A fosi biifi gi den Tesalonikasama 1:1-10
1 Mi Pawlesi, Silfanus, anga Timotiyesi e sende a biifi ya gi a kemeente fu Tesalonika, di de wan anga Gadu anga Masaa Yesesi Kelestesi.
Meke a bun-ati anga a freide fu Gadu de anga u.
2 We gi Gadu daa ala yuu te we kai u nen aini den begi fu u.
3 Bika te u de a Gadu fesi, u nai feegete a wooko di u du fu di wi abi lobi anga biibi. U nai feegete faw holidoo tu fu di we biibi Masaa Yesesi.
4 Baala, Gadu lobi u, u sabi taki neen kai u.
5 Bika di u paati a bun nyunsu gi u, da a ná taki namo u be taki da a kaba. Ma den sani di u be taki be doo wi ati. Na a santa yeye be yeepi u fu paati a bun nyunsu ya gi u. Wi di be e paati a bun nyunsu gi u be e biibi anga u hii ati taki den sani di u be e leli wi a tuu. U sabi tu faw tyai useefi di u be de a wi anda.
6 U waka a wi anga Masaa baka, bika winsi fa omen sani be e miti u, tokuso u teke a wowtu fu Gadu anga ala piisii. Na a piisii ya a santa yeye e gi sama.
7 Na a fasi faw tyai useefi meke den baala anga sisa fu Masadoniya anga Akaya sa waka aw baka.
8 A ná aini Masadoniya anga Akaya namo sama yee a wowtu fu Yehofa* di u peleiki. Na ala se sama e yee fu a biibi di we biibi Gadu. Neen meke u naabi fu taki nawan sani moo.
9 Ala yuu den e taki fu a fosi leisi di u be kon a wi anda. Den e taki fu a fasi faw daai baka gi den falisi gadu fu u, anga faw daai kon dini a tuu Gadu di e libi.
10 Den e taki tu fu a wakiti di we wakiti a Manpikin fu Gadu di de a hemel. Na a Manpikin ya a meke kon a libi baka. A Manpikin ya a Yesesi, neen o fii wi te a atiboon dei fu Gadu doo.
A maiki
^ Luku a wowtu ‘Yehofa’ na a pisi ‘San den wowtu ya wani taki.’
