A fosi biifi gi den Korentesama 6:1-20
6 Efu yu anga i baala abi wan toobi, ye tyai en gwa sama di nai dini Gadu fu den kuutu en? Saide i nai tyai en gwa den sama di Gadu poti aini a kemeente fu koti kuutu gi u?
2 Wa sabi taki a wi a den santawan fu Gadu di o kuutu a goontapu ya noh? Efu a wo kuutu a goontapu, da wa si enke wo poi koti den sowtu pikin kuutu ya noh?
3 Wa sabi taki wo kuutu den engel* noh? Daw mu poi koti den kuutu fu a goontapu ya tu.
4 Efu a wo kuutu den toli fu a goontapu ya, da saide we meke sama di á de aini a kemeente koti kuutu gi u?
5 Mi e taki a sani ya fu meke sen kisi u. Nawan sama á de aw mindii di abi a koni fu koti kuutu gi u te tu baala abi wan sani noh?
6 Pe fu u koti kuutu gi useefi, da we tyai u baala gwa sama di nai dini Gadu te wi anga en abi sani.
7 A wan sen sani te we tyai u baala gwa kuutu. Saide wa poi fika a taki te u baala du wan ogii anga u? A moo betee u toon lasiman pe fu u tyai en gwa kuutu.
8 Ma pe fu u du a sani ya, da a libi we libi ogii anga u baala. A useefi e bidiigi den.
9 Wa sabi taki sama di nai tyai denseefi bun naw go aini a Kownukondee fu Gadu noh? Wa mu koli useefi. Sama di e libi wan hululibi, sama di e dini falisi gadu, sama di e waka gi den toowpaa, man di e poti denseefi gi taa man fu didon anga den, man di e didon anga taa man,
10 fufuuman, giiliman, duunguman, sama di e kosi taawan, anga sama di e koli taawan teke den sani fu den, naw go aini a Kownukondee fu Gadu.
11 Toku son wan fu u be e du den sani ya, ma Gadu wasi u kon kiin anga a yeye fi en, a meke u kon santa. Ai teli wi enke sama di e libi a wan letifasi aini a nen fu u Masaa Yesesi Kelestesi.
12 Mi sa du ala sani, ma a ná ala sani bun fu du. Mi sa du ala sani, ma mi naw meke nawan sani toon mi basi.
13 Nyanyan meke fu go aini bee, bee meke gi nyanyan. Ma Gadu o meke a bee anga a nyanyan toon soso sani. A sikin á be meke fu libi wan hululibi, ma a meke fu wooko gi Masaa. A Masaa e solugu a sikin.
14 Ma Gadu meke Masaa Yesesi kon a libi baka anga a kaakiti fi en, a letiso aw weki u puu a dede tu.
15 Wa sabi taki a sikin fu wi a fu Kelestesi noh? A fiti fu teke wan sani fu Kelestesi go mokisa anga wan sama di e seli en sikin? Noiti.
16 Wa sabi taki iniiwan sama di e siibi anga wan sama di e seli en sikin e toon wan anga a sama de noh? Bika Gadu taki: ‘Den tu man o toon wan sikin.’
17 Ma a sama di de wan anga Masaa e denki enke fa Masaa e denki.
18 U mu lon gi hululibi. Nawan taa sondu di wan sama e du e tyobo en sikin. Ma efu wan sama e libi wan hululibi da ai tyobo en eigi sikin.
19 Wa sabi taki a sikin fu u na a tempel fu a santa yeye noh? A Gadu gi wi a yeye ya. Boiti dati, a sikin fu u a ná fu useefi moo,
20 bika Gadu pai wan gaan paiman gi u. Neen meke u mu gi Gadu gaandi anga a sikin fu u.
A maiki
^ Dati a den takuu yeye efuso ogii engel.