A fosi biifi gi den Korentesama 10:1-33
10 Den baala fu mi, wa mu feegete taki den afo fu u be waka na a woluku ondoo. Den be waka pasa aini a ze tu.
2 Ala den dopu enke bakaman fu Mosesi di den pasa na a woluku ondoo anga di den pasa aini a ze.
3 Ala den be nyan a nyanyan di Gadu be gi den.
4 Ala den be diingi a wataa di Gadu be gi den tu. A omen leisi den diingi a wataa fu a siton di be de koosube fu den. A Gadu be gi den a siton ya di be wani taki Kelestesi.
5 Toku Gadu á be fende gaanse fu den bun neen meke a kii den aini a sabana.
6 Den sani di pasa anga den de enke wasikoi gi u. Wa mu e angii fu du sani di á bun enke den afo fu u.
7 Wa mu e dini falisi gadu enke son wan fu den. Gadu buku taki: ‘Den sidon nyan diingi, bakadati den opo fu meke piisii.’
8 Wa mu libi wan hululibi, bika a dati son wan fu den be du. A sani ya be meke 23.000 sama dede aini wan dei.
9 Wa mu tesi Yehofa* tu enke fa son wan fu den be tesi en. Na a sani ya meke sineki be nyan den kii.
10 Wa mu e kuutu enke fa son wan fu den be gwenti kuutu. Bika na a sani ya be meke a engel fu Gadu kii den.
11 Den sani di pasa anga den a fu leli u wan sani. Gadu meke sama sikiifi den sani ya fu wasikoi wi di e libi aini den lasiti dei.
12 Neen meke a sama di denki taki a taampu mu luku bun fu aa kai.
13 Nawan fu den tesi di e miti u, a tesi di á miti taa sama ete. Ma u sa fitoow Gadu. A naw meke tesi di wa poi tyai miti u. Ma te tesi e miti u, aw yeepi u fu holidoo.
14 Neen meke den baala fu mi, u mu tan faawe fu afokodei.
15 Fa mi e taki anga u ya, a di mi sabi taki we fusutan sani bun. Useefi luku efu den sani di mi e taki a tuu.
16 A kan di we gi Gadu daa fi en, wani taki a buulu fu Kelestesi, ná so noh? A beele di we booko nyan, wani taki a sikin fu Kelestesi, ná so noh?
17 A wan beele de, neen meke winsi fa wi ipi tokuso wi a wan sikin, bika ala we paati aseefi beele.
18 Poti pakisei na a sani di den Islayelisama e du. Te den e nyan den sani di tyai enke ofaandi na a altari, da a leti enke a den anga Gadu e nyan makandaa, ná so noh?
19 A sani di mi taki ya wani taki falisi gadu anga den sani di sama e tyai enke ofaandi gi falisi gadu pelensipali?
20 A ná a sani de mi wani taki. A wani mi wani u sabi taki te den taa kondee sama e tyai ofaandi, da a ná Gadu den e tyai en gi ma a den takuu yeye. Mia wani u nyan makandaa anga takuu yeye.
21 Wa poi diingi na a kan fu Yehofa* anga du fu den takuu yeye na aseefi yuu. Wa poi nyan na ‘a tafaa fu Yehofa’ da we nyan na a tafaa fu den takuu yeye na aseefi yuu.
22 ‘A wani u wani Yehofa* dyalusu?’ Wo poi du sani fi en di en ati o boon?
23 U sa du ala sani, ma a ná ala sani bun fu du. U sa du ala sani, ma a ná ala sani e gi taawan taanga-sikin.
24 U mu e du sani di o tyai wini gi taawan, wa mu e suku wini fu u wawan.
25 U sa nyan iniiwan sowtu meti di den e seli a wowoyo sondee fu u kosensi fon u. U naafu akisi pe a komoto.
26 Bika enke faw sabi da ‘a Yehofa* abi a goontapu anga ala san de aini’.
27 Efu wan sama di nai dini Gadu kai u go neen osu, u mu nyan san a gi u. Ná akisi en pe a sani di a gi u komoto, daw kosensi naw fon u.
28 Ma efu wan sama taigi u taki: ‘A meti ya tyai enke ofaandi gi wan gadu.’ Da wa mu nyan a meti, bika wa wani a sama de dyakata. Wa wani sama kosensi fon den.
29 A ná a kosensi fu u mi e taki, ma na a kosensi fu a taa sama. Winsi fa mi sa du san mi wani, toku mia wani du wan sani di e meke a kosensi fu taawan fon den.
30 Winsi mi e gi Gadu daa fu a sani di mi e nyan, toku mia mu nyan mi en efu aw meke taawan kuutu mi.
31 Neen meke winsi a nyan we nyan, diingi, efuso iniiwan wan taa sani di we du, u mu du en fu gi Gadu gaandi.
32 Wa mu du sani fu meke Dyu, Giikisama efuso sama di de aini a kemeente fu Gadu dyakata.
33 Na a sani ya mi e meke moiti fu du. Mi nai suku wini fu miseefi, ma ala yuu mi e meke moiti fu du sani di ala sama fende bun. Mi e du a sani ya fu den sa fende a libi.
A maiki
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’