A fosi biifi gi den Korentesama 2:1-16
2 Den baala fu mi, di mi kon paati a santa kibiitoli fu Gadu anga u, mia koboloiki gaan kofaliki wowtu efuso a koni fu libisama.
2 Mia kon taki anga u fu taa sani boiti Yesesi Kelestesi anga a kii di den kii en na a pina ponsu.
3 Di mi kon a wi, mi be swaki, mi be e feele te ala mi sikin be e dansi.
4 Di mi be e peleiki gi u, mia be e koboloiki kofaliki wowtu di koniman gwenti koboloiki. Ma den sani di mi be e taki be e soi taki a yeye fu Gadu abi kaakiti.
5 Mi du a sani ya fu di mi be wani u fitoow a kaakiti fu Gadu, pe fu u fitoow a koni fu libisama.
6 Te we taki anga sama di biibi taanga da we taki anga koni. U nai taki anga a koni fu a goontapu ya efuso a koni fu den tiiman fu a goontapu ya di naw de moo.
7 Ma we taki fu wan santa kibiitoli, dati na a koni fu Gadu di kibii. Fosi goontapu sete, Gadu be taki kaba san a be o du anga a koni ya. A du a sani ya fu u be sa fende gaandi.
8 Nawan fu den tiiman fu a goontapu ya sabi a koni fu Gadu. Bika efu den be sabi en, den á be o kii Masaa Yesesi.
9 A leti enke fa a sikiifi aini a wowtu fu Gadu taki: ‘Ain á si, yesi á yee, nawan sama be poi sabi san Gadu seeka gi den sama di lobi en.’
10 Ma Gadu tyai den sani ya kon a kiin gi u anga a yeye fi en. Bika a yeye e ondoosuku ala sani, te doo den moo dipi pakisei fu Gadu seefi ai ondoosuku.
11 Sama poi sabi san de aini wan taawan ati? A san de aini en eigi ati wawan a sabi. A letiso nawan sama sabi den pakisei fu Gadu, boiti a yeye fu Gadu.
12 A ná a yeye fu a goontapu u fende, ma u fende a yeye fu Gadu, fu u sa sabi den sani di Gadu gi u anga en hii ati.
13 A ná anga a koni fu libisama we taki den sani ya. Ma a den sani di a yeye fu Gadu leli u we taki. Na a yeye fu Gadu e yeepi u fu tyai den toli fu Gadu kon a kiin gi sama.
14 Wan sama di e denki enke fa libisama e denki, nai wooko anga den sani di a yeye fu Gadu e tyai kon a kiin. Ai si den sani ya enke soso sani. Aa poi fusutan den, bika wan sama abi a yeye fu Gadu fanowdu fu man fusutan den sani ya.
15 Wan sama di a yeye fu Gadu e tii e ondoosuku ala sani, nawan libisama poi ondoosuku a sama ya.
16 Bika Gadu buku taki: ‘Sama sabi den pakisei fu Yehofa*? Sama poi leli en wan sani?’ Ma we denki enke fa Kelestesi e denki.
A maiki
^ Luku a wowtu ‘Yehofa’ na a pisi ‘San den wowtu ya wani taki.’