Muruvindwira rwa 24 February 2022, Russia kwa homokire na vita Ukraine mpili momo vampititi vavirongo vya peke vashetekera kukandanapo vita vino. Weni vita vino vya kundama udjuni? Secretary-general waUnited Nations, António Guterres kwa ghambire mayuvha ana kapito ashi: “Mukosho wavininke, ruhepo, ovyo vya hanauko ndi va djonaura, nawoma muEurope naudjuni naunjte kwa yeruka unene kupitakanena.”

•   Jesus kwa pumbire kuhamena ruvede opo “dimuhoko ngadi kurwanita-rwanita ntani virongo navyo ngavi kurwanita-rwanita.” (Matheus 24:7) Varura shirongwa ashi, “Vinke ‘Viyivito vya Mayuva ghaUhura’?” u mone omo Bibeli yanegheda ashi vita vyamumayuva ghetu kuna kutikita mo uporofete waJesus.

•   Mbapira yaBibeli yaLishorwero kwa fanekita vita kwa murondi wa nkambe ana rondo “nkambe yayigeha yira mundiro” ogho “a ghupo mbili palivhu.” (Lishorwero 6:4) Varura shirongwa ashi, “Vare varondi va nkambe vane?” u mone omo uporofete uno wa tamba kuvita vina kushoroko namuntji.

•   Mbapira yaDaniel kwa pumba kuhamena unkore pakatji ka “hompa wakumboghera” ntani “hompa wakuucuma.” (Daniel 11:25-45) Kengera vidiyo ashi, Uporofete watiko mo—Daniel Ligaununo 11 u yive ovyo Russia novo vamukwatitango ko vakarera shi mbo hompa wakumboghera. *

•   Mbapira yaLishorwero ya twenya kuhamena “vita ovyo ngavi shoroko muliyuva lyalinene lyaKarunga Munankondo nadintje.” (Lishorwero 16:14, 16) Ngoli, evi kapishi vita pakatji kadimuhoko yira mbyevi tuna kumona. Varura shirongwa ashi, “Vinke vita vya Armagerdon?” u wane maukenu kuhamena shishorokwa shino shakumeho.

•   Bibeli ya ghamaba ashi Karunga nga “shayikitapo vita palivhu nalintje.” (Pisalme 46:9) Varura shirongwa ashi, “Lihuguvaro kuhamena meho yayiwa” u yive vyavingi ovyo a twenyidira Karunga kuhamena meho.

•   Jesus a shongire vakwami vendi va raperere ashi Uhompa waKarunga uye. (Matheus 6:9, 10) Uhompa ogho kuna kara lipangero lyamuliwiru olyo ngali yatikitomo mpango yaKarunga kuhamena livhu rambangako kuyita mbili yapalivhu. Mukuyiva omo Uhompa ngau kuyitira uwa, kengera vidiyo ashi Vinke Untungi ndi Uhompa waKarunga?

 MuUkraine kwa kara mo Mbangi daJehovah dakupitakana 129 000. Yira momo tupu da kara Mbangi muvirongo vya peke, vavo navo kutemwinina Jesus pakupira kukuhameka muupolitika nakushwena kukuhameka muvita. (Johannes 18:36) Mbangi daJehova udjuni nauntje kuna kutwikira kuyuvhita “mbudi yayiwa yaUhompa” ashi ngo mpantjagho waku ghupapo maudito ghavantu kukwatera mo nka vita. (Matheus 24:14) Kuna kukushungida u gwanekere natwe mposhi ngau kushonge kuhamena mbudi yaBibeli yalihuguvaro.