A fosi biifi gi den Tesalonikasama 2:1-20
2 Den baala fu mi, u sabi taki a ná fu soso u be kon a wi anda.
2 Bika enke fa useefi sabi, da sama libi ogii anga wi a Filipi. Den du sani fu gi u sen, ma a Gadu fu u yeepi u fu wa feele fu paati a bun nyunsu gi u, winsi fa sama be e du omen sani fu tapu u.
3 Den sani di we taigi wi a tuu. A ná ogii fu u wi abi a pakisei, a ná bidiigi u wani bidiigi u.
4 Ma we taki anga wi enke sama di Gadu seefi teke fu paati a bun nyunsu. U nai taki anga u fu di u wani libisama piisii, ma we taki anga u fu di u wani Gadu piisii, neen na a Sama di e ondoosuku wi ati.
5 Gadu seefi sabi taki noiti u suku fu koli wi anga switi taki. Wa bidiigi u fu fende gudu aw.
6 Wa suku gaandi a wi efuso taa sama, bika enke apostel fu Kelestesi u be sa de enke wan ibi aw tapu fu solugu.
7 Ma u libi switi anga u leti enke fa wan mma e solugu en pikin di de a bobi fu di a lobi en.
8 U lobi u tuutuu, neen meke u be e piisii fu paati a bun nyunsu fu Gadu gi u. U be de kabakaba fu dede gi u tu.
9 Den baala fu mi, mi sabi taki wa feegete faw be e wooko taanga. U be e wooko dei anga neti fu u be sa solugu useefi, bika wa be wani de enke wan ibi aw tapu di u be e paati a bun nyunsu fu Gadu gi u.
10 Wi anga Gadu seefi de enke kotoigi taki di u be de makandaa anga u, na ala yuu u be e holibaka gi u, noiti u libi ogii anga u, wa be poi fende nawan fowtu aw tu.
11 U sabi taki na ala yuu u be e taki anga u, u be e toosutu u, u be e poti wi a pasi leti enke fa wan dda e libi anga en pikin.
12 U du a sani ya fu u be sa tyai useefi a wan fasi di Gadu e fende bun. Gadu kai u fu kon aini a Kownukondee fi en, a kai u fu fende a gendee fi en.
13 Neen meke we gi Gadu daa ala yuu, bika di u yee a wowtu fu Gadu di u peleiki gi u, wa teke en enke a wowtu fu libisama, ma u biibi tuutuu taki na a wowtu fu Gadu. Na a wowtu ya e yeepi wi di e biibi.
14 Den baala fu mi, we waka a den kemeente fu Yudeya baka di de wan anga Kelestesi Yesesi, bika leti enke fa den Dyu e du ogii anga den, a so u eigi kondeeman e du ogii anga u.
15 A den Dyu kii Masaa Yesesi anga den polofeiti. A omen ogii den du anga u tu. Den sani di den e du nai meke Gadu piisii, den sani ya nai tyai wini gi nawan sama tu.
16 Den á wani u peleiki gi den taa kondee sama, bika den sabi taki di wo peleiki gi den, denseefi sa fende a libi. A so den e meke den sondu fu den kon moo ipi. Ma now a atiboon fu Gadu o kon a den tapu.
17 Den baala fu mi, wan pisiten wa be poi de makandaa anga u, ma u be de aw pakisei. U be e angii fu si u te, neen meke u du ala saw poi fu wi anga u miti.
18 Na a sani ya meke u be wani kon a wi anda, eeye, a tu leisi mi Pawlesi seefi meke moiti fu doo a wi anda, ma Saatan tapu pasi gi u.
19 A holi di we holidoo e meke u piisii, bika we biibi taki di Masaa Yesesi o daai kon baka, wo de makandaa anga u. A disi na a pai di wo fende.
20 Eeye, a wi na a pai di u fende, a we meke u piisii.