Ukorokotji ngau shagha po ndi?
Ntjene ukorokotji una shoroka, kukurenkita u kupure ashi: ‘Karunga a kara nashinka ndi? Nke wa shorokeranga ukorokotji? Ukorokotji * ngau shagha po ndi? Weni ni paruka nouno woma nakara nawo?’ Bibeli ya tapa malimbururo ghamawa kumapuro ghano.
Weni Karunga a kuyuvhanga kuhamena ukorokotji?
Karunga a nyenga nyanya naukorokotji. (Pisalme 11:5; Vishegho 6:16, 17) Jesus, mukareli po waKarunga, naye a kavire varongwa vendi opo va shanine kurughanita nyanya. (Matheus 26:50-52) Mpili momo vamwe va ghambanga ashi vavo kurughanita nyanya mulidina lyaKarunga, uye mwene kapi a va rawiranga ashi va vi rughane. Uye nka kapi a teghereranga ndapero davo.—Jesaja 1:15.
Karunga a kara nashinka kovo vahepango kukwateramo ovo wa kundamanga ukorokotji. (Pisalme 31:7; 1 Petrus 5:7) Bibeli ya negheda ashi Karunga nga shaghikitapo nyanya naukorokotji.—Jesaja 60:18.
Ntundiliro yaukorokotji
Bibeli ya negheda ntundiliro yaukorokotji: “Vantu vankondo kuyitira kukora vaunyavo.” (Muuditi 8:9) Mwayendo mwaka, vapangeli kwa rughanita nkondo davo mukuhepeka nakupangera vapeke. Ovo va hepekanga, kurughanita ngoli ukorokotji va rwanite lipangero.—Muuditi 7:7.
Lishaghero lyaukorokotji
Karunga a twenyidira kukashaghikita po utjirwe nanyanya nakukatulita po mbili palivhu. (Jesaja 32:18; Miga 4:3, 4) Uye:
Nga ghupa po ntundiliro yaukorokotji. Karunga nga ghupa po mapangero ghavantu nakupinganitira po lipangero lyendi udjuni nauntje. Jesus Kristus, Mupangeli waupangeli waKarunga nga tekura navantje kushetakana ntani nga ghupapo ukorokotji nanyanya. (Pisalme 72:2, 14) Pashirugho osho kwato nga karughanito ukorokotji. Vantu “nga va kahafera mbili yayinene.”—Pisalme 37:10, 11.
Nga ghupa po vitundwamo vyaukorokotji. Karunga nga verura vantu kuvitundwamo vyaukorokotji vikareshi vya va remeka ndi kwa va yuvhita tjutju kumushima. (Jesaja 65:17; Lishorwero 21:3, 4) Uye kwa twenyidira nka kukavhumbura vafe palivhu opo ngapa karo mbili.—Johannes 5:28, 29.
Bibeli ya tapa konda dadiwa ovyo tu pulira ashi Karunga ntantani a ka vi rughane. Enengoli kuvhura u kupure ashi: ‘Morwanke Karunga a pilira kushaghikita po ukorokotji kare?’ Mukuwana lilimbururo, kengera vidiyo, Morwanke Karunga a pulitira udona naruhepo?
^ “Ukorokotji” kuna kara shirughana shanyanya shakurenkita vantu va kare nautjirwe mposhi va yititepo lipangero ndi ukarelikarunga ndi lirunduruko lyangandi mumparukito yavantu. Ngoli vantu vamwe kuvhura va kananite ashi virughana vimwe va rughananga kapishi ukorokotji.