Nampiri ghu shetekere ko kuwana ruhafo munkwara namulipata lyoye, lihudi kuvhura kushoroka olyo li kuyitiro ruguvho. (Muudisi 9:11) Karunga kutuvatera opo twa kugwanekeranga namaudito. Ntjene ngau tikite mo mapukururo ghamuBibeli, nove nalipata lyoye ngamu vhura kukudidimikira maudito ghamanene.

VINKE YA GHAMBA KO BIBELI? ‘Tapa vinka vyoye kwaKarunga, mbyovyoshi ghuye kukupakera shinka.’ (1 Peturusa 5:7) Yiva ashi Karunga kapishi ndje a yititango po maudito. (Jakopo 1:13) Ntjene ghu ture po likukwatakano naKarunga, ghuye nga ku vatera shiri. (Jesaya 41:10) Bibeli kughamba ashi: “Mu tanterenu maudito ghenu naghantje.”—Pisarome 62:8.

Bibeli kuvhura yi kushengawide ntjene ghu yi varure kehe liyuva. Ntjene ngau vi rughane, ngau dimburura ashi Jehova “kutushengawida mumaudito ghetu naghantje.” (2 Vakolinte 1:3, 4; Varoma 15:4) Ghuye a twenyidira ashi nga ku pa ‘mbili yendi, oyo ya pitakano ndunge nadintje.”—Varoma 4:6, 7, 13.

VINKE GHU RUGHANA?

• Raperera kwaJehova a ku vatere ghu ghayare nawa

• Ghayadara ko kumatokoro naghantje mposhi u toghorore po ndjira yayiwa

VINKE YA GHAMBA KO BIBELI? “Vantu vandunge kwa shana kukushonga.” (Yisewe 18:15) Wana maukenu naghantje. Yiva ovyo lina hepa lipata lyoye. Yoghera navo nakutegherera ovyo vana kughamba.—Yisewe 20:5.

Vinke ghu vhura kurughana ntjene una fita? Wa sha kara naghoma wakulira. Jesus naye a ‘lilire.’ (Johannes 11:35; Muudisi 3:4) Ntani mulyo unene kupwiyumuka ko nakurara. (Markus 6:31) Ovyo ngavi ku vatera ghu kudidimikire lihudi olyo lina shoroko.

VINKE GHU RUGHANA?

• Kara nankalito yakutimwitira kehe pano nalipata lyoye, makura ngavi ku rerupira kuyoghera navo opo ngali shoroka lihudi

• Yoghera navaghunyoye ovo va kugwanekero nalihudi lyakukufana

VINKE YA GHAMBA KO BIBELI? “Vantu namuholi wendi kwa kuhora, ano ntjene mumaudito vavo kukuvatera.” (Yisewe 17:17) Vaghunyoye kuvhura va shane kukuvatera, ene ngoli kapi va yiva ovyo va rughana. Wa sha kara naghoma kuvatantera ovyo una hepa. (Yisewe 12:25) Pura mbatero kovo va kara nauyivi waBibeli. Mapukururo ogho va kupa ghamuBibeli nga gha kuvatera.—Jakopo 5:14.

Ngau wana mbatero oyo una hepa ntjene ghu kare navantu ovo va karo nalipuro mwaKarunga ntani va huguvara mwendi. Ntjene gha ghushengawida vaghunyoye nove ngau wana lishengawido. Tantera ko vaghunyoye ovyo wa kushonga kuhamena Jehova namatwenyidiro ghendi. Kuture mo mukuvatera vapeke ntani wa sha kara ure nava va kuhoro nakukupakera mbili.—Yisewe 18:1; 1 Vakolinte 15:58.

VINKE GHU RUGHANA?

• Tantera ko muholi ghoye wamunene a ku vatere

• Mu tantere ushiri ghovyo una hepa