Adamu naEva kwa yitire vana, makura vantu ava vhuka palivhu. Muruku, vaengeli vamweya ava ya kupakerere kwaSatana.

Vavo kwa yire palivhu nakughupa marutu ghapashintu mpo va vhulire kukwara vakadi. Makura vakadi ovo ava shampuruka vanuke vanyanya nankondo ngudu kupitakana davantu.

Undjuni mpo wa vhukire navantu kava ruwanango vininke vyavidona. Bibili kutanta ashi: ‘Udona wavantu kwa vhukire napantje, vavo nka vyavidona mpentjavyo kava ghayaranga.’

Nowa kwa kalire muntu wamuwa. Jehova kwa tantilire Nowa ashi ghuye nga ya djonaghura po vantu vavadona narukuruhandjo.

Karunga kwa tantilire nka Nowa ashi a tunge limuwato lyalinene, nga pereke mo lipata lyendi navikorama vyakukushuva-shuva.

Nowa a rondwilire vantu kuhamena rukuruhandjo, vavo kapi va teghelilire. Vamwe kava mu shepanga, vamwe va mu nyengire.

Opo wa pwire kutunga wato, Nowa a pereke mo vikorama.