A fosi biifi gi den Korentesama 1:1-31
1 A biifi ya komoto fu Pawlesi di Gadu poti enke wan apostel fu Kelestesi Yesesi. A mi anga u baala Sostenes de ya.
2 Mi e sende a biifi ya gi a kemeente fu Gadu a Korente. Gadu teke u fu toon bakaman fu Kelestesi Yesesi. Gadu kai u fu toon sama di santa, makandaa anga ala den sama di e kai a nen fu u Masaa Yesesi Kelestesi na ala se. En a den Masaa leti enke fa en a wi Masaa.
3 Meke a bun-ati anga a freide fu u Dda di de a hemel anga Masaa Yesesi Kelestesi de anga u.
4 Ala yuu mi e gi mi Gadu daa fu di a soi bun-ati gi u enke bakaman fu Kelestesi Yesesi.
5 Fu di u toon wan anga Kelestesi meke Gadu belesi wi anga omen sani. U kon sabi a tuu, u sabi fa fu taki te we paati a wowtu fu Gadu,
6 bika u biibi den sani fu Kelestesi di u yee anga u hii ati.
7 Neen meke a pisiten di we wakiti Masaa Yesesi fu soi a kaakiti fi en, u naw mankei nawan sani.
8 Aw meke u taampu gingin te na a kaba, da nawan sama o poi taki u du wan sani di á bun na a dei fu Masaa Yesesi Kelestesi.
9 Gadu e du san a taki ala yuu. Neen kai u fu de wan anga en Manpikin Yesesi Kelestesi.
10 Den baala fu mi, mi wani taigi u aini a nen fu Masaa Yesesi Kelestesi taki ala u mu e taki go na a wanse. Paatifasi á mu de aw mindii. U mu de wan aini a fasi fa we denki anga a fasi fa we si sani.
11 Bika son wan fu den sama di e tan aini a osu fu Klowe taigi mi taki we kwali anga useefi.
12 Mi e taki a sani ya, fu di son wan fu we taki: ‘Mi a Pawlesi baka mi e waka’, taawan e taki: ‘Na Apolos baka mi e waka’, taawan baka e taki: ‘Mi dati a Seifas baka mi e waka.’ Taawan e taki: ‘Mi a Kelestesi baka mi e waka.’
13 A kemeente fu Kelestesi paati aini kulu? A Pawlesi be dede na a pina ponsu gi u? Aini a nen fu Pawlesi u dopu?
14 Mi e gi Gadu daa taki mia dopu nawan fu u, boiti Krispus anga Gayus.
15 Anga dati nawan fu u á poi taki u dopu aini mi nen.
16 Tan osi, mi dopu den sama fu a osu fu Stefanas tu. Mia sabi efu mi be dopu taa sama moo.
17 Kelestesi á sende mi fu dopu sama, ma a sende mi fu paati a bun nyunsu. Te mi be e taki anga sama mia be e koboloiki kofaliki wowtu. Efu mi be du a sani ya, da a dede di Kelestesi dede na a pina ponsu á be o abi nawan wini gi u.
18 Den sama di o dede e si a bosikopu fu a dede di Yesesi dede na a pina ponsu enke soso sani. Ma wi di o fende a libi e si a sani ya enke a kaakiti fu Gadu.
19 Bika Gadu taki: ‘Mio meke a koni fu den koniman lasi gwe. Mio wai a koni fu den poti a wanse.’
20 Pe den koniman de? Pe den leliman fu a Weiti de? Pe den takiman fu a goontapu ya de? Gadu á soi kaba taki a koni fu a goontapu ya a soso sani noh?
21 A di den sama fu a goontapu ya e fitoow a koni fu den meke den á sabi Gadu. Ma Gadu soi a koni fi en di a fii den sama di e biibi fu di den yee a bosikopu di we paati. Den sama fu a goontapu ya e si a bosikopu ya enke soso sani.
22 Den Dyu wani si wonduu, den Giikisama e suku a koni fu libisama.
23 Ma we peleiki taki Kelestesi dede na a pina ponsu. A bosikopu ya e meke den Dyu dyakata, den taa kondee sama e si en enke soso sani.
24 Ma den Dyu anga den Giikisama di Gadu kai e si Kelestesi enke a kaakiti anga a koni fu Gadu.
25 Bika den sani fu Gadu di libisama e si enke soso sani, koni moo libisama. Den sani fu Gadu di libisama e si enke swaki sani, taanga moo a kaakiti fu libisama.
26 Den baala fu mi, useefi si den sama di Gadu kai. Efu u luku en a libisama fasi, da gaanse fu u a ná koniman, omen fu u naabi makiti, wa komoto aini balinen famii tu.
27 Ma Gadu teke den sama* di goontapu e si enke don sama fu gi den koni sama sen. A teke den swaki sama fu a goontapu fu gi den sama di taanga sen.
28 Gadu teke den sama* di goontapu e si enke sama di á pelensipali, den sama di taawan e soso, anga den sama di den nai si fu wan sani, fu meke den sama di pelensipali toon soso sani.
29 Neen meke nawan sama á poi meke bigi a Gadu fesi.
30 A Gadu meke u toon wan anga Kelestesi Yesesi, di meke u sabi a koni fu Gadu. A meke Yesesi yeepi u fu toon sama di e libi a wan letifasi, anga sama di santa. Gadu meke u fii fu di a meke Yesesi kon dede gi u.
31 Leti enke fa Gadu buku taki, da ‘a sama di e meke bigi, mu meke bigi fu Yehofa* ede’.
A maiki
^ Efuso ‘den don sani fu a goontapu’.
^ Efuso ‘den sani di a goontapu e si enke sani di á pelensipali’.
^ Luku a wowtu ‘Yehofa’ na a pisi ‘San den wowtu ya wani taki.’
