana kurughana mukupakera mbili lipata lyenu.—Yisewe 31:10, 28.

“Wa sha kondjera tupu uwa wanaghumoye ene ngoli kondjera nka uwa waghunyoye.” (1 Vakolinte 10:24) Rughanena kehe pano mukwali ghoye mauwa. Kutulirenu po shirugho shakutimwitira nakukupandayika nakukutegherera. Kuhamena likugwanekero panyama wa sha hokwa tupu omo una kukuyuva, ghayadara ko ghunyoye. Bibeli kughamba ashi: “Mwa sha kushwenayika-shwenayika, nkwandi muna vikuyuvhu.” (1 Vakolinte 7:3-5) Mpongoli, tantera ushiri mukwali ghoye omo una kukuyuva kuhamena likugwanekero panyama. Ntjene ghukudidimike nakukwata lighano mukwali ghoye ngavi pameka makukwatakano ghenu.

VINKE GHU RUGHANA?

• Kutulire po shirugho sha kukara kumwe namukwali ghoye

• Rughana vininke ovyo vi renkito mukwali ghoye a kuyuve ashi wa mu hora, yira kumutumina mbudi ndi kumughulira ushwi

VINKE YA GHAMBA KO BIBELI? “Kutunda wanuke ghoye wa yiva matjangwa ghakupongoka, mposhi ghu kare mukonentu.” (2 Timoteusa 3:15) Timwitirenu ovyo mu shonga monenu. Mukeke kuvhura kukushonga nampiri mushira ana kara. Ghuye kuvhura kuyuvha liywi lyoye nomo una kukuyuvha. Mu varwire nampili ghuye shimpe mukeke. Nampili gha dire kuvikwata lighano, ngavi ka mu vatera nga ka kare nashihoro shakuvarura apa nga ka kura.

Mukeke naye kuvhura gha kushonge kuhamena Karunga. Raperera naye kwaJehova. (Deuteronomium 11:19) Pakudanauka naye, mu shonge vininke ovyo gha shita Karunga. (Pisarome 78:3, 4) Moomo ana kukura, nga dimburura shihoro osho mwa kara nasho mwaJehova makura naye ngavi mu tumangeda a mu hore.

VINKE GHU RUGHANA?

• Shunginda Jehova a ku pe uyivi omo ghu shonga monoye

• Vyukuruka nkango namaghano ogho a vhura kukushonga monoye ghuye shimpe mukeke