A fosi biifi gi den Korentesama 13:1-13
-
Lobi na a moo pelensipali sani (1-13)
13 Efu mi e taki den tongo fu libisama anga du fu den engel ma mia lobi taawan, da mi de enke wan gengen efuso wan boko beenki di sama e pee poku.
2 Efu mi fende a koni fu taki polofeititoli, efu mi poi fusutan den kibiitoli fu Gadu, efu mi sabi ala san de fu sabi, efu mi biibi taanga te da mi e puu mongo poti a taa peesi ma mia lobi taawan, da ala den sani ya a fu soso.
3 Efu mi seli ala den sani di mi abi fu di mi wani solugu pootiman, efu mi de kabakaba fu dede gi den fu di mi wani gafa ma mia lobi taawan, da a fu soso mi du den sani ya.
4 Lobi abi pasensi anga bun manii. Lobi nai dyalusu. A nai gafa, a naabi heimembee.
5 Lobi nai du sen sani. A nai suku wini fi en wawan, en ati nai boon gaw, a nai holi taawan na ati.
6 Lobi nai piisii anga sani di á bun, ma ai piisii anga sani di tuu.
7 Lobi abi boo anga ala sani. Ai biibi ala sani, a abi howpu ala yuu, ai holidoo winsi sai pasa.
8 Lobi nai kaba noiti. Ma a koni fu taki polofeititoli o kon a wan kaba. A koni fu taki taa tongo o kon a wan kaba. A koni fu sabi sani o kon a wan kaba.
9 Bika nownow wa sabi ala den sani di u mu sabi, wa sabi a fini fu ala den polofeititoli tu.
10 Ma te wo sabi ala saw mu sabi, efuso te wo sabi a fini fu den polofeititoli, da a naw de moo taki wa sabi ala sani.
11 Di mi be de wan pikinnengee, mi be e taki enke wan pikinnengee, mi be e denki enke wan pikinnengee, mi be e si sani enke wan pikinnengee tu. Ma now di mi toon gaansama, mi nai du sani enke pikinnengee moo.
12 Bika nownow we luku aini wan sipikii pe u nai si kiin, ma dyonson wo si sani kiin. Nownow mia sabi ala sani, ma dyonson mio sabi ala sani leti enke fa Gadu sabi mi.
13 Ma a den dii sani ya o tan: biibi, howpu anga lobi. Ma a moo gaanwan fu ala den a lobi.
