A fosi biifi gi den Korentesama 3:1-23
3 Den baala fu mi, mia be poi taki anga u enke sama di a yeye fu Gadu e tii. Mi be abi fu taki anga u enke sama di e denki enke fa libisama e denki efuso enke sama di e denki enke pikinnengee te a abi fu du anga Kelestesi.
2 Mi be gi u meliki, mia gi u taanga sani fu nyan, bika wa be taanga sai. Fu taki en kiin, nownow seefi wa taanga sai ete.
3 We denki enke fa libisama e denki ete. Bika dyalusu anga feti de aw mindii. A sani ya e soi taki we tyai useefi enke den sama fu a goontapu ya.
4 Bika efu son wan fu we taki: ‘Mi a Pawlesi baka mi e waka.’ Taawan e taki: ‘Mi na Apolos baka mi e waka’, da a ná enke den sama fu a goontapu ya we tyai useefi noh?
5 Sama na Apolos? Sama a Pawlesi? Useefi a futuboi. A yeepi u yeepi u fu toon Yesesi bakaman. Na a wooko di Masaa gi u fu du neen u du.
6 Mi paandi a sii, Apolos nati en, ma a Gadu meke a goo.
7 Neen meke a ná a sama di e paandi efuso a sama di e nati a sii pelensipali. Ma a sama di pelensipali a Gadu, bika neen e meke a goo.
8 A sama di e paandi anga a sama di e nati a sii e wooko makandaa. Ma Gadu o pai iniiwan sama fu a wooko di a du.
9 Wi a sama di e wooko makandaa anga Gadu. U na a goon fu Gadu di ai wooko. U na a osu fu Gadu.
10 Gadu soi mi a bun-ati fi en. Neen meke mi sete wan fondamenti enke wan bow-man di sabi du en wooko bun. Ma a taa sama e bow neen tapu. Ibiiwan sama mu luku fa ai bow na a fondamenti ya tapu.
11 Gadu poti Yesesi enke a fondamenti kaba, neen meke nawan sama poi sete wan taa fondamenti.
12 Wan sama sa bow na a fondamenti ya tapu anga gowtu, solufu, dii siton, udu, efuso dee gaasi.
13 Ma di a dei fu tesi o doo wo si a wooko di iniiwan sama du, bika a faya o soi a wooko di den du.
14 Efu a osu di a sama meke na a fondamenti tapu á boon, da Gadu o belesi a sama de.
15 A sama di osu boon, o lasi wan gaan sani. Ma enseefi o tan a libi, aw de enke wan sama di taawan puu aini faya.
16 Wa sabi taki aw na a tempel fu Gadu noh? Wa sabi taki a yeye fu Gadu de anga u noh?
17 Gadu o kii a sama di e tyobo a tempel fi en, bika a tempel fu Gadu santa. A wi na a tempel fu Gadu.
18 Wa mu koli useefi. A sama di denki taki a koni aini a goontapu ya mu toon wan donman fu a sa toon wan koni sama.
19 Bika a koni fu a goontapu a wan don sani gi Gadu. Gadu buku taki: ‘Ai meke den koniman go fasi aini den eigi akaapana.’
20 Wan taa peesi aini Gadu buku e taki: ‘Yehofa* sabi taki a pakisei fu den koniman a soso sani.’
21 Neen meke nawan fu u mu meke bigi gi den sani di libisama poi du. Bika a wi abi ala den sani ya.
22 Winsi a Pawlesi, Apolos, Seifas, a goontapu, libi, dede, den sani fu a ten ya efuso den sani fu a ten di e kon, a wi abi ala den sani ya.
23 Wi a fu Kelestesi, Kelestesi a fu Gadu.
A maiki
^ Luku a wowtu ‘Yehofa’ na a pisi ‘San den wowtu ya wani taki.’