VANGARARA!
Nyanya yakutukukita yakukuroyanga yina kushoroko udjuni nauntje—Nke yaghamba ko Bibeli?
MuJuly 2022, virughana vyakutukukita vyakukuroyanga kwa shorokire udjuni nauntje:
“Lidipayo lyamunapolitika a yiviko unene muJapan [Prime Minister wakare Shinzo Abe] kwa tjilitire shirongo ntani kwa tukukitire udjuni nauntje pakumona ashi Japan kwa kara namarapoto gha nyanya ghamasheshu ntani naveta yankondo kuhamena mauta.”—10 July 2022, The Japan Times.
“Vantu vamuDenmark kwa tukukire opo murume umwe a dipayire pakuroya vantu vatatu mushopping mall yaCopenhagen.”—4 July 2022, Reuters.
“South Africa: Vantu 15 kwa fire opo varume vamwe va valikire kuroya vantu mubawa yamuSoweto.”—10 July 2022, The Guardian.
“Vantu vakupitakana pa220 kwa va dipayire pakuvaroya muU.S mushikondovike shalipwiyumuko sha4 July.”—5 July 2022, CBS News.
Pa kara lihuguvaro ashi nyanya yakufana ngoli ngayi shagha po ndi? Nke yaghamba ko Bibeli?
Lishayero lyanyanya
Bibeli yatwenya ruvede tuna kuparuka ashi, “mayuva ghauhura.” Rwaro kuna kara ruvede oro vantu ngava kara naukenya waunene ntani nyanya yakufa nakukenga. (2 Timotheus 3:1, 3) Nyanya yakufana ngoli kurenkita vantu va paruke nawoma. (Lukas 21:11) Mpili ngoli, Bibeli yatwenyidira ashi nyanya ngayi shagha po ntani “vantu kapi ngava kara nashinka ntani mandi ghavo ngagha kara mumpora namulighameno.” (Jesaja 32:18) Weni ngayi shagha po nyanya?
Karunga nga ghupa po vantu vavadona nakuhanaurapo virwito.
“Vanandjo, ngava va duramo yira momo vaduranga vimeno mulivhu.”—Vishegho 2:22.
“[Karunga] nga shayikita vita muudjuni nauntje. Nga tjoraura mauta nakuhanaurapo po maghonga ntani turukara twa vita nga tushora namundiro .”—Pisalme 46:9.
Karunga nga shayikita po virughana navintje vyanyanya pakushonga vantu omo va paruka mumpora.
“Kapi nga kukara vyakuremeka ndi vyavidona kundundu yande yakupongoka, mbyovyoshi livhu ngali yura liyivo lya Jehova yira momo mema ghayura mulifuta.”—Jesaja 11:9.
Mpiri weno, Karunga kuna kushonga vantu va shwenene po nyanya nakupira kurughanita virwito, ashi ndi va “shambure marufuro ghavo ghakare vipururo ntani maghonga ghagho ghakare matemo.”—Miga 4:3.
Ntjene una shana kuyiva ovyo ya twenyidira Bibeli kuhamena udjuni wampora varura shirongwa ashi, “Freedom From Fear—Is It Possible”
Ntjene una shana kuyiva kuhamena likoshonono po lyanyanya lyanaruntje, varura shirongwa ashi, “Peace on Earth at Last!”