Jehova kwa tapa shitumbukira shakurera vanuke kuvakondi. (Vakorosi 3:20) Shitumbukira shoye mukondi shakushonga monoye a hore Jehova ntani opo nga kura naye nga kare mukondi wamuwa. (2 Timoteusa 1:5; 3:15) Una hepa kukwata lighano ovyo vya karo mumutjima wamonoye. Mulyo unene nove ghu ture po shihonena shashiwa. Pamuhovho Nkango daJehova dina hepa kukara mumutjima ghoye ntani ghu vhura kudishonga monoye.—Pisarome 40:8.

VINKE YA GHAMBA KO BIBELI? ‘Tegherera nawa, kughore kughamba.’ (Jakopo 1:19) Vana voye vana hepa kukuyuvha umanguruki wakughamba nove. Ntani vana hepa kukuyuva ashi kughuvategherera opo va shana kughamba nove. Ntjene mbili mo mumundi, vanuke ngava kara naghumanguruki wa kughamba nove. (Jakopo 3:18) Ntjene ove ukenya nakuvahataukira, vavo kapi ngava kumangurukira. Una hepa kukara muntu wa kukudidimikira ntani va neghede kehe pano ashi wa va hora.—Matheus 3:17; 1 Vakolinte 8:1.

VINKE GHU RUGHANA?

• Kutulire po shirugho shakutegherera kwavana voye

• Timwitira kehe pano navana voye, kapishi kutaterera dogoro pana shoroka udito

VINKE YA GHAMBA KO BIBELI? ‘Vantu vandunge kuhova tanko kughayara ntani vana kurughana.’ (Yisewe 13:16) Ntjene monoye kuna kughamba wa sha tegherera tupu nkango dendi ene ngoli kwata lighano makuyuvho ghendi. Pamaruvede ghamwe, vanuke kutjira kuvyukilira kughamba ovyo vana shana ndi vana tamba. Bibeli kughamba ashi: “Hova tanko kutegherera ntani ghu limburura. Ntjene kapi una kuvirughana ovyo, kughukuyitira lishwaghu.” (Yisewe 18: 13) Wa sha garapa wangu.—Yisewe 19:11.

VINKE GHU RUGHANA?

• Ntjene monoye kuna kughamba, wa sha mu kwata paliraka ndi ghu garape wangu

• Vhuruka omo kau kuyuvanga opo wa kalire nove mwanuke

VINKE YA GHAMBA KO BIBELI? “Monande tegherera ovyo vana kukutantera vasho navanyoko.” (Yisewe 1:8) Jehova kwa tapa shitumbukira shakurera vanuke kuvakondi. Muna hepa kushonga vana venu va mu fumadeke nakumulimburukwa. (Vaefeso 6:1-3) Vanuke kuvhura kuvidimburura ntjene vakondi vavo kapi va kuwanga ‘pamaghano.’ (1 Vakolinte 1:10) Mwa sha tangura kumeho yavana venu, morwa ngavi va renkita va dire kumufumadeka.

VINKE GHU RUGHANA?

• Tokorenu omo mu vhura kupishura vana venu

• Ntjene una kara nalighano lyapeke omo mu vhura kushonga vana venu, shetekera kutegherera kulighano lyamukwali ghoye

VINKE YA GHAMBA KO BIBELI? “Shonga monoye omo a vhura kukara.” (Yisewe 22:6) Ngavi ghupa shirugho mukushonga monoye a kare muntu wamuwa. Una hepa kuyiva ovyo ghumu shonga nomo ghumupishura. (Pisarome 127:4; Yisewe 29:17) Kupishura kapi kwa hamena mo tupu kutengeka mwanuke, ene ngoli una hepa kumuvatera a kwate lighano konda daveta odo wa tura po. (Yisewe 28:7) Una hepa kumushonga nka a hore Nkango daJehova ntani gha kwate lighano mapukururo ghendi. (Pisarome 1:2) Ovyo ngavi vatera mwanuke gha ture po matokoro ghamawa.—Vahebeli 5:14.

VINKE GHU RUGHANA?

• Vatera vana voye va yive ashi Karunga muntu ogho va vhura kuhuguvara

• Vavatere va dimburure nakushwenena po nkalito dadidona yira odo da karo kuIntaneta. Va shonge va yive ovyo va rughana ntjeneshi muntu kuna kuvashongaura va kare kumwe panyama