A fosi biifi gi den Korentesama 11:1-34
11 Leti enke fa mi e waka a Kelestesi baka, a so u mu waka a mi baka.
2 Mi e gafa u fu di we pakisei mi ala yuu. We du ala saw poi fu wooko anga den sani di mi leli u tu.
3 Mi wani u sabi taki a Kelestesi na a ede fu ala mannengee. A man na a ede fu a uman, Gadu na a ede fu Kelestesi.
4 Efu wan man e begi efuso taki polofeititoli neen a tapu en ede, da a wan sen sani gi en ede.
5 Efu wan uman e begi efuso taki polofeititoli sondee fu a tapu en ede, da a wan sen sani gi en ede. A sani ya be o de enke a pii en ede.
6 Efu wan uman nai tapu en ede anga wan sani, da a mu pii en ede. Ma efu a wan sen sani taki wan uman koti en uwii efuso pii en ede, da a mu tapu en ede anga wan sani.
7 Wan man á mu tapu en ede, bika Gadu meke a man enke fa enseefi de. A fasi fa a man meke e soi a gendee fu Gadu, ma a uman na a gendee fu a man.
8 Bika a ná a sikin fu a uman Gadu teke meke a man, ma a du fu a man a teke meke a uman.
9 Boiti dati, Gadu á meke a man gi a uman, ma na a uman a meke gi a man.
10 Neen meke wan uman mu wei wan sani tapu en ede fu soi taki ai saka enseefi a mannengee ondoo. A fu den engel ede ai du a sani ya.
11 Aini a kemeente fu Masaa, den mannengee abi umansama fanowdu, den umansama seefi abi den mannengee fanowdu.
12 Bika leti enke fa Gadu teke a sikin fu a man fu meke a uman, a so umansama e meke mannengee, ma a Gadu meke ala sani.
13 U denki luku osi, u si enke a bun fu wan uman begi Gadu sondee fu a tapu en ede anga wan sani?
14 A fasi fa libisama meke nai soi u kaba taki mannengee á meke fu de anga langa uwii noh?
15 Ma langa uwii e fiti wan umanpikin. Gadu gi en a uwii ya enke wan sani fu tapu en ede.
16 Efu wan sama wani sitee anga u fu a sani ya, u mu taigi en taki a so u gwenti. A so a kemeente fu Gadu gwenti tu.
17 Fa mi e taki anga u ya, a ná gafa mi e gafa u, bika den komakandaa fu u e tyai ogii moo bun.
18 Mi yee taki te we kon makandaa aini a kemeente da paatifasi e de aw mindii. Mi e biibi taki a sani ya e pasa tuu.
19 Bika a naabi misi taki a kemeente o abi sama di o sete den eigi kulu, ma a sani ya o soi kiin sama Gadu fende bun.
20 Te u kon makandaa fu nyan a Neti Nyanyan fu Masaa u nai du a sani ya enke faw mu du en.
21 Te u kon makandaa fu nyan, da son sama e nyan fosi a yuu doo. A so ye abi sama di e de anga angii ma taawan e duungu.
22 U nai nyan efuso diingi a wi osu noh? U nai lesipeki a kemeente fu Gadu noh? A sen u wani gi den pooti baala anga sisa fu u? San mi mu taigi u seefi? A gafa mi mu gafa u? Noiti, mia poi gafa u fu a sani ya.
23 A den sani di Masaa leli mi a den sani de mi leli u tu. A neti di den be o konkuu Masaa Yesesi, a teke wan beele,
24 neen a gi Gadu daa. Bakadati a booko a beele, neen a taki: ‘A beele ya wani taki mi sikin di mio gi fu wi ede. U mu e du a sani ya ala yuu fu e membee mi.’
25 Na aseefi sani a du anga a kan di den kaba nyan. A taigi den taki: ‘A kan ya wani taki a nyun kuudei di o sete di mi buulu o kai a doti. U mu e du a sani ya ala yuu. Solanga we diingi en u mu e membee mi.’
26 Ala yuu te we nyan a beele efuso te we diingi a win ya, we paati a bosikopu fu a dede fu Masaa te enke a kon.
27 Efu wan sama di nai tyai enseefi bun nyan a beele efuso diingi a win da a wan ogii a du, bika aa lesipeki a sikin anga a buulu fu Masaa.
28 Iniiwan sama mu ondoosuku enseefi bun fosi a nyan a beele efuso diingi a win.
29 Efu wan sama nyan efuso diingi sondee fu a sabi taki a sani di a nyan efuso diingi wani taki a sikin fu Masaa, da a sama ya e tyai kuutu kon neenseefi tapu.
30 Neen meke omen fu u swaki, son wan fu u siki, taawan dede.
31 Ma efu u be ondoosuku useefi bun, Gadu á be o kuutu u.
32 Ma te Yehofa* e kuutu u, a puu ai puu kaasi gi u fu di aa wani sitaafu u makandaa anga a goontapu ya.
33 Neen meke den baala fu mi, te u kon makandaa fu nyan a nyanyan ya, u mu wakiti fu ala sama doo fosi daw nyan.
34 Efu angii e kii wan sama meke a nyan neen osu, da te u kon makandaa, Gadu naw kuutu u fu di u du wan sani di á bun. Te mi doo anda mio seeka den taa toli.
A maiki
^ Luku a wowtu ‘Yehofa’ na a pisi ‘San den wowtu ya wani taki.’
