A fosi biifi gi den Korentesama 9:1-27
9 Mia poi du san mi wani noh? Mi a ná wan apostel noh? Mia be si u Masaa Yesesi noh? A toon di u toon Yesesi bakaman nai soi taki mi a wan apostel noh?
2 Winsi taa sama nai si mi enke wan apostel, u dati e si mi enke wan apostel. A toon di u toon Yesesi bakaman e soi kiin taki mi a wan apostel fu Masaa.
3 Mi wani taigi den sama di e kuutu mi taki,
4 wi abi a leti fu nyan efuso diingi den sani di sama gi u, ná so noh?
5 Useefi naabi a leti fu toow anga wan uman di de wan bakaman fu Masaa daw tyai en gwa pe we go noh? Na a sani ya den baala fu Masaa, den taa apostel, anga Seifas e du.
6 A mi anga Barnabas wawan abi fu wooko fu solugu useefi?
7 Sowtu suudati e wooko solugu enseefi? Sama e paandi wan doloifigoon, da a nai nyan den sii fi en? Sama e kweki sikapu, da a nai diingi pikinso fu a meliki fu den sikapu?
8 Den sani di mi e taki ya a ná libisama wawan e si den so. A Weiti seefi e taki den sani ya.
9 A sikiifi aini a Weiti fu Mosesi taki: ‘Ya mu tei a mofu fu wan mankaw te ai masi alisi.’ A booko Gadu e booko en ede anga mankaw so?
10 Efuso a fu wi ede a taki a sani ya? A fu wi ede a sani ya sikiifi tuu, bika a sama di e tuubu a doti anga a sama di e masi alisi e du den sani ya fu den sa fende fu den se.
11 Efu a den sani fu Gadu u paati anga u, daw si enke a fowtu fu u yeepi u anga den sani di wi abi fanowdu?
12 Efu we yeepi taa sama anga san den abi fanowdu, da wa si enke u mu moo yeepi u noh? Winsi fa wi abi a leti ya, tokuso u ná akisi u nawan sani, ma we holidoo winsi sai pasa fu wa tapu nawan sama fu biibi a bun nyunsu fu Kelestesi.
13 Wa sabi taki den man di e wooko aini a tempel e nyan den sani di sama e tyai kon na a tempel noh? Wa sabi taki den sama di e wooko na a altari e fende afu fu den sani di sama e tyai enke ofaandi na a altari noh?
14 A letiso Masaa taki den sama di e paati a bun nyunsu mu nyan fu a bun nyunsu.
15 Ma mia wooko anga nawan fu den leti di mi abi. A ná fu di mi wani u gi mi wan sani meke mi e taigi u den sani ya. A moo betee mi dede, pe fu mi meke sama tapu mi fu gafa taki mi e paati a bun nyunsu fu soso.
16 Aa de fu mi gafa fu di mi e paati a bun nyunsu, bika mi musu fu du en. Heelu fu mi efu mi nai paati a bun nyunsu.
17 Efu anga mi eigi wani mi e du en, mio fende wan pai. Ma winsi mi e du en fu di mi naabi taa fa, toku a wan gaan faantiwowtu Gadu gi mi.
18 San na a pai di mio fende? A pai ya na a paati di mi sa paati a bun nyunsu fu soso. Fu di mi e du a sani ya meke mi naw akisi nawan sani di mi abi leti fu fende fu di mi e paati a bun nyunsu.
19 Winsi fa mi a ná wan saafu, tokuso mi meke miseefi toon wan saafu fu ala sama. A di mi wani yeepi omen sama meke mi e du a sani ya.
20 Mi toon wan Dyu gi den Dyu fu man yeepi den Dyu. Mi toon wan sama di e holi a weiti* gi den sama di e holi a weiti, winsi fa miseefi nai holi a weiti. Mi e du a sani ya fu di mi wani yeepi den sama di e holi a weiti.
21 Mi toon wan sama di nai holi a weiti* gi den sama di nai holi a weiti, winsi fa mi e holi a weiti fu Gadu anga Kelestesi. A so mio man yeepi den sama di nai holi a weiti.
22 Mi toon wan sama di swaki fu yeepi den sama di swaki. Mi toon ala sani gi ala sama, mi du ala san de fanowdu fu yeepi sama fu fende a libi, winsi a wantu sama namo.
23 Mi e du ala san mi poi fu paati a bun nyunsu gi taawan.
24 Wa sabi taki ala den sama di e sitee lon e lon fu wini wan sani noh? Toku a wan namo e wini, neen meke u mu lon fu u sa wini.
25 Ala sama di e sitee lon e dwengi denseefi aini ala sani. Den e du a sani ya fu wini wan sani di naw tan fu langa, ma we du a sani ya fu wini wan sani di o tan fu teego.
26 Neen meke mi nai lon buuyabuuya. Te mi e naki kofu mi e luku bun fu mia naki winta.
27 Ma mi e naki mi sikin anga kofu, mi e basi en enke wan saafu tu. Bika efu mia du a sani ya, aw kon de taki mi peleiki gi taa sama da Gadu á fende mi bun.
