A fosi biifi gi den Korentesama 12:1-31
12 Den baala fu mi, mi wani u fusutan den kado di Gadu gi ibiiwan fu u.
2 U sabi taki fosi u toon Kelestesi bakaman, u be e dini falisi gadu di á be poi taki. U be e du ala san den wani.
3 Mi wani u sabi taki efu wan sama abi a yeye fu Gadu, noiti aw fuuku Yesesi. Efu wan sama naabi a yeye fu Gadu, a naw poi taki Yesesi a Masaa.
4 Gadu gi libisama a koni fu du omen sowtu sani*, ma anga aseefi yeye a gi wi ala den koni ya.
5 A omen sowtu wooko u sa du gi Masaa, ma a wan Masaa namo we wooko gi.
6 A omen sowtu sani sama sa du, ma na aseefi Gadu e gi den a kaakiti fu du den sani ya.
7 We si kiin san a yeye e meke ibiiwan fu den du. A Gadu gi den a yeye ya fu taawan sa fende wini.
8 A yeye e meke son sama taki anga koni, ai gi son wan a koni fu sabi sani.
9 Aseefi yeye ya e meke taawan biibi taanga, ai gi son sama a koni fu deesi ala sowtu siki.
10 Ai meke son sama du wonduu, taawan e taki polofeititoli, taawan poi fusutan efu wan bosikopu komoto a Gadu. Ai meke son sama taki omen sowtu tongo, taawan fende a koni fu taigi sama san wan sama taki aini wan taa tongo.
11 Ma na aseefi yeye e gi ala den a koni fu du den sani ya. Iniiwan sama e fende san a yeye fu Gadu wani a fende.
12 Libisama sikin abi omen pisi. Winsi fa a abi omen pisi toku a wan sikin ai tan. A letiso a de anga Kelestesi tu.
13 Na aseefi yeye dopu ala wi fu u be sa toon wan sikin. Winsi yu a wan Dyu, Giikisama, saafu efuso wan sama di fii, ala u fende aseefi yeye.
14 A ná wan pisi namo a sikin abi, a omen pisi a paati.
15 Efu a futu be o taki ‘mia ná wan ana, neen meke mia ná wan pisi fu a sikin’, toku a sani ya á wani taki en a ná wan pisi fu a sikin.
16 Efu a yesi be o taki, ‘mia ná wan ain, neen meke mia ná wan pisi fu a sikin’, toku a sani ya á wani taki en a ná wan pisi fu a sikin.
17 Efu a hii sikin a be ain, faw be o du man yee? Efu a hii sikin a be yesi, anga saw be o sumee?
18 Ma Gadu poti ala den pisi fu a sikin a pe den mu de, leti enke fa a wani.
19 Efu ala den pisi fu a sikin a be aseefi da fa a sikin be o tan?
20 A omen pisi a sikin abi, toku a wan sikin ai tan.
21 A ain á poi taigi a ana taki: ‘Mi naabi i fanowdu.’ A ede seefi á poi taigi den futu taki: ‘Mi naabi u fanowdu.’
22 Ma wi abi den pisi fu u sikin di we si enke á pelensipali fanowdu tu.
23 A den pisi fu a sikin di we si enke á kaba moin we moo poti pakisei. We moo seeka den pisi fu a sikin di wa wani sama si.
24 Ma den moin pisi fu u sikin naabi nawan sani fanowdu. Gadu meke a sikin fu u a wan fasi di e meke den pisi fu u sikin di á kaba moin fende moo seeka.
25 A du a sani ya fu paatifasi á kon na a sikin. Den pisi fu a sikin mu e booko den ede anga denseefi.
26 Efu wan sani du wan pisi fu a sikin, na a hii sikin e fii en. Efu den gafa wan pisi fu a sikin, na a hii sikin e poolo.
27 U na a sikin fu Kelestesi, ala wi a wan pisi fu a sikin fi en.
28 Gadu poti omen sowtu sama aini a kemeente. Na a fosi peesi yu abi den apostel, du fu tu a den polofeiti, du fu dii a den sama di e gi taawan leli. Bakadati yu abi den sama di e du wonduu, den sama di e deesi sowtu a sowtu siki, den sama di e yeepi taawan a sani, den sama di e teke fesi, anga den sama di e taki omen sowtu tongo.
29 Na ala den na apostel, polofeiti, efuso sama di e leli taawan? Na ala den poi du wonduu?
30 Na ala den poi deesi sowtu a sowtu siki? Na ala den poi taki omen sowtu tongo? Na ala den poi taigi sama san wan sama taki aini wan taa tongo?
31 U mu du ala saw poi fu Gadu gi wi a koni fu du den moo gaan sani. Ma mio soi u wan sani di bun moo ala den sani ya.
A maiki
^ Efuso ‘Gadu gi libisama omen sowtu kado’.
