A fosi biifi gi den Korentesama 5:1-13
5 Mi yee taki sama de aw mindii di e libi wan hululibi. Wan man e libi anga en dda uman. Den sama di nai dini Gadu seefi nai du a sani ya.
2 A den libi de e bun gi u? A ná hati a mu e hati u noh? A ná puu u mu puu a man di e du a sani ya aw mindii noh?
3 Winsi fa mia de anda toku mi denki de a wi anda. Mi kuutu a man di du a sani ya kaba leti enke mi de anga wi anda.
4 Te wo kon makandaa aini a nen fu u Masaa Yesesi Kelestesi, mi pakisei o de a wi anda. A kaakiti fu Masaa Yesesi o de anga u tu.
5 U mu fika den sowtu man ya gi Saatan fu den á poli den taawan aini a kemeente. A sani ya o yeepi a kemeente fu si sondu enke fa den mu si en te enke a dei fu Masaa doo.
6 Wa mu e meke bigi fu den sowtu sani ya. Wa sabi taki a wan pikinso sowda namo e meke ala a bolon soopu noh?
7 U towe a gaandi bolon di abi sowda, fu u sa toon nyun bolon di naabi sowda. Bika Kelestesi, a Paska sikapu fu u kon dede gi u enke ofaandi.
8 Neen meke te we holi a fesa ya wa mu wooko anga gaandi bolon di abi sowda, efuso sowda dii sa maiki anga sondu anga ogii. Ma u mu holi a fesa anga beele di naabi sowda. A beele ya e soi gwa sani di bun anga sani di tuu.
9 Aini a biifi di mi sende gi u, mi be taigi u taki wa mu e paa anga sama di e libi wan hululibi.
10 A ná den sama fu a goontapu ya di e libi wan hululibi, di giili, di e fufuu, efuso di e dini falisi gadu mi e taki. Bika efu a den sama ya mi be e taki, daw be o abi fu komoto aini a goontapu ya.
11 Ma mi sikiifi a biifi ya fu taigi u taki efu wan baala e libi wan hululibi, a giili, ai dini falisi gadu, ai kosi taawan, ai diingi duungu efuso fufuu, wa mu paa anga en moo. Nyan seefi wa mu nyan anga en.
12 A ná mi abi a wooko fu kuutu den sama di de a doose fu a kemeente. A den sama di de aini a kemeente u mu kuutu,
13 da Gadu o kuutu den sama di de a doose fu a kemeente. ‘U mu puu a sama di e du ogii aw mindii.’
