A fosi biifi gi den Korentesama 4:1-21
4 U wani taa sama si wi enke wookoman fu Kelestesi di sabi den santa kibiitoli fu Gadu.
2 U mu holi a pakisei taki wan basi e teke wookoman di a sa fitoow.
3 Mi naabi toobi efu u wani ondoosuku mi efuso tyai mi gwa kuutu. Miseefi nai kuutu miseefi,
4 bika fa mi de ya mi e si enke mi e tyai miseefi a wan letifasi. Ma dati á wani taki a so sani de, bika a Yehofa* mu kuutu mi.
5 Neen meke wa mu kuutu nawan sama fosi a yuu doo. Ma u mu wakiti te enke Masaa Yesesi kon, da aw tyai kon a kiin san de aini ibiiwan sama ati. Da Gadu o gafa iniiwan sama fu den sani di a du.
6 Den baala fu mi, den sani di mi taki fu mi anga Apolos a fu leli wi a pelensipali sani ya: ‘Wa mu du sani di á sikiifi aini den santa buku.’ Efu u holi a sani ya a pakisei, u naw abi heimembee, u naw si enke son sama bun moo taawan tu.
7 Saide ye si enke i bun moo taawan? San yu abi di a ná fende i fende en? Efu a fende i fende en, da saide ye meke bigi enke a ná fende i fende en?
8 Na ala sani di wi abi fanowdu wi abi kaba? U si enke u gudu kaba? U bigin tii enke kownu fika u taawan? Efu u be bigin tii enke kownu, a be o bun, bika da useefi be o tii enke kownu tu.
9 Gi mi, ai gei enke Gadu poti wi enke apostel aini wan pee di omen sama e luku. A gei den leisi dede sitaafu gi u, da hii goontapu, den engel anga libisama e luku saw pasa anga u. A gei a tyai mi anga den taa apostel kon enke den lasitiwan aini a pee ya.
10 Sama e si wi enke donman fu Kelestesi ede, ma u dati e si enke u koni. U swaki, ma u dati taanga. Sama e soso u, ma u dati a gafa den e gafa u.
11 Te anga a dei fu tide u de anga angii, wataa e kii u, u naabi koosi fu wei, sama e fon u, u naabi peesi fu tan.
12 We wooko taanga anga wi ana. Te sama e kosi u, we belesi den. Te sama e du ogii anga u, we holidoo anga pasensi.
13 Te den e poli u nen, we taki switi anga den. Te anga a dei fu tide den sama fu a goontapu ya e si wi enke dyiko, den nai si u fu wan sani.
14 Mi nai sikiifi den sani ya fu gi u sen, ma a di mi lobi u enke mi pikin meke mi e poti wi a pasi.
15 Bika winsi wi abi 10.000 sama di e leli u faw mu waka a Kelestesi baka, tokuso u naabi omen dda. Ma a mi toon u dda fu di mi paati a bun nyunsu fu Kelestesi anga u.
16 Mi e begi u gaantangi fu u waka a mi baka.
17 Neen meke mi e sende Timotiyesi kon aw. Mi lobi en enke mi pikin, bika ai wooko taanga gi Masaa anga en hii ati. Aw soi u fa mi e du sani te mi e du a wooko fu Kelestesi Yesesi. Aw soi u tu fa mi e leli sama na ala den kemeente pe mi e go.
18 Son sama bigin fii denseefi fu di den denki taki mi naw kon.
19 Ma efu Yehofa* wani, da mio kon a wi anda dyonson. Mi naw kon fu yee san den sama ya abi fu taki, ma mi wani si efu a kaakiti fu Gadu e tii den.
20 A ná den sani di wan sama e taki e soi efu ai saka enseefi na a Kownukondee fu Gadu ondoo, ma a den sani di ai du mu soi taki a kaakiti fu Gadu de anga en.
21 San moo bun gi u? U wani mi kon a wi anga kodya, efuso mi mu kon anga lobi anga safu-ati?
A maiki
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’