A fosi biifi gi den Korentesama 7:1-40
7 U be sende biifi akisi mi wantu sani. Neen meke mi wani piki u taki a moo bun fu wan man á holi wan uman*.
2 Ma fu di hululibi de na ala se meke wan man mu abi en uman, wan uman mu de anga en man.
3 A man mu e gi en uman san a abi leti fu fende. A uman seefi mu e gi en man san a abi leti fu fende.
4 A uman a ná basi fi en eigi sikin, ma neen man a basi fi en sikin. A letiso a man seefi a ná basi fi en eigi sikin, ma neen uman a basi fi en sikin.
5 Ya mu mombii i toowpaa efu a wani siibi anga i, boiti efu u tu man taki fiti taki u naw siibi anga useefi fu wan pisiten fu di u wani begi Gadu. Bakadati u sa siibi anga useefi baka fu Saatan á fende u kisi fu di wa poi holi useefi moo.
6 A di mi wani yeepi u meke mi e taigi u den sani ya, ma a ná weiti mi e poti gi u.
7 A be o bun efu ala sama be de enke mi. Gadu gi den sama di wani toow a okasi fu toow. A gi den sama di wani tan sondee toow a okasi fu tan so tu.
8 Mi wani taigi den sama di á toow anga den uman di man dede kaba taki, a moo betee den tan fu den so enke mi.
9 Ma efu den si taki den á poi holi denseefi, da meke den toow. Bika a moo bun fu den toow pe fu den meke den fii fu den basi den.
10 Mi wani taigi den sama di toow taki, wan uman á mu towe en man. A ná mi taki a sani ya, ma na Masaa Yesesi taki so.
11 Ma efu en anga en man paati, a mu tan sondee toow, efuso a mu daai go neen man baka. Wan man á mu towe en uman.
12 A sani di mio taki ya a miseefi taki en ye, a ná Masaa. Mi wani taigi den taa sama di toow taki efu wan man abi wan uman di á de wan bakaman fu Masaa, neen a uman wani tan anga en, a man á mu towe en.
13 Efu wan uman abi wan man di á de wan bakaman fu Masaa, neen a man wani tan anga en, a uman á mu towe en.
14 Bika winsi fa a man a ná wan bakaman fu Masaa, toku a toow fi en santa fu di a uman fi en a wan bakaman fu Masaa. A letiso a toow fu wan uman di á de wan bakaman fu Masaa santa fu di a man fi en a wan bakaman fu Masaa. Efu aa be de so, den pikin fu den á be o santa. Ma nownow den santa.
15 Ma efu a man efuso a uman di á de wan bakaman fu Masaa wani gwe, fika en meke a gwe. Efu a sani ya be o pasa da wan baala efuso sisa naafu tan anga en toowpaa. Bika Gadu wani wi abi freide.
16 Den uman, efu u tan anga a man fu u, kande u sa yeepi en fu fende a libi. Den man, efu u tan anga a uman fu u, kande u sa yeepi en fu fende a libi.
17 Mi wani taigi ala den kemeente taki meke iniiwan sama tan enke fa a be de fosi Yehofa* kai en.
18 Efii be besnei* fosi Masaa kai i, tan fii so. Efi ya be besnei fosi Masaa kai i, pina tan fii so.
19 A naabi toobi efu wan sama besnei* efuso aa besnei, a sani di pelensipali na a du di a mu e du san Gadu taki.
20 Iniiwan sama mu tan enke fa a be de di Masaa kai en.
21 Efi ya be wan saafu di Masaa kai i, ya mu booko yu ede, pina tan fii so. Ma efii fende a okasi fu kon fii, dai mu meke moiti fu kon fii.
22 Bika iniiwan sama di be de wan saafu di Masaa kai en, toon wan futuboi fu Masaa di fii. Iniiwan sama di be fii di Masaa kai en, toon wan saafu fu Kelestesi.
23 Gadu pai gi u di a bai u. Wa mu toon saafu fu libisama moo.
24 Den baala fu mi, iniiwan sama mu tan enke fa a be de di Gadu kai en.
25 Masaa á gi mi nawan bosikopu gi den sama di á toow noiti. Ma mio taigi u san miseefi e denki, bika mi a wan sama di Gadu soi tyali-ati gi, neen meke u sa biibi den sani di mio taigi u.
26 Fu di we libi aini wan taanga ten meke mi si enke a moo bun fu wan man tan enke fa a de.
27 I toow anga wan uman? Ná suku fasi fu fika en. Ma efii naabi uman, pina tan fii so.
28 Ma winsi i toow seefi, a ná wan ogii i du. Efu wan sama di á toow noiti, wani toow, a ná wan ogii a du tu. Ma sani o miti den sama di toow. A wani mia wani a sani ya miti u.
29 Den baala fu mi, mi wani taigi u taki, a ten di fika á langa moo. Fanafu now, meke den sama di abi uman libi enke den naabi uman.
30 Den sama di e kee, mu e libi enke sama di nai kee. Den sama di e piisii mu e libi enke sama di nai piisii. Den sama di e bai sani mu e libi enke sama di naabi nawan sani.
31 Den sama di e wooko anga den sani fu a goontapu ya, mu e libi enke sama di nai wooko anga den sani ya tumisi. Bika a goontapu ya e kengi.
32 Mia wani wi abi booko-ede. Wan man di á toow e booko en ede anga a wooko fu Masaa, bika a wani Masaa piisii anga en.
33 Ma a man di toow e booko en ede anga den sani fu a goontapu ya, bika a wani en uman piisii.
34 A nai poti pakisei a wan sani namo. Den uman di naabi man moo anga den uman di á toow noiti, e booko den ede anga a wooko fu Masaa. Neen meke a sikin anga a denki fu den santa. Ma a uman di toow e booko en ede anga den sani fu goontapu, bika a wani en man lobi en.
35 A di mi wani sani waka bun anga u, meke mi e taigi u den sani ya. A ná tapu mi e tapu u fu du saw wani. Ma a gi mi wani gi u taanga-sikin fu du san bun. Mi wani u wooko gi Masaa sondee fu sani puu u pakisei.
36 Ma efu wan sama á toow, neen a si enke ai tyai enseefi a wan fasi di á fiti, da meke a toow efu aa yonkuu tumisi.
37 Efu wan sama poti neen ede taki a naw toow, neen a si taki a poi tan sondee toow, da meke a tan so efu a poi dwengi den fii fi en, bika a wan bun sani ai du.
38 A sama di toow du wan bun sani, ma a sama di á toow du wan moo bun sani.
39 Wan uman á mu booko toow anga en man solanga en man de a libi. Ma efu en man dede da a sa toow anga sama a wani solanga a sama de a wan bakaman fu Masaa.
40 Ma mi si enke aw moo de koloku efu aa toow moo. Mi e biibi taki miseefi abi a yeye fu Gadu.
A maiki
^ Efuso ‘a moo bun fu wan man á siibi anga uman’.
^ Luku a wowtu ‘Yehofa’ na a pisi ‘San den wowtu ya wani taki.’
^ Dati a te den be e koti a fesise buba fu a senpeesi fu wan mannengee puu.
^ Dati a te den be e koti a fesise buba fu a senpeesi fu wan mannengee puu.
