A fosi biifi gi den Korentesama 14:1-40
14 Du ala saw poi fu lobi useefi. Ma u mu meke moiti fu fende den koni di a yeye fu Gadu e gi sama, moomoo a koni fu man taki polofeititoli.
2 A sama di fende a koni fu taki taa tongo nai taki anga libisama, ma anga Gadu ai taki. Nawan sama e fusutan san ai taki, bika na a yeye fu Gadu e meke a taki kibiitoli.
3 Ma a sama di e taki polofeititoli e gi taawan taanga-sikin. Ai toosutu den tu anga den sani di ai taki.
4 A sama di e taki omen tongo e gi enseefi taanga-sikin. Ma a sama di e taki polofeititoli e gi a kemeente taanga-sikin.
5 Mi be o poolo efu ala u fende a koni fu taki aini omen tongo, ma a be o moo bun efu u taki polofeititoli. A sama di e taki polofeititoli bigi moo a sama di fende a koni fu taki aini omen tongo, bika efu aa taigi sama san den sani di a taki aini taa tongo wani taki da a kemeente naw fende taanga-sikin.
6 Den baala fu mi, sowtu wini a abi efu mi kon a wi neen mi bigin taki aini tongo di u nai fusutan? Efu mi wani yeepi u, da mi mu tyai sani kon a kiin gi u, mi mu taki anga koni, mi mu taki polofeititoli efuso leli u, ná so noh?
7 Den sani enke tutu anga gitali* á de a libi, ma ye yee te wan sama e pee den. Ma efu ala den tu sani ya be e piki aseefi fasi, fai be o sabi ondi a ondi.
8 Efu a tutu á boo bun, da fa sama o sabi taki den mu seeka fu gwa feti?
9 A letiso a de tu taki efu u nai taki tongo di sama poi fusutan, da fa den o sabi san we taki? A sosokaali wo taki.
10 A omen sowtu tongo de a goontapu, tokuso sama de di e fusutan den.
11 Efu mi nai fusutan san wan sama e taki, da mi a wan taa kondee sama gi a sama de. A sama de a wan taa kondee sama gi mi tu.
12 A so a de tu te we angii fu fende den koni di a yeye fu Gadu e gi sama, u mu meke moiti fu fende koni di o gi a kemeente taanga-sikin.
13 Neen meke a sama di fende a koni fu taki taa tongo, mu begi Gadu fu a fende a koni fu taigi sama san den sani di a taki aini taa tongo wani taki.
14 Efu mi e begi aini taa tongo, da a ná miseefi e taki, ma na a koni di a yeye fu Gadu gi mi e meke mi taki. Neen meke mi nai fusutan san mi e taki.
15 San mi mu du? Te mi e begi, mio wooko anga a koni di a yeye fu Gadu gi mi. Ma mio begi fu sama sa fusutan san mi e taki tu. Te mi e singi mio wooko anga a koni di a yeye fu Gadu gi mi. Ma mio singi fu sama sa fusutan san mi e singi tu.
16 Efu a yeye gi yu a koni fu gafa Gadu aini taa tongo, da fa den sama di de ape o taki ‘Amen’ tei kaba begi, bika den á sabi sai taki.
17 Winsi a fasi fa ye begi Gadu bun, toku taa sama nai fende wini fu a begi fii.
18 Mi e gi Gadu daa di a gi mi a koni fu man taki omen tongo moo ala u ya.
19 Pe fu mi taki 10.000 wowtu di taa sama nai fusutan te mi de aini wan kemeente, a moo betee mi taki feifi wowtu di den e fusutan fu mi sa leli den wan sani.
20 Den baala fu mi wa mu e denki enke pikinnengee. U mu de enke yonkuu pikin te a abi fu du anga ogii, ma a fasi fa we denki mu soi taki wi a gaansama.
21 A sikiifi aini a Weiti taki: ‘“Mio taki anga den sama ya aini wan tongo di den nai fusutan.Tokuso den naw aliki mi.” A so Yehofa* taki.’
22 A taki di sama e taki taa tongo a ná wan maiki gi den sama di e biibi, ma a gi den sama di nai biibi. A taki di sama e taki polofeititoli a wan maiki gi den sama di e biibi, a ná gi den sama di nai biibi.
23 Efu u kon makandaa aini a kemeente neen ala sama e taki aini taa tongo, wan taa sama di kon ape efuso wan sama di nai biibi o taki wi ede nai wooko bun.
24 Ma efu ala we taki polofeititoli neen wan sama di nai biibi efuso wan taa sama kon ape, da den sani di a yee o poti en a pasi, da a sani ya o meke a go ondoosuku enseefi finifini.
25 Aw fusutan san be de aini en ati. Neen meke aw kai a doti begi Gadu da a taki: ‘Gadu de anga u tuu.’
26 Den baala fu mi, da saw mu du te u kon makandaa? Wan fu u mu singi gafa Gadu, wan fu u mu leli taawan, wan fu u mu tyai sani kon a kiin, wan fu u mu taki aini taa tongo, da wan fu u e taki san den sani di sama taki aini taa tongo wani taki. Ala san we du mu gi taawan taanga-sikin.
27 Efu son sama e taki aini taa tongo, da a tu efuso dii sama namo mu taki. Den á mu e taki na a wan yuu. Boiti dati, wan sama mu de fu e puu gi den taawan san a taki.
28 Ma efu nawan sama á de fu taigi taawan san a taki aini a taa tongo, da a sama di e taki aini taa tongo mu de pii te a de aini a kemeente. A sa taki anga enseefi efuso anga Gadu.
29 Tu efuso dii polofeiti sa taki, da den taa sama mu meke moiti fu fusutan san den taki.
30 Ma efu u de a wan komakandaa neen Gadu tyai sani kon a kiin gi wan sama na a yuu di wan taa sama e taki, da a sama di be e taki mu de pii fu a taawan taki.
31 Ala u sa taki polofeititoli fu u sa leli wan sani efuso gi useefi taanga-sikin, ma wa mu e taki na a wan yuu.
32 Te den polofeiti e wooko anga a koni di a yeye fu Gadu gi den, den mu man dwengi denseefi.
33 Gadu á wani sani waka buuyabuuya, bika en a wan Gadu fu freide.
Mi wani taigi u fa sani mu waka aini den kemeente fu den santawan:
34 Umanpikin á mu e taki aini den kemeente, ma den mu de pii. Den mu e saka denseefi enke fa a Weiti e taki.
35 Efu den wani sabi wan sani, meke den akisi den man fu den te den de a osu. Bika a wan sen sani efu wan umanpikin e taki aini a kemeente.
36 A wi* a den fosi sama di Gadu gi a wowtu fi en? Aw wawan yee a wowtu fi en?
37 Efu wan sama e si enke en a wan polofeiti, efuso ai si enke a fende a koni di a yeye fu Gadu e gi sama, da a mu fusutan taki den sani di mi sikiifi gi u, a san Masaa seefi taigi mi.
38 Ma efu wan sama á wani teke den sani di mi taki, da Gadu o poti en a wanse.
39 Den baala fu mi, u mu meke moiti fu fende a koni fu taki polofeititoli ma wa mu tapu taawan fu taki aini taa tongo.
40 Wa mu e du sani buuyabuuya, ma ala sani mu waka enke fa sani sete.
A maiki
^ A ná den gitali di u sabi. Disi a wan sowtu sani enke gitali di den be e pee poku a fositen.
^ Luku a wowtu ‘Yehofa’ na a pisi ‘San den wowtu ya wani taki.’
^ A ‘wi’ ya a den Korentesama.