VANGARARENU!
Nke ya ghamba ko Bibeli kuhamena likuhameko lyaukarelikarunga muvita vyaUkraine?
Kenga maukenu ghana kukwamo ko kuhamena vampititi vaukarelikarunga ovo vayiviko ntani navita vyaUkraine:
“Mpititi waNkirishe yaOrthodox Patriarch Kirill, kwato ovyo a ghamba ko ndi ashi a neghede runyeghenyo rwendi kwevi Russia a homokera Ukraine. . . . Nkirishe yendi kwa hanita maukenu ghavimpempa kuhamena Ukraine ovyo vya renkito Putin a gha rughanite ashi ndi ndjo konda a yitira vita.”—EUobserver, March 7, 2022.
“Patriarch Kirill . . . kwa kwatita ko ovyo Russia a homokera Ukraine ashi morwa kuna kara nkedi ya kughupapo ndjo.”—AP News, March 8, 2022.
“Mpititi waNkirishe yaOrthodox muUkraine Metropolitan Epiphanius I waKyiv, muMandaha kwa tungikire vantu mposhi ‘varwanite vakavita vaRussia’ . . . [Uye] kwa ghambire nka ashi kapishi ndjo kudipagha vakavita vaRussia.”—Jerusalem Post, March 16, 2022.
“Atwe mbunga [yaUkrainian Council of Churches and Religious Organizations (UCCRO)] kwa kwatitako vakavita Vaukraine novo vana kurwo mukupopera shirongo shetu. Atwe kutungika shirughana shavo shakupopera shirongo kuvankore ntani kuna kuvaraperera po.”—UCCRO * Statement, February 24, 2022.
Weni una kughayara ko? Nangeshi ukarelikarunga kughamba ashi vavo vakwami vaJesus, kuvhura ngoli va korangede vantu vavo va yende kuvita ndi? Nke ya ghamba ko Bibeli?
Lihistoli lyamaukarelikarunga muvita
Lihistoli lyanegheda ashi nkirishe kehepano da tambura nakukwatitako ntani nakukorangeda vita nakurenkita vi moneke ashi vavo kuna kutulita po mbili. Mbangi daJehova mwaka dadingi kwa negheda ashi nkirishe dakufana ngoli vimpempa ntani kukurenkita.
Vakriste kuvhura va kuhameke nakukwatitako vita ndi?
Ovyo a shongire Jesus: “Hora unyoye momo wa kuhora naumoye.” (Matheus 22:39) “Horangenu nkore denu.”—Matheus 5:44-47.
Ghayara ko: Kuvhura ngoli nkirishe yaghambango ashi vavo kulimburukwa kumpango yaJesus kuhamena shihoro yi korangede shimpe vantu vamo va kadipaghe vaunyavo muvita ndi? Mukuwana lilimbururo, varura shirongwa ashi, “Vakriste vashiri navita” ntani “Kuvhura shiri muntu a hore mukankore wendi ndi?”
Ovyo a ghambire Jesus: “Uhompa wande kapi wahama kuudjuni uno. Ndi ashi Uhompa wande kwa hama kuudjuni uno, vantu vande ndi kuna ru mposhi va dire kuntapa.” (Johannes 18:36) “Kehe uno a kwatango rufuro ndo ngaru mu lyo ndoro.”—Matheus 26:47-52.
Ghayara ko: Nangeshi Vakriste kapi va vapulitilire mukurwa vapopere Jesus, kuvhura ngoli varwe vita morwa kehe konda ndi? Varura virongwa ashi, “Vita vyakuwa naUkriste ndi?” u mone omo Vakriste vakuhova vakwamine nawa-nawa shihonenito namashongo ghaJesus.
Nke ngavi shorokero maukarelikarunga ghakwatitangoko vita?
Bibeli kushonga ashi Karunga kwashwena maukarelikarunga gha ghambango ashi kukwama Jesus ngoli kapi ghakwamango mashongo ghendi.—Matheus 7:21-23; Titus 1:16.
Mbapira yaLishorwero kunegheda ashi Karunga kutapa undjoni kumaukarelikarunga kumfa “danavantje va dipagha palivhu.” (Lishorwero 18:21, 24) Mukuyiva konda, varura shirongwa ashi, “Nke Babylon yayinene?”
Jesus a neghedire ashi, maukerelikarunga naghantje a shwena Karunga ngava gha djonaura po morwa virughana vyavo vyavidona yira momo shitondo shashidona shayimango nyango yayidona va shi “teta nakushivhukumina mumundiro.” (Mattheus 7:15-20) Varura shirongwa ashi, “Uhura wamaukarelikarunga pepi una kara!” u kushonge omo nga vi shoroka.
Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
^ Mbunga UCCRO ndi Ukrainian Council of Churches and Religious Organizations rambanga ko nkirishe 15 daOrthodox, Vagereka, Vakatolika Vaprotestante, Vaevangeli ntani Vajuda naVamuslimu.